FILIPI 1

1 # Galu 16.12 Ko maua ko Paulo mo Timoteo, ne tavini a Keliso Iesu. Ko tusi atu maua ki Kelisiano katoa e 'nofo i Filipi, fakatasi mo takitaki mo tiakono o te Ekalesia:

2Ke i a koutou te alofa tauanoa mo te filemu mai te Atua te tou Tamana, mo te Aliki ko Iesu Keliso.

Ko te 'Talo a Paulo mō Tino Faitau ki Ana Tusi

3Au e fakafetai faeloa ki toku Atua mō koutou i taimi e mafaufau atu ei au ki a koutou; 4kae i taimi katoa e 'talo faeloa au mō koutou, kae 'talo foki au mo te loto fiafia, 5ona ko te fesoasoani mai o koutou ki a au i galuega o te tala 'lei, mai te aso muamua ke oko mai eiloa ki te aso tenei. 6Ko iloa tonu foki eiloa ne au a te mea nei: i te Atua tela ne kamata ne ia a te galuega 'lei tenei i a koutou, ka fai eiloa ne ia pena te galuega, ke oko eiloa ki te palele 'lei i te Aso e oko mai ei a Keliso Iesu. 7E pele faeloa koutou i toku loto! Tela la, se mea 'tau ki a au ke mafaufau pena au ki a koutou. Me i a koutou ko oti ne kau fakatasi mo au i te galuega tela ne kalagagina ei au ne te Atua, me ko taimi ne fale puipui ei au io me ko taimi ne saoloto ei au, ne fesoasoani katoa koutou o fakamautakitaki te tala 'lei. 8E iloa 'lei ne te Atua i a au e faipati tonu eiloa i taku muna pela: a toku alofa katoatoa mo koutou ne maua mai eiloa i a Keliso Iesu.

9Tenei taku 'talo mo koutou: au e 'talo ke tuputupu ake faeloa te otou alofa, pela foki mo te otou poto mo te otou fakautauta. 10Ko te mea ke iloa ne koutou o filifili a te mea e sili atu i te 'lei; ke mafai ei koutou o saoloto mai mea ma'sei katoa, pela foki te takumaseigina i te Aso o Keliso. 11Ka fonu otou olaga i mea 'lei katoa kola ko Iesu Keliso fua e mafai o fai ne ia, mō te vikiga mo te tavaega o te Atua.

A Keliso ko te Ola

12Taina, au e manako ke iloa ne koutou a mea ne 'tupu ki a au, me ne fesoasoani katoa ki te fanofano ki mua o te tala 'lei. 13#Galu 28.30Tela la, ko iloa ne sotia katoa o te fale o te Tupu, pela foki mo tino katoa o te fale, me i a au ne fale puipui ona ko Keliso. 14A toku pei ki te fale puipui, ne fai mo auala e talitonu malosi ei ki te Aliki a te tokoukega o taina, ka ko oko foki eiloa i te loto 'toa o taku atu te muna mo te se ma'taku i taimi katoa.#1.14: te fekau; i nisi lomiga e isi i ei te fekau a te Atua.

15E tonu me e isi ne tino mai i a latou ne talai fua ne latou a Keliso ona ko te mea e loto masei kae finau va'lea, ka ko nisi ne folafola atu ne latou a ia i te agaga o te alofa tonu. 16Ko latou kola ne fai ne latou te galuega i te agaga o te alofa tonu, ne fai pena ne latou i te mea e iloa 'lei ne latou me ko oti ne tuku mai ne te Atua ki a au, a te galuega ki te puipuiga o te tala 'lei. 17Ka ko nisi tino, e seki folafola ne latou a te Keliso i te agaga o te alofa, kae ne folafola ne latou i te agaga o te loto masei; me ne ma'natu latou me ka fakauke ne latou oku puapuaga ka koi fale puipui au.

18E se afaina! E 'lei faeloa ki a au, me tusa eiloa me ne folafola ne koutou te Keliso i te tonu me ko te se tonu, e fiafia eiloa au ki ei, 19me ko iloa 'lei ne au, ona ko otou talosaga mo otou fesoasoani kola e auala mai i te Agaga o Iesu Keliso, ka saoloto ei au. 20Me i toku kano loto katoa mo toku fakamoemoega maluga, ke mo a ma se fai toku tiute; kae mo taimi katoa, kae sili atu eiloa te taimi nei, ka fonu au i te loto malosi, ko te mea ke mafai ne toku foitino katoa o avatu te vikiga mo Keliso, me ko toku mate io me ko toku ola. 21Kae se a te ola? A te ola ki a au ko Keliso. Tela la, a te mate ka aumai ne ia a te mea e tafa sili atu i te 'lei. 22Kae kafai e mafai ne au o fai a nisi galuega aoga, manafai koi tumau eiloa toku ola, ko se iloa ne au me tefea te galuega ka filifili ne au. 23Au ko saitia ne mea e lua: ko oko eiloa i toku manako o tiakina a te olaga nei, kae fakatasi mo Keliso, me tena te mea sili; 24kae ona ko koutou, ko tafasili i ei a te aoga o te tumau o toku ola mo te otou 'lei. 25E iloa tonu eiloa ne au a te mea nei, e iloa tonu foki ne au me e tumau eiloa toku ola. Ka 'nofo eiloa tatou fakatasi o fakalasi te otou fanofano ki mua, pela foki mo te otou fiafia ki te fakatuanaki. 26Tela la, kafai e toe fakatasi tatou, ka uke feitu ka fakamata'mata koutou ki ei ona ko au, i te otou olaga i a Keliso Iesu.

27Nei, a te mea taua ke pau otou amio mo te mea e manako ki ei te tala 'lei a Keliso, me ko toku oko atu me ko toku se oko atu o asi koutou, ka ke lagona ne au a te tala i a koutou e mautakitaki i te fakamoemoega e tasi, kae ne kau fakatasi koutou o tau mo te fakamoemoega eiloa e tasi, ona ko te fakatuanaki tela e maua i te tala 'lei. 28Sa ma'taku ki otou fili; ke loto 'toa faeloa koutou, ko te fakatalitonuga tena ki a latou me ka takavale latou, ka ko koutou ka manumalo, me ko te Atua e avatu ne ia te manumalo ki a koutou! 29Ko oti ne tuku atu ki a koutou a te galuega ko te tavini ki a Keliso, e se i te fakatuanaki fua ki a ia, kae i te puapuagatia foki o koutou mō ia. 30#Galu 16.19-40Nei, e mafai koutou o tau fakatasi mo au i te taua. Ko te taua foki eiloa tela ne matea ne koutou me tau sale ei au i aso ko teka, ko ia foki eiloa tenei koi tau eiloa au i ei, e pela eiloa mo tala e lagona ne koutou.

Currently Selected:

FILIPI 1: Tusi Tapu

Highlight

Copy