Sî-fân-ngâ Sû 2

Ham Ngìn-mìn Fí-kói

1M̀-tî kien-seu ke koet-mìn â, oi chhi-si̍p khiung-ha, hó-siáng lé! 2Kón sṳ́m-phan màng phan-kiet yî-chhièn, chhiu-chhiong lùng-hông màng so-thet yî-chhièn, chhai Song-chú thai fat-khién ke ngit-è màng lìm-to ngì-têu yî-chhièn, kiak-kiak siáng ko-lòi! 3Sṳ-song só-yû khiâm-pî thâng-chhiùng Kì min-lin ke ngìn â, oi chhìm Song-chú! Oi chûi-khiù kûng-ngi, chhai Song-chú mien-chhièn khiâm-pî, án-ngiòng chhai Song-chú fat-khién ke ngit-è, ngì-têu khó-nèn voi tet-tó pí-yu.

Yî-set-lie̍t ke Lìn-koet Oi Su Chit-fa̍t

4Kâ-sat-sàng voi pûn-ngìn fi-thet, Â-sṳ̍t-kî-lùn voi pien fông-liòng. Â-sṳ̍t-thut-ngìn voi chhai tông-chu pûn-ngìn kiuk-chéu; he̍t chhai Yî-kiet-lùn ke ngìn ya voi pûn-ngìn kiuk-chhut sàng-ngoi. 5He̍t chhai hói-sùn ke Kî-li-thì-chhu̍k â, ngì-têu chhám lé! Kâ-nàm — Fî-li-sṳ-ngìn ke thú-thi â, Song-chú yí-kîn hiong ngì siên-phan, Kì oi sêu-me̍t ngì, m̀ liù pan-sà. 6Ngì-têu hói-sùn ke thi-khî oi pien-cho chhó-chhòng, táng-kô yû mu̍k-ngìn ke chhó-liàu lâu yòng-làn. 7Hàn-chhûn ke Yù-thai-ngìn voi cham-liâng ngì-têu ke thú-thi; kì-têu voi chhai ke-vi hiuk-yòng, am-pû-thèu chhai Â-sṳ̍t-kî-lùn ke vuk-tú soi-muk. Song-chú — kì-têu ke Song-ti oi khon-ku kì-têu, pûn kì-têu to-chón-lòi chhùng-chṳ́n kâ-yèn.

8Song-chú — Van-kiûn ke Ngièn-soi án-ngiòng kóng: “Ngài thâng-tó Mô-ap-ngìn ke sâu-nat, lâu Â-mùn-ngìn ke fí-pong; kì-têu sâu-nat Ngài ke chṳ́-mìn, khoâ-khiéu kóng oi pa-cham kì-têu ke thú-thi. 9Ngài he Yî-set-lie̍t yún-sên ke Song-ti; Ngài fat-sṳ: Mô-ap yit-thin voi chhiong Só-tô-mâ, Â-mùn voi chhiong Ngò-mô-lâ, chhiòn-phu pien-cho yàm-fut, yún-yén fông-fi, chha̍p-chhó mân-thi. Ngài ke-têu hàn-chhûn ke chṳ́-mìn oi chhióng kì-têu, tet-tó kì-têu ke thú-thi.”

10Mô-ap lâu Â-mùn ke ngìn voi án-ngiòng su chit-fa̍t; yîn-vi kì-têu kiêu-ngau, chhṳ-khoâ, yu vú-yu̍k Song-chú — Van-kiûn Ngièn-soi ke chṳ́-mìn. 11Song-chú voi sṳ́ kì-têu kiâng-to pi̍t-pi̍t-chhat. Kì oi chhù-thet sṳ-song só-yû ke sṳ̀n-mìn, án-ngiòng lie̍t-koet lâu hói-tó ke ngìn tak-sà chhiu voi chhai chhṳ-kâ ke thi-fông kin-pai Kì.

12Song-chú ya oi chhṳ̀-thet Kú-sṳ̍t-ngìn.

13Song-chú oi chhûn-sú kûng-tá pet-fông, sêu-me̍t Â-sut; Kì oi sṳ́ Nì-nì-mì-sàng pien-cho fông-liòng, chhiong tông-châu ke khóng-yâ. 14Nì-nì-mì voi sàng-cho ngiù-yòng lâu kok-chúng chéu-chhu hiet-khun ke só-chhai; meu-thèu-tiâu voi chhai lan-vuk tú ke chhû-thèu cho-teu, chhai chhûng-mùn héu ku-ku-kún; vû-â ya chhai fái mùn-ton chhièn lon-chhàu; hiông-pak-su liòng-chhû lu chhut-lòi#2:14 Pún-chiet chhai Hî-pak-lòi-vùn yi-sṳ mò chhîn-chhú.. 15Liá yit-chhiet voi fat-sên chhai liá ke sàng, yîn-vi kì khoâ-khiéu chhṳ-kâ ke nèn-li̍t, láu-tó chhṳ-kâ chui ôn-chhiòn, tui chhṳ-kâ kóng: “Ngài he sṳ-song chui ví-thai ke sàng.” Chúng-he, kì oi pien-cho fông-liòng, pien-cho chéu-chhu hiet-khun ke só-chhai; tak-ke ko-lu-ngìn chṳ́-chṳ́ tiám-tiám sâu-nat kì.

Currently Selected:

Sî-fân-ngâ Sû 2: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)