GALUEGA 6

Ko Fesoasoani e Tokofitu

1Ko gasolo ake eiloa o tokouke te aofaki o soko i aso kona, ka ko mui'mui Iutaia kola e faipati faka Eleni ki tino Iutaia, i te mea ko se tufa olotou fafine ko 'mate olotou avaga ki tupe mo koloa kola e tufatufa i aso takitasi. 2Ne ami atu a te tinoagafulu mo te tokolua apositolo ki soko ke maopoopo, fai atu ei latou: “E se 'tau mo matou o tuku te folafola atu o te muna a te Atua, kae saga o tufatufa a tupe mo koloa. 3Tela la e taina, filifili ake ne koutou ne tagata fakamaoni e tokofitu. Ne tagata e 'fonu i te Agaga Tapu mo te poto, kae ka faka'sopo ne matou ke pule ne latou a te tufatufaga o tupe mo koloa. 4Ka ko matou, ka fakasagatonu eiloa ki te fai talosaga mo te folafola atu o te tala 'lei.” 5Ko fia'fia katoa latou ki te fuafuaga a apositolo; tela, filifili ei ne latou a Setefano, kae se tino e fonu i te fakatuanaki mo te Agaga Tapu. Ko Filipo, Polokolasi, Nikanola, Timona, Pamena, Nikolasi mai Anitioka, se tagata Eleni foki ne fuli ki te lotu Iutaia. 6Ne tuku ne latou a te tokofitu kona ki apositolo; 'talo ei apositolo kae fakaeke olotou lima ki luga o latou.

7Ko salalau atu eiloa te muna a te Atua. E fakaopoopo faeloa te aofaki o te kau soko i Ielusalema, kae e tokouke eiloa a faitaulaga ko talia ne latou te muna.

Ko Puke Fakapagota Setefano

8Ko fonu Setefano i te alofa tauanoa mo te 'mana, tela ne fai ei ne ia a vavega mo fakailoga ki tino. 9E isi ne tino ne 'teke ki a ia, ne tino o te fale tapuaki e igoa ki Tino Saoloto,#6.9:Tagata saoloto: A latou konei ne Iutaia kola ne fakapologagina, kae ko oti ne togi io me ko oti ne tuku ki a latou te saolotoga. kae se fale tapuaki o Iutaia mai Kulene mo Alesania. E isi foki ne Iutaia mai Kilikia mo Asia ko kamata o finau atu ki a Setefano. 10Kae ne tuku atu ne te Agaga ki a Setefano te poto, ko te mea kafai e faipati a ia, e se mafai eiloa ne latou o 'teke atu ana pati. 11Ne 'togi ne latou a nisi tino ke fai'pati penei, “Ne lagona ne matou a ia e fai muna se 'lei ki a Mose mo te Atua!” 12Ko fakamakosu ne latou a tino, toeaina mo faiakoga o te Tulafono i olotou pati. Ne o'mai ki a Setefano, puke fakapagota, kae avatu ki mua o te Fono Maluga. 13Aumai ei ne latou a nisi tino ki loto, ke fai olotou molimau 'loi e uiga ki a ia. Muna a latou, “A te tagata nei e fai muna se 'lei ki te tou Fale Tapu 'malu mo Tulafono a Mose. 14Ne lagona ne matou a ia e faipati i a Iesu te Nasaleta ka lepe ne ia te Fale Tapu, ka ko fuli foki ne ia a tu kola ne tuku mai ki a tatou ne Mose!” 15A latou kola e 'nofo i loto i te Fono, ko 'pula 'toka fua ki a Setefano, kae matea atu nei ne latou i foliga o Setefano, ko pela mo foliga o se agelu.

Currently Selected:

GALUEGA 6: Tusi Tapu

Highlight

Copy