LOMA 1

1Ko au ko Paulo, te tavini a Iesu Keliso, ne kalagagina ke fai mo apositolo, ne fakamavae mai keatea mō te folafolaga o te Tala 'Lei a te Atua, 2tela ko leva ne fai feagaiga mai ei a ia ki ana pelofeta i Tusitusiga Tapu, 3ki te tala 'lei e uiga ki tena Tama ko Iesu Keliso te tou Aliki, tela ne tupu mai i te kaiga o Tavita i te foitino. 4Ne fakaasi tonu mai ei me ko ia ko te Tama a te Atua i te mana o te Agaga Tapu i tena toetuakega mai tino 'mate. 5Ne maua foki ne au mai i a ia te alofa tauanoa mo te galuega fakaapositolo, ke aumai ei a fenua katoa ki te fakatuanaki ki tena igoa. 6A fenua konei e aofia i ei a koutou kola ne kalagagina ne Iesu Keliso.

7Te la, ko tusi atu au kia koutou katoa i Loma, kola ne alofagina ne te Atua kae ne kalagagina ne ia ke fai mo ana tino totino:

Ke i a koutou te alofa tauanoa mo te filemu mai te Atua te tou Tamana, mo Iesu Keliso te tou Aliki.

Ko te 'Talo Fakafetai

8E mua eiloa taku fakafetai ki toku Atua, e alatu i a Iesu Keliso mō koutou katoa, i te mea ko takutakugina te otou fakatuanaki i te lalolagi katoa. 9I te Atua tela e tavini ei au ki a ia i toku agaga, i te folafolaga o te Tala 'Lei i tena Tama, ko taku molimau, me e iloa ne ia me se mafai o puli koutou i aku talosaga, 10e fakatagi atu ei au ki te Atua me e tusa mo tena loto ke oko atu au o asi koutou. 11Ko oko eiloa i toku fia oko atu, ko te mea ke mafai ne au o avatu ki a koutou a nisi meaalofa faka te Agaga, e fakamalosi ei koutou. 12Ko tena uiga ke fakatau fesoasoani tatou i te tou fakatuanaki, o faka lotomalosi mai koutou, ka ko au ki a koutou.

13 # Galu 19.21 Taina, e 'tau o iloa ne koutou, me mafaufau sale au ki toku fanatu ka ko taofia eiloa au ke oko mai ki aso nei, ko te mea ke mafai ne au o maua ne fua mai i a koutou, ke pela mo nisi o fenua fakaatea. 14Au ne ligina ne taku feagaiga ki tino Eleni, pela foki ki tino o fenua fakaatea, tino 'poto mo tino va'lea: 15tela la, ko oko eiloa i toku fia folafola atu te tala 'lei ki a koutou kona i Loma.

Ko te Mana o te Tala 'Lei

16 # Male 8.38 I a au e se ma i te tala 'lei: i te mea ko te mana o te Atua e fakaola i ei a latou katoa kola e fakatuanaki, e muamua te Iutaia, kae tafa atu te Eleni. 17Ne fakaasi mai ne te tala 'lei te auala ne fai ne te Atua ko tino ke amiotonu. E auala i te fakatuanaki mai te kamataga ki te fakaotiga. E pela mo muna a te Tusi, “E maua ne te tino te ola tonu i te talitonu i te Atua ko oti ne fai ne ia te tino tena ke 'lei te la va.”#1.17: Ko oti ne tuku tonu mo te Atua e auala i te fakatuanaki ko ola i ei; io me tuku tonu mo te Atua ka ola e auala i te fakatuanaki.

Ko te Agasala a Tino Katoa

18Ne fakaasi mai ei foki te fakasalaga a te Atua mai te lagi ki te se amio Atua mo te amio ma'sei o tino, i te mea ko tekeia ne te lotou amio masei ke se iloa ne latou te mea tonu. 19Tenei te pogai e fakasala ei ne te Atua a tino: ne fakaasi faka'lei eiloa ne te Atua tena Munatonu ki tino. 20A te uiga se lavea o te Atua, tela ko tona mana mo tona uiga fakaatua, ko oti eiloa ne fakaasi faka'lei mai e alatu i te faitega o te lalolagi. Tela la, ko se mafai ne tino o fai ne olotou fakasako me ko matea 'lei ne latou te Atua i ana mea ne fai. 21#Efe 4.17,18E iloa foki eiloa ne latou te Atua, kae se fia āva ki a ia e pela mo se Atua io me 'viki atu ki a ia, kae ne 'fonu olotou manatu i mafaufauga se 'lei, mo olotou mafaufauga 'masa ko 'fonu foki i te pouliga. 22Ne manatu ifo latou me i a latou e 'poto, kae tela la e va'lea fua. 23#Teu 4.16-18Ne sui foki ne latou te 'malu o te Atua ola tumau ki fakatusa o te tino, manu eva, manu vaefa mo manu 'tolo kola e oko ki ei te mate.

24Ona ko latou ne tino va'lea, tela la, ne fai eiloa ne latou olotou manako ki te lotou faitalia, kae fai foki ne latou amioga fakasotoma. 25Ne sui ne latou te mea tonu e uiga ki te Atua ki te mea loi. Ne tapuaki kae tavini foki ki mea ne faite ne te Atua i lo te tapuaki ki a ia. E 'tau o vikia te Atua ki te se gata mai. Amene.

26Tenei te pogai ne tuku atu ei latou ne te Atua ki amioga fakalumaluma. Ke oko foki ki olotou fafine, ne fakaaoga 'se ne latou faifaiga tonu o te foitino ki faifaiga se tonu; 27kae pena foki tagata, ne tiakina ne latou faifaiga tonu i te va o tagata mo fafine, kae ne 'ka olotou loto i te manako o te sua tagata ki te sua tagata, me ne fai ne tagata kona amioga fakalumaluma mo nisi tagata, kae ka maua ne latou te lotou fakasalaga i olotou mea 'se.

28I te mea e ita latou o puke mau i olotou mafaufau a te poto o te Atua, tela tuku atu ei olotou mafaufau mo fai amioga se 'lei. 29Ne 'fonu i vaega amio masei katoa, te masei, te kaimanako, te mataola, te kaisoa, te tatino, te faitaua, te takolekole, te se alofa, mo te fatufatu. 30Ne tino fai tala loi, e ita ki te Atua, fia iloga, fia sili,#1.30: kae takalialia ki te Atua, e se ava; io me e ita ki te Atua, kae se ava. fia ma'luga, fakamata'mata, mafaufau ki mea masei, se faka'logo ki olotou matua, 31e fakavale'vale, se fakamaoni, seai ne loto, mo te se a'lofa. 32E iloa foki ne latou te fakatonuga a te Atua, me i tino kola e fai ne latou a uiga kona, ko 'tau i a latou te mate, kae se gata fua i te fai ne latou, kae talia foki ne latou a tino kola e amioga pena, ke fai ne latou.

Currently Selected:

LOMA 1: Tusi Tapu

Highlight

Copy