Na̱ Estee̱r (Ebreo̱) 3

Marndokeoo̱ ko̱jo Amaa̱n

1Jaskan ngije kamá kui nii̱, re Asueroo̱ ngo xá xí ꞌniú nkꞌa katsjaá Amaa̱n, ndií Amendataa̱, kui xi xota̱ tji̱e̱e̱ Angaa̱j, tsi̱ꞌe̱ nga kui xi ko̱tíxomaa̱ ngayeje xota̱xá xí ki̱a̱ tsꞌénxátꞌaa̱ ree̱. 2Kó ngayeje xota̱ mosoo̱ ree̱ xi síndotꞌa nga̱ntjo̱a̱ ndo̱bo̱a̱xa̱á kixindyiaxtien, kó asiéntikoó nga katsꞌéndikón Amaa̱n, ngatꞌa̱ bo̱a̱ tsꞌén atíxoma ree̱.

Ta̱nga Marndokeoo̱ kisꞌijñaxtienjín ti̱nde asiénjíntikoó, 3kuíni nga mosoo̱ ree̱ xi síndotꞌa nga̱ntjo̱a̱a̱ ndo̱bo̱a̱xa̱á asíyaá Marndokeoo̱, míkjo̱a̱a̱ nga tsꞌénkjátjosónjín kjo̱a̱botíxomaa̱ ree̱. 4Kó ndyiojón ndyiojón akasíyaá kui nii̱ Marndokeoo̱, ta̱nga nde katsꞌénsénjiín kui xotaa̱, kósꞌe̱ kiꞌmíyaà kui nii̱ Amaa̱n, ngatꞌa̱ kamámején sku̱i̱e̱ tsi to̱kó bo̱a̱ ka̱tso̱ Marndokeoo̱ ngindyi̱ko̱n kui, ngatꞌa̱ ja̱bo̱a̱ jè bo̱a̱ katsoó nga xota̱ jundío̱ bo̱a̱.

5Kó nga kamábe Amaa̱n nga Marndokeoo̱ kisꞌijñaxtienjín ti̱nde asiénjíntikoó, achichí katsꞌénxchán. 6Kó nga Amaa̱n jè be nga xota̱ jundío̱ Marndokeoo̱, kamámejénjiín nga ta̱kuítsí xi sa̱ꞌínkꞌién, ta̱sá kamámejeén katsꞌénkjié ngayeje xota̱ jundío̱ xi ngo nangi ma Marndokeoo̱, xi síndo ngi̱ndie nínga atíxoma re Asueroo̱.

Amaa̱n katsꞌénꞌindakon ree̱

7Jè má ítsꞌi̱yanii̱ sá xí tjoón, kui xi ꞌmí nisaa̱n, xi ma tiejó nónií nga tsꞌénbotixómá re Asueroo̱, nga kiniꞌánkjién ngo kjo̱a̱chꞌáṉcha ngindyi̱ko̱n Amaa̱n, tsi̱ꞌe̱ nga xcha̱ mí ni̱xtjin nga chjiéngá si̱ꞌan ni xi je tjíndaa̱, kó sá xí ma tiejoó má jatjo xki̱i̱, kui sá xí ꞌmí Andaa̱r. 8Kósꞌe̱ Amaa̱n, bi̱ katsoó re Asueroo̱:

—Ji re, ngi̱jii̱n na̱xi̱ńdá nínga tibotíxome ji síndo xota̱ xi ngo nangi chji̱a̱ni xi kastsojoboa ta̱jñàní, kó kje̱ꞌe kjo̱a̱kiti tjiín, kó tsꞌénkjátjosónjín ni xi botíxome ji, kuíni nga ndajínkjiꞌi nga si̱ꞌinchíkjo̱e̱ ngasèe̱. 9Tsi nda sasieén ni xi xian an, ti̱ꞌinde ji ngo kjo̱a̱kiti tsi̱ꞌe̱ nga si̱ꞌankjie ngayeje kui xotaa̱, kó án tsja an ján úchán mi̱ kilo̱ to̱ntiboa tsi̱ꞌe̱ nga ki̱a̱ kꞌo̱sꞌien ngi̱ya koxa̱tòo̱n.

10Kósꞌe̱ ree̱ tsꞌaxié sti̱ngaro xi tjiyaá tsja xi tsꞌényaꞌa chi̱bo̱a̱a̱ nga kui xi re, kó katsjaá Amaa̱n, ndií Amendataa̱, xi xota̱ tji̱e̱e̱ Angaa̱j, kui xi kondra̱ manii̱ xota̱ jundío̱, 11kó ree̱, bi̱ katsoó Amaa̱n:

—Ta̱sá jí chjábé jí kui to̱ntiboaa̱, kó kui xota̱ na̱xi̱ńdaá ta̱ ni xi mejeénri ti̱ꞌinje̱ ji.

Ni xi atíxoma Amaa̱n kjo̱a̱a̱ kótsꞌèn si̱ꞌankjie xota̱ jundíoo̱

12Kó ni̱xtjin tiejaán sá xí tjoón, kui sá xí ꞌmí Abii̱b, kandokjo̱a̱a̱ xota̱ chji̱ni̱e̱xo̱jo̱o̱n ree̱, tsi̱ꞌe̱ nga sa̱ꞌínꞌindó ni xi katsjákjo̱a̱ Amaa̱n, kó kui xo̱jo̱o̱n kanangiyaa̱ ngito̱ko̱o̱ xtín nangi, ko̱jo ngito̱ko̱o̱ nangi, ko̱jo xota̱ xi tjiín xá xki̱ na̱xi̱ńdáꞌniú. Kó bo̱a̱ tsꞌén kiniꞌánꞌindó xikótsꞌèn niꞌánda xo̱jo̱n ko̱jo xikótsꞌèn chji̱a̱ xotaa̱ nga ngo nga ngo nangii̱, kó jaꞌeén ko̱jo chi̱bo̱a̱a̱ sti̱ngaroo̱ ree̱ kiniꞌánkaꞌa kui xo̱jo̱n. 13Kó kui kjo̱a̱kitii̱ kanangiya ngayeje nangi nínga botixómá ree̱, nínga bo̱a̱ tsó nga chjiéngá si̱ꞌankꞌien ko̱jo si̱ꞌankjie kjin, ko̱jo nga chja̱ꞌáxiín ni xi tjiín, ngayeje xota̱ jundíoo̱, xi xchá xí kjindí, ko̱jo xi ínchjín, ko̱jo i̱xtikjindí xi̱xi̱, kó nga ni̱xtjin tiejaán sá xí ma tiejoó, kui xi ꞌmí sá Andaa̱r boá nga bo̱a̱ ka̱ma. 14Ngo kui xo̱jo̱o̱n, xi kjitꞌa kjo̱a̱kitii̱ kanangiyaa̱ nga ngo nga ngo nangi tsi̱ꞌe̱ nga sku̱i̱e̱ ngayeje xotaa̱, kó kꞌuíndonda nga kjo̱chó kui ni̱xtjii̱n. 15Kó bo̱a̱ tsꞌén tsá tsangínjo̱ kui xo̱jo̱o̱n, xikótsꞌèn atíxoma ree̱, ngatꞌa̱ na̱xi̱ńdáꞌniú Susa̱ boá nínga kamánda. Kó ree̱ ko̱jo Amaa̱n katsꞌe xán, tji̱e̱nga xota̱ na̱xi̱ńdáꞌniuú achichí nda̱ kamaá.

Currently Selected:

Na̱ Estee̱r (Ebreo̱) 3: MAIX

Highlight

Compare

Copy