Fî-li̍p-pí Sû 1

1Kî-tuk Yâ-sû ke phu̍k-ngìn Pó-lò lâu Thì-mô-thai siá sin-é pûn he̍t chhai Fî-li̍p-pí ke Song-ti ke chṳ́-mìn, chhiu-he su̍k Kî-tuk Yâ-sû ke chung sṳn-thù, pin ke-têu kam-tuk lâu chṳp-sṳ.

2Ngien ngài-têu ke Â-pâ Song-ti lâu Chú Yâ-sû Kî-tuk su ên-tién, phìn-ôn pûn ngì-têu!

Pó-lò Vi Sû-sin-ngìn Khì-tó

3Tak-pái sióng-tó ngì-têu, ngài chhiu kám-chhia ngài ke Song-ti, 4tak-pái vi ngì thai-kâ khì-tó, ngài chhiu mân-sîm fôn-hí; 5yîn-vi tui thèu-yit-ngit to liá-ha, ngì-têu yit-chhṳ̍t chhai chhòn fuk-yîm ke kûng-chok-song pông-chhu ngài. 6Ngài chhṳ̂m-sin, chhai ngì-têu chûng-kiên sṳ́ liá án chiâng ke kûng-chok khôi-sṳ́ ke Song-ti, yit-thin voi sṳ́ liá-ke kûng-chok ki-siu̍k hâ-hi, chhṳ̍t-to Kî-tuk Yâ-sû chai-lòi ke-ngit tet-tó vàn-sṳ̀n. 7Ngì-têu thai-kâ sòng-sòng chhai ngài ke sîm-kôn tî-poi! Ngài sióng-ngiam ngì-têu he tông-yèn ke sṳ; yîn-vi,#1:7 “Ngì-têu thai-kâ ... yîn-vi,” ya-he yi̍t-cho “Ngài sióng-ngiam ngì-têu thai-kâ he tông-yèn ke sṳ, yîn-vi ngì-têu koân-sîm ngài;”. mò-lun he liá-ha ngài chhai kâm-ngiu̍k tú, ya-he thèu-pái ngài chhṳ-chhṳ yù-yù vi fuk-yîm phien-fu lâu cho-chṳn ke-sṳ̀, ngì-têu lûng-chúng yû-fun chhai Song-ti só su pûn ngài ke ên-tién. 8Song-ti cho-tet vi ngài cho-chṳn: Chhiong Kî-tuk Yâ-sû thung-siak ngì-têu, ngài chhṳ̂m-chhṳ̂m sióng-ngiam ngì-têu thai-kâ ke sîm-chhìn ya he khiung-yong!

9Ngài só khì-tó ke chhiu-he ngì-têu ke oi-sîm voi yit-chhṳ̍t thùng chṳ̂n ke chṳ-sṳt lâu phan-ton ke nèn-li̍t khiung-ha chóng-chin, 10pûn ngì-têu yû fap-thu sién-tó ke chui-hó ke. Án-ngiòng, ngì-têu voi cho sùn-kiet mò hó hiàm ke ngìn, chhṳ̍t-to Kî-tuk chai-lòi ke-ngit. 11Ngì-têu ke sên-fa̍t voi chhûng-mân thûng-ko Yâ-sû Kî-tuk chang khó-nèn kiet ke yìn-ngi ke kó-chṳ́, lòi yùng-kông chan-mî Song-ti.

Vi Kî-tuk Lòi Sâng

12Hiûng-thi chí-moi â, ngài oi ngì-têu tî, ngài só tù-tó ke sṳ fán-chón chhiuk-sṳ̀n fuk-yîm ke khok-chán. 13Kiet-kó, vòng-kiûng kín-ví-chhui chhiòn-thí, lâu chhai liá-vi só-yû khì-thâ ke ngìn, lûng-chúng tî ngài he yîn-vi Kî-tuk ke yèn-ku chhô-kâm ke. 14Ngài chhô-kâm, sa pûn thai-phu-fun ke hiûng-thi chí-moi tui Chú kien-kâ yû sin-sîm, ye̍t-fat yúng-kám chhòn-yòng Song-ti ke chṳ̂n-tho, chhiòn mò kiâng má-ke.

15Tông-yèn, yû-têu ngìn chhòn-yòng Kî-tuk he chhut-yì chhit-tu lâu hau-teu ke sîm-lî, chúng-he ya yû-têu he sṳ̀n-sîm sṳ̀n-yi ke. 16Liá-têu yîn-vi oi-sîm chhòn fuk-yîm ke ngìn lûng-chúng tî, Song-ti kâu-pûn ngài ke sṳ́-min chhiu-he vi fuk-yîm phien-fu. 17Khì-thâ ke ngìn chhòn Kî-tuk, thung-kî mò sùn-chṳn, he chhut-yì yâ-sîm; kì-têu sióng-oi chhai ngài chhô-kâm ke sṳ̀ chen-kâ ngài ke thung-khú. 18Chúng-he, liá yû má-ke koân-he nè? Mò-lun kì-têu ke thung-kî chho̍k ya-he m̀-chho̍k, Kî-tuk hàn-he pûn-ngìn chhòn khôi-lòi. Yîn-vi án-ngiòng, ngài chhiu chhin fôn-hí.

Ngài hàn oi ki-siu̍k fôn-hí; 19yîn-vi ngài tî, thûng-ko ngì-têu ke khì-tó lâu Yâ-sû Kî-tuk ke Lìn ke pông-chhu, ngài yit-thin voi tet-tó sṳt-fong. 20Ngài pet-chhiet hot-mu lâu phan-mong ke chhiu-he: Ngài m̀-voi khûi-fu ngài ke chit-ngim, fán-chón sṳ̀-sṳ̀ khiet-khiet, thi̍t-phe̍t he liá-ha, voi yû la-ngiak ke yúng-hi, mò-lun sâng-sí, yung ngài kûi-ke ngìn lòi yùng-kông Kî-tuk. 21Yîn-vi tui ngài lòi kóng, ngài sâng he vi-tó Kî-tuk, sí chhiu yû thai fuk-hi! 22Chúng-he, na-he ngài sâng-hâ-hi nèn kâ cho têu yû li-yit ke kûng-chok, ngài chhiu m̀-tî oi ngióng-pân kiet-thin. 23Ngài chhai lióng-nàn ke chûng-kiên: Ngài chhin oi lì-khôi liá sṳ-kiên, hi thùng Kî-tuk khiung-ha, liá he chui-hó ke sṳ; 24chúng-he vi-tó ngì-têu, ngài sâng-hâ-hi kha yeu-kín. 25Liá he ngài chhṳ̂m-sin ke, só-yî ngài tî ngài voi sâng-hâ-hi. Ngài oi thùng ngì-têu thai-kâ khiung-ha, pông-chhu ngì-têu chhai sin-ngióng-song yu chóng-chin yu khoai-lo̍k, 26án-ngiòng, ngài thùng ngì-têu chai kien-mien ke sṳ̀, ngì-têu chhai Kî-tuk Yâ-sû tî-poi ke fôn-hí chhiu voi ye̍t-fat chen-kâ#1:26 “ngì-têu chhai Kî-tuk ... chen-kâ” ya-he yi̍t-cho “ngì-têu chhai Kî-tuk Yâ-sû ke tî-poi hàn-kha voi yîn-vi ngài lòi khoâ-khiéu”..

27Chui chhung-yeu ke, ngì-têu ke sên-fa̍t oi ha̍p Kî-tuk ke fuk-yîm só yêu-khiù ke. Án-ngiòng, mò-lun ngài he chhîn-sṳ̂n hi khon ngì-têu, ya-he tui phe̍t-ngìn thâng-kóng ngì-têu ke chhìn-hìn, ngài voi tî ngì-têu yû khiung-thùng ke muk-phêu, khî-to chhai-chhai, thùng-sîm hia̍p-li̍t vi fuk-yîm ke sin-ngióng lòi tá-piang. 28Fàm-sṳ tû m̀-sṳ́ kiâng thi̍t-ngìn ke khiúng-hak; oi yúng-kám, yung án-ngiòng lòi tui kì-têu chṳn-mìn, kì-têu yit-thin voi me̍t-mòng, ngì-têu yit-thin voi tet-kiu#1:28 “me̍t-mòng ... tet-kiu” ya-he yi̍t-cho “sṳt-phai ... tet-sṳn”., yîn-vi liá he Song-ti só kiet-chhài ke. 29Ngì-têu yí-kîn tet-tó thi̍t-phe̍t ke ên-tién lòi sṳ-fung Kî-tuk, m̀ tân-chhiang oi sin kì, ya oi vi kì su-khú. 30Liá-ha, ngì-têu cho-tet thùng ngài khiung-ha chok-chan; liá chan-chên ngì-têu sṳt khon ngài tá-ko, ya thâng-kóng ngài hàn chhai liá-vi ki-siu̍k chok-chan.

Currently Selected:

Fî-li̍p-pí Sû 1: THV12Rdb

Highlight

Copy