ESOTO 35

Ko Tulafono o te Sapati

1Ne kalaga atu a Mose ki tino katoa o Isalaelu, kae fai atu penei, “Tenei te mea ne fakatonu mai ne te Aliki ke fai ne koutou: 2#Eso 20.8-11; 23.12; 31.15; 34.21; Levi 23.3; Teu 5.12-14E ono aso e fai ei otou galuega, ka ko te fitu o aso ke fakatapu, kae ke faka'malu mai foki ki a au, te Aliki, ke fai mo aso malolo. So se tino e fai ne ia se galuega i te aso tena, ka fakasala ki te mate. 3Sa faka'kagina se afi i loto i tou fale i te Sapati.”

Ko Taulaga ki te Faleie Tapu

(Eso 25.1-9)

4Ne fai atu a Mose ki tino katoa o Isalaelu penei, “Tenei te mea ne fakatonu mai ne te Aliki: 5Fai se taulaga ki te Aliki. A latou kola e fia fai taulaga ki te Aliki, ke aumai ne taulaga aulo, siliva mo palasi; 6laugatu lino gali, vulu lanu usi, lanu kulakula mo te kula; ke oko ki laugatu kola ne fai ki fulufulu o kouti; 7ko pakili o mamoe tagata kola ne vali ki te lanu kula; pakili manu malosi; mo te lakau ko te akasia; 8ko sinu e utu ei a moli; ko mea fakamanogi e palu ei te sinu tapu, ke oko foki ki mea manogi mo taulaga sunu; 9ko fatu kaneli mo nisi fatu foki pena kola ka fakamau ki te efota mo te ufi fatafata o te Faitaulaga Pule.

Ko Mea e Teuteu ei te Faleie o te Aliki

(Eso 39.32-43)

10“A tufuga poto katoa i a koutou e 'tau o o'mai o fai a mea kola ne fakatonu mai ne te Aliki ke fai: 11ko te Faleie, tena pui i tua mo tena pui i loto, ko ana pine fakalava mo ana laupapa; ko ana lakau fakalava mo ana pou, ke oko foki eiloa ki tona fakavae katoa; 12ko te Pusa o te Feagaiga mo ana amo, tena pono mo te laugatu tela e ufi i ei; 13ko te taipola mo ana amo, ke oko ki ana mea katoa; e pela foki mo te falaoa tela e tuku sale i ei mo te Atua; 14ko te tulaga‐moli mo te moli mo ana mea katoa, ke oko ki mata moli mo olotou fagu sinu; 15ko te fata-fai-taulaga e sunu ei a taulaga manogi mo ana amo; ko te sinu tapu; ko taulaga manogi gali; ke oko ki te pui laugatu o te mataloa o te Faleie; 16ko te fata-fai-taulaga o taulaga sunu, mo tena mea valavala palasi, ke oko ki ana amo mo mea katoa; te pesini fano mo tena tulaga; 17ko pui laugatu mo te pui fakatamilo, e pela foki mo ana pou mo ana lagolago katoa; ko te pui laugatu o te mataloa o te pui fakatamilo; 18ko pine lakau mo lopu o te Faleie mo tena pui fakatamilo; 19ko gatu ma'lu o faitaulaga kola e pei ki ei mafai e fai olotou galuega i te Potu Tapu, ko gatu tapu kona mo Alona te faitaulaga ke oko foki eiloa ki ana tama tagata katoa.”

Ko te Aumaiga o Taulaga a Tino

20I te otiga ne faipati a Mose, ne 'foki atu a tino Isalaelu ki olotou faleie, 21ka ko latou kola ne manako o fai taulaga, ne ave olotou mea ki te Aliki mo faite tena Faleie. Ne o'mai latou mo mea kola e manakogina mo te tapuakiga, ke oko foki ki mea kola e fai ei a gatu o faitaulaga. 22A latou kola e loto malie, i fafine mo tagata, ne o'mai mo pine fakagaligali, ligi taliga, mama, malele mo teuteu aulo katoa, kae ne fakatapu a mea katoa kona mo te Aliki. 23A tino kola e isi ne olotu laugatu lino lei; vulu lanu usi, lanu kulakula mo te lanu kula; mo laugatu ne fai ki fulufulu o kouti; mo pakili mamoe kola ko oti ne fakalanu ke kula; io, me ko pakili manu malosi, ne aumai foki. 24A tino katoa kola e mafai o fai meaalofa ki siliva mo palasi, ne aumai foki a olotou meaalofa kona mo te Aliki; a tino foki kola e isi ne olotou lakau ko akasia kola e mafai o fakaaoga i te galuega, ne o'mai foki mo latou. 25A fafine poto i te faiga o filo, ne o'mai mo filo e faite ki te lino gali, mo filo mai te vulu lanu usi, lanu kulakula mo te lanu kula, kola ne faite eiloa ne latou. 26Ne fai foki ne latou a filo mai fulufulu o kouti. 27Ne aumai ne takitaki a fatu kaneli mo nisi fatu taua ake pena ke fakamau ki te efota tapu mo te ufi fatafata. 28Ne o'mai foki mo mea manogi mo sinu mo te moli, mo te sinu tapu, e pela foki mo mea fakaauau manogi. 29A tino Isalaelu kola e loto malie, ne aumai olotou taulaga ki te Aliki, mo fai te galuega tela ne fakatonu ne ia ki a Mose.

Ko Tufuga Galue i te Faleie o te Aliki

(Eso 31.1-11)

30Ne fai mai a Mose ki tino o Isalaelu penei, “A te Aliki ko oti ne tofi ne ia a Pesaleli, te tama a Uli, kae ko te mokopuna o Hulo, mai i te matakaiga o Iuta. 31Ne tuku ne te Atua ki a ia te malosi,#35.31: malosi; Io me agaga. mo te poto, mo te malamalama mo te apo i te faiga o so se ata e fai ei te galuega, 32ke oko ki te lomiga mo te fuafuaga o ata, e pela foki mo te faitega o ata kona ki aulo, siliva mo palasi; 33ke oko ki te katikatiga o fatu taua; mo te teuteuga fakagaligali o lakau, e pela foki ki so se teuteu fakagaligali o so se galuega. 34Ko oti ne tuku atu ne te Aliki ki a ia mo Oliapo te tama a Aisamako mai te matakaiga o Tanu, te atamai o akoako atu o la poto ki nisi tino. 35Ne tuku atu foki ne te Aliki ki a laua te poto i galuega e fai ki fatu, te tusiga o ata, lagaga o laugatu lino mo faiga o vulu lanu usi, lanu kulakula mo te lanu kula, e pela foki mo nisi itu kaiga laugatu fakaatea. A tino galue konei e poto i faiga o galuega katoa, ke oko foki eiloa ki te 'lomiga o ata.

Currently Selected:

ESOTO 35: Tusi Tapu

Highlight

Copy