SAKALIA 6
6
Ko te Fakaasiga e Uiga ki Kaliota e Fa
1Ne toe oko mai te sua fakaasiga ki a au. I taimi nei, ne lavea ne au a kaliota e fa e ulu mai ki tua i te vaaga o mauga palasi e lua. 2#Faka 6.4; Faka 6.5 A te kaliota muamua e toso ne solofanua kula, te lua e toso ne solofanua uli, 3#Faka 6.2 te tolu e toso ne solofanua kena, ka ko te fa e toso ne solofanua pule'pule. 4Tena ne fesili atu ei au ki te agelu penei, “Tou malu, se a te uiga o kaliota konei?”
5 #
Faka 7.1
Muna a ia, “A kaliota kona ko matagi kola e fa; ko fatoa ma'taga mai eiloa latou mai mua o te Aliki o te lalolagi katoa.”
6A te kaliota tela e toso ne solofanua uli e fano pela ki matū i Papelonia, a te kaliota tela e toso ne solofanua kena e fano ki te togala, ka ko te kaliota tela e toso ne solofanua pule'pule e fano ki te fenua i saute. 7I te ulumaiga o solofanua pule'pule ki tua, ko se maua eiloa o taofi te fia olo o latou o asiasi te lalolagi. Muna a te agelu, “Olo o asiasi atu te lalolagi!” — tela olo eiloa latou. 8Ne pakalaga mai a te agelu ki a au penei, “A solofanua kola ne olo ki matu i Papelonia ko oti ne fakamāmā ne latou te kaitaua o te Aliki.”
Ko te Kalauna ke Tuku ki te Ulu o Iosua
9Tenei te fekau ne tuku mai ne te Aliki ki a au. 10Muna a ia, “Puke a meaalofa kola ne aumai ne Heletai, Topita mo Ietaia, tino kola ne ave fakapagota, kae fano fakavave ki te fale o Iosia, te tama a Sefanaia. A tino katoa konei ko oti katoa ne foki mai i te tafeaga i Papelonia. 11Faite se kalauna ki siliva mo aulo kola e aumai ne latou, kae tuku atu ki te ulu o te Faitaulaga Pule, tela ko Iosua, te tama a Iosataka. 12#Iele 23.5; 33.15; Saka 3.8 Fai ki a ia i te Aliki Tafasili i te Malosi ne fai mai penei, ‘A te tagata tela e fakaigoa ko Te Kaula ka tupu olaola a ia i te koga e nofo ei a ia, kae ka toe fakatu ne ia a te Faletapu o te Aliki. 13Ko ia tena ka faite ne ia a te Faletapu, kae ka maua foki ne ia te fakaaloaloga e 'tau fua ki te tupu, kae ka pule ne ia ona tino. E isi se faitaulaga ka tu i tafa o tena nofogaaliki, kae ka ga'lue fakatasi laua mo te fealofani.’ 14A te kalauna ka fai mo mea fakamanatu i te Faletapu o te Aliki, e fakamanatu ei a tino konei: Heletai,#6.14 Tasi o lomiga taumuaHeletai; faka-Epelu Heni. Topita, Ietaia mo Iosia.”#6.14 Tasi o lomiga taumua Iosia; faka-Epelu Heni.
15A tino kola e nofo mao ka o'mai o fesoasoani ki te faitega o te Faletapu o te Aliki. Kae kafai ko toe faite, ka iloa ei ne koe i a au ne uga mai ne te Aliki Tafasili i te Malosi. Ka taunu katoa a mea konei manafai e tausi faka'lei koe ki fakatonuga a te Aliki tou Atua.
Currently Selected:
SAKALIA 6: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
