1 TESALONIA 2
2
Ko te Galuega a Paulo i Tesalonia
1E iloa 'lei eiloa ne koutou e taina, i te motou asiga ki a koutou e aoga. 2#Galu 16.19-24; Galu 17.1-9E iloa foki ne koutou me ne sona fai matou, kae muna maseigina foki i Filipi, ka koi tuai o oko atu matou ki Tesalonia. Ka ko te motou Atua, ne aumai eiloa ne ia te loto malosi o taku atu ki a koutou a te Tala 'Lei mai i a ia, kae tonu me e tokouke a tino e 'teke ki a matou. 3A te motou fakatagi e fai atu ki a koutou, e se fakavae i luga i mea 'se io me ko faiga se tonu, io me ko matou e taumafai o fakaloiloi se tino. 4E faipati sale eiloa matou e pela mo te mea e loto ki ei te Atua, ne talia kae fakamaonia ne ia a te Tala 'Lei ke tuku mai ki a matou, a matou e se taumafai o fakafiafia tino, na ko te Atua tela e tofotofo ne ia omotou loto. 5E iloa 'lei eiloa ne koutou i a matou e seki olo atu ki a koutou mo muna takolekole, io me ne muna e 'funa ei te motou kaimanako. A te Atua ko te motou molimau. 6A matou e se taumafai foki ko te mea ke tavae matou ne se tino, io me ne tavaega mai i a koutou io me mai nisi tino ake, 7kae ne 'tau mo koutou o tausi mai ki a matou, i a matou ko apositolo a Keliso. Kae ne ga'lue eiloa matou mo te loto a'lofa i te tou fakatasiga, pela me se matua#2.7: a matou ne loto alofa i te taimi ne fakatasi ei tatou, e pela mese matua; i nisi lomiga e isi i ei A matou e pela me ne tamaliki i te taimi ne fakatasi ei tatou; a matou e pela loa me ne matua. e tausi faka'lei ki ana tamaliki. 8Ona ko te motou alofa ki a koutou, ko toka nei matou o kau fakatasi mo koutou i te Tala 'Lei mai i te Atua, pela foki mo te tuku atu o omotou ola mō koutou, i te mea e fakapelepele koutou ne matou. 9Taina, e iloa 'lei eiloa ne koutou a te motou galue malosi mo te fita! Ne galue matou i te po mo te ao mo te manatu ke mo a e fai mo fakalavelave ki so se tino o koutou, manafai e talai atu ne matou ki a koutou a te Tala 'Lei mai i te Atua.
10A koutou ko omotou molimau, pela foki mo te Atua: a omotou faifaiga ki a koutou tino talitonu, e 'ma, e tonu kae e seai ne ona pona. 11E iloa ne koutou me ne atafai atu matou ki a koutou takitokotasi, e pela eiloa mo se tamana e atafai ki tena fanau. 12Ne fakamalosi ne matou otou loto, ne fakamafanafana atu foki matou ki a koutou, kae ne fakatauanau atu matou ke ola koutou i te olaga e fiafia ki ei te Atua, tela e kalaga atu ke kau fakatasi koutou ki tona Malo mo tona 'malu.
13Ona ko nisi feitu ake foki penei, e fakafetai faeloa matou ki te Atua. I te avatuga ne matou a te talaiga a te Atua, ne lagona kae talia foki ne koutou, e se ona ko te mea se talaiga a se tino, ka ko te talaiga eiloa a te Atua, kae tonu eiloa me e a te Atua. Me i te Atua e galue i loto i a koutou kona e talitonu. 14#Galu 17.5Oku taina, e pau faeloa a te mea ne tupu ki a koutou mo te mea ne tupu ki Ekalesia a te Atua i Iutaia, ki tino kola e o Keliso Iesu. E pau eiloa te puapuaga ne oko ki a koutou mai tino o te otou fenua, mo te puapuaga ne fakapuapuagatia ei foki latou ne tino Iutaia, 15#Galu 9.23,29; 13.45,50; 14.2,5,19; 17.5,13; 18.12kola ne tamate ne latou a te Aliki ko Iesu mo pelofeta, kae fakapuapuagatia matou. Ko oko eiloa i te se fakafiafia loto o latou ki te Atua. Ko oko foki eiloa i te fai fili ki tino katoa! 16Ne taumafai foki latou o fakagata te motou talai atu ki tino o fenua fakaatea, a te talaiga tela e maua ei ne latou a te fakaolataga. Tenei eiloa a te agasala tafa maluga e fai faeloa ne latou. Ko i luga i a latou katoa a te fakasalaga a te Atua!
Ko te Manako o Paulo o Toe Asi atu ki a Latou
17Ka ko matou e taina, i mu taimi ne mavae ei tatou, ne seki mavae tatou i omotou mafaufauga, kae tonu me ne mavae tatou i te foitino, ne taumafai malosi eiloa matou mo te loto fia oko atu ke toe fetaui tatou! 18A matou e loto ke toe olo atu matou. Ko au ko Paulo, ne taumafai au ke toe foki atu i te fakalua, ka ko fakalavelave mai Satani ki a matou. 19Se a te mea e fakavae ki ei te motou fakamoemoega, te motou fiafiaga mo te motou foualiki kola e fakamata'mata ei matou i mua o te tou Aliki ko Iesu manafai e vau? E se ko koutou? 20Ko koutou eiloa ko te motou vikiga mo te motou fiafiaga.
Currently Selected:
1 TESALONIA 2: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
