LOMA 7

Ko te Akoakoga ki te Olaga Fakatauavaga

1Taina, e se iloa ne koutou i a au e faipati ki a latou kola e iloa ne latou te tulafono; i te tulafono e pule fua i te tino i te taimi e ola ei a ia? 2A te fafine avaga, e ligina ne te tulafono ki tena avaga ka koi ola a ia; kae kafai ko mate tena avaga, ko saoloto ei a ia mai i te tulafono tela ne ligina ei a ia. 3Kae ka fakaigoa a ia ki se fafine mulilua, manafai ko avaga mo se isi tagata ka koi ola tena avaga. Kae kafai ko mate tena avaga, ko saoloto ei a ia mai i te tulafono; kae kafai foki e avaga mo se isi tagata, ko se taku ei a ia se fafine mulilua. 4E pena foki koutou e taina, ko oti ne 'mate koutou ki te Tulafono i te foitino o Keliso, kae nei ko fai koutou mo ia tela ne toetu mai tino 'mate, ko te mea ke aoga otou ola mō te Atua. 5I te taimi ne ola ei tatou i feitu faka te foitino, ne fakagasue otou manakoga agasala ne te Tulafono, kae nei ko galue i otou foitino o fakatupu te mate. 6Kae nei la, ko saoloto tatou mai i te Tulafono, i te mea i a tatou ne 'mate muamua ki te mea tela ne pologa tatou ki ei. Ko se toe tau'tali tatou ki te ala mua o te tulafono tusia, ka ko te ala fou i te Agaga.

Ko te Tulafono mo te Agasala

7 # Eso 20.17; Teu 5.21 Ne a la pati a tatou ka fai? I te Tulafono se agasala? Ikai, e se pena! A te Tulafono, ne fai ne ia au ke iloa ne au te agasala. E se iloa lele eiloa ne au te kaimanako, manafai e seki taku mai ne te Tulafono, “Sa kaimanako.” 8Ko maua te ala o te agasala o fakagasue a vaega o manakoga valevale i loto i a au, e alatu mai i fakatonuga. I te agasala se mea mate fua manafai e seai se tulafono. 9I a au se tino ne ola foki mai mua, kae seki oko mai te tulafono; kae i te okomaiga o fakatonuga, ne ola ake te agasala, kae mate ei au. 10Ka ko fakatonuga kola ne folafola mai ei te ola, ne aumai fua ne latou te mate. 11#Kene 3.13I te mea ko maua te auala o te agasala o galue i te fakatonuga, o fakaloiloi mai au, kae ne tamate foki ne ia au.

12A te Tulafono e 'malu, e tonu kae 'lei. 13Kafai la se mea 'lei, e a, e mafai ne ia o aumai te mate ki a au? Ikai, e se pena! Ko te agasala ne aumai ne ia te mate ki a au, kae i te auala tenei, e fakaasi tonu mai ei i te agasala se agasala eiloa. Tela la, e alatu i fakatonuga ko na gasolo atu ei o masei te agasala.

Ko Uiga e Lua o te Tino

14E iloa ne tatou i te Tulafono se mea faka te Agaga; ka ko au se tagata faka te lalolagi, ne 'togi atu e pela mo se pologa ki te agasala. 15#Kene 5.17E se iloa ne au aku mea ne fai, me se fai ne au a mea kola e manako au o fai, kae ne fai ne au a mea kola e se loto au ki ei. 16Kafai la ne fai ne au a mea kola ne seki loto au o fai, e fakaasi mai ei i a au e taofi pela i te Tulafono se mea tonu. 17Tela la, e se ko au eiloa tela ne fai ne ia a te mea nei; ka ko te agasala tela e nofo i loto i a au. 18E iloa ne au i toku feitu faka te foitino, e seai eiloa se 'lei e nofo i ei. E tiga eiloa te nofo mo au te manako o fai te 'lei, e se mafai eiloa ne au o fai. 19Me e se fai ne au te 'lei e manako au ki ei o fai, kae fai eiloa ne au te masei tela e se manako au ki ei o fai. 20Kafai la e fai ne au a te mea tela e se fiafia au o fai, ko tena uiga e se ko au tela ne fai ne ia; ka ko te agasala tela e nofo i loto i a au.

21Tela la, ko maua ne au i te tulafono tenei e galue nei, e leake eiloa au me ko te mea 'lei tela e fai ne au ke tu ei te tulafono, kae tagaila se mea masei fua. 22Ka ko toku tina kanoloto tonu eiloa: e fiafia ki te tulafono a te Atua. 23Kae e matea foki ne au te sua tulafono e galue i toku foitino, ko te tulafono tela e taua mo te tulafono e tonu ki toku mafaufau. Ko fai ne ia au e pela mo se pagota ki te tulafono o te agasala, tela e galue i toku foitino. 24Ko seai la se tino malaia penei mo au! Ko oi la ka fakaola ne ia a au mai i te foitino mate tenei? 25Fakafetai ki te Atua, e alatu i te tou Aliki ko Iesu Keliso!

Tela la, a te mea tenei ko te mea e masani ei a kita nei: i a au eiloa; e mafai ne au o tavini ki te tulafono a te Atua i toku mafaufau, ka ko toku feitu faka te foitino, e tavini ki te tulafono a te agasala.

Currently Selected:

LOMA 7: Tusi Tapu

Highlight

Copy