KALATIA 6
6
Fakatauamo Fakatasi Otou Amoga
1Oku taina, kafai se tino e maua i so se agasala; ko koutou kola e tumau i te olaga faka te Agaga ke fakatonu ne koutou; kae 'tau mo koutou o fai i te agaga o te loto malalo. Kae onoono tonu ki a koe eiloa, i a koe ma fakaosoosogina foki. 2Fesoasoani o fakatauamo fakatasi otou amoga; i te auala tena ka tausi ne koutou,#6.2: a koutou ka faka'logo; i nisi lomiga e isi i ei fakalogo. a tulafono a Keliso. 3Kafai se tino e taofi i a ia se tino aoga, kae tela ei e se aoga, ko fakaloiloi a ia ne ona manatu. 4E 'tau mo te tino o fakamasino ifo eiloa ki ana galuega ne fai. Kafai e 'lei ko 'tau mo ia o fakamatamata ki ei, kae sa fakatusatusa fua ki mea a te sua tino ne fai. 5I te mea e 'tau eiloa mo te tino o amo tena amoga.
6A te tino tela ko akoakogina ki te muna a te Aliki, e 'tau mo ia o vaevae ana mea 'lei katoa i a laua mo tena faiakoga.
7Ke se fakaloiloigina koutou: e seai se tino e mafai ne ia o fakavalea a te Atua. E tau ne te tino a te fuaga ne toki ne ia. 8Ko te tino e toki ne ia a mea kola e fiafia ki ei a te foitino, ko te fua e maua ne ia mai i ei, ko te mate; ka ko te tino tela e toki i luga i te Agaga, e maua ne ia mai te Agaga a te ola se gata mai. 9Tela la, ko se 'fiu tatou i te fai o mea 'lei; me kafai e tumau eiloa tatou i ei, e oko mai te taimi tonu tela e tau ei ne tatou a fuataga. 10Tenei la, e 'tau mo tatou o fai te mea 'lei ki tino katoa, kae fakasilisili ki a latou kola e i loto i te kaiga Kelisiano.
Ko Polopolokiga mo Fakatalofaga Fakapalele
11Kiloke ki te lasi o mataimanu ko tusi atu ne au ki toku lima. 12Ko tino kola e fia fakamata'mata kae fia taku'leia ne tino i mea faka te foitino, ko latou kona e taumafai o fai malo koutou ke pilitome. E fai fua ne latou a te mea tena, ko te mea ke se fakasauagina latou i te sataulo o Keliso. 13E pela foki tino kola e fakaaoga ne latou a te pilitome, e se tausi ne latou a te Tulafono; e manako a latou ke pilitome koutou, ko te mea ke fakamatamata ei latou i otou foitino. 14Ka ko au, e tasi faeloa a te mea e fakamatamata au ki ei, ko te sataulo eiloa o te tou Aliki ko Iesu Keliso, ko tena uiga ko tena sataulo ko fai ei manako faka te lalolagi mo mea 'mate ki a au, e pena foki au ki manako faka te lalolagi, se mea mate. 15E se afaina eiloa me pilitome io me se pilitome se tino, a te mea sili ko te fai mo tino fou. 16Ke i luga i tino kola e tautali ki fakatonuga konei a te filemu mo te alofa 'nau; ke pena foki ki te Isalaelu a te Atua!
17Mai i te taimi nei, ke se toe fakalavelave mai se tino ki a au; me i pa'kiaga i luga i toku foitino, e fakaasi atu ei i a au ko te tavini a Iesu.
18Oku taina, ke i otou agaga a te alofa tauanoa o te tou Aliki ko Iesu Keliso. Amene.
Currently Selected:
KALATIA 6: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
