Tesalonikaƒuɔ 2 3
3
Binyimo Na Bitaakpali Katɔ Na Bula Lili
1Asa na mawɔlɔ ni, banwa, binyimo na bitaakpali katɔ na bula lili kalɛ na Blɔti litemi lɛmɛni liteegyingya teesie kesi kesii ku ɔbu aani kalɛ na amii lɛnɔ bɛ́ƒɔ-ni. 2Na bivele lɛnɔ kalɛ Blɔti wada-bu wedie na bekyuli bekpidi enu kemmo, ɔsika ɔɔɔdi bekyuli ƒui náƒɔ nwuna litemi lɛmmɔ bádi. 3Nsu Blɔti unye-mii kama, na ɔdubɔkya-mii ɔkplu na wanu-mii lɛlɔ kalɛ na ukisine ɔmmɔ uladi-mii lɛlɔ. 4Blɔti ɔ́ya na bubo lɛnunsia na bina lɛlɔ ka bɛɛbla ala ani na bɔ́tina-mii, na bɔgyi ka bɛdubɔkana-nya butaabla. 5Buuvele Blɔti bɔnii ubimi-mii anumi na bɛnu bɛti kalɛ na anwu Kristo ɔɔkɛ́ kayi teete-bu ku kalɛ na Katɔti ɔɔyɔ́-bu.
Binye Kabla Lɛlɔ
6Banwa, bɔɔlɛ-mii geen na Blɔti Yesu Kristo lɛnyi kemmo bɔnii bɛda lɛlɔ bɛmami baƒɔtaadine bakɔsɔne bani neeeti bula ala bɔtina lɛlɔ. 7Amii alati bɛgyi kaduɛ ka ɔdi ka bɛbla kabla aani kalɛ kani na abu lɛnɔ bɔ́bla, ɔsika bútabla kɔkɔsɔ uwi ɔni na bɔ́kya-mii kudɔ. 8Búteti bula etila bútasia ɔdi lɛlɔ. Na mmomu bɔ́bla kabla kpakplaa usien ku ɔƒɛ ɔni na ɔdi útebo bula lɛlɔ bɔnu kayu. 9Bubo ɔyikun ka nka buti bula etila bɔsia-mii lɛlɔ. Nsu ka bɔɔyɔ́ ka bɛtɛya kalɛ na beenye kabla lɛlɔ ɔsu ni, bútabla lɛni. 10Bɛdubunyimo ka uwi ɔni na bɔ́kya-mii kudɔ ni, bɔ́su-mii geen bɔnii ukyuli ɔni muuní kabla ni, bitete-nwu lɛla lɛdi na ɔdi.
11Bɔɔsu ala amɛni ɔsika buunú ka bakɔsɔne badi bakya-mii akɔ na bana bakpana lɛlɔ etemila kani na bakɛ baasu taavi. 12Buubó bekyuli bamɛni ɔda kpakplaa na Blɔti Yesu Kristo lɛnyi kemmo bɔnii bada ngba kaduɛ na beti bana enu bawia bana lɛdila.
13Nsu amii ni, banwa, bitaya na enu aƒɛ-mii na lɛbuni bɔbla kemmo. 14Na si ukyuli ɔdi ulábla taasiaku litemi lɛni na bɔ́su-mii na ɔku ɔmɛni kemmo lɛlɔ ni, bise-nwu likpo na bɛda lɛlɔ bɛmami-nwu lɛlɔ na kɔƒa kukpo-nwu. 15Nsu bitekisi ukyuli ɔmmɔ. Mmomu bɛlɛ-nwu aani bina ɔnwani kalɛ.
Bɔɔkada-mii
16Buuvele Blɔti ɔlatidi ɔni muute keyi buɛɛ bɔnii ute-mii keyi buɛɛ na bina ngba bulie ƒui kemmo. Blɔti ɔda bina ƒui na ulu biala lɛlɔ.
17Ami Paulo muunweni bɔkada bɔmɛni ku ami ɔlati mina kɔnu aani likpose lɛni mɔɔtina ka ami na ɔdi. Lɛni na muunweni na mina lɛku ƒui kemmo.
18Buuvele bɔnii Blɔti Yesu Kristo ɔda bina ƒui na nwuna lɛƒɔndia kemmo.
Currently Selected:
Tesalonikaƒuɔ 2 3: lef
Highlight
Copy
Compare
Share
Want to have your highlights saved across all your devices? Sign up or sign in
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.
