Mìn-su Ki 11

Chhai Thâ-phi-lâ Mài-yen

1Ngìn-mìn tù-tó khun-nàn, khôi-sṳ́ mài-yen Song-chú. Song-chú thâng-tó chhiu fat-khién, kong-fó chhai kì-têu tông-chûng, sêu-thet yàng-thi ke yit-kok. 2Ngìn-mìn hiong Mô-sî ôi-khiù. Mô-sî hiong Song-chú khì-tó, fó chhiu vû-thet. 3Ke thi-fông chhiu ham-cho Thâ-phi-lâ#11:3 “Thâ-phi-lâ” yû “sêu” ke yi-sṳ., yîn-vi Song-chú ke fó sṳt sêu chhai kì-têu tông-chûng.

Mô-sî Kién-sién Chhit-sṳ̍p ke Chóng-ló

4Yû-têu ngoi-chhu̍k ngìn lâu Yî-set-lie̍t-ngìn khiung-ha hàng; kì-têu tông-sióng sṳ̍t-ngiuk. Yî-set-lie̍t-ngìn ya khôi-sṳ́ kín kieu mài-yen kóng: “Ngài-têu na-he yû-ngiuk hó-sṳ̍t m̀-tî kí-hó nè! 5Chhai Âi-khi̍p ke sṳ̀, ngài-têu sòng-sòng sṳ̍t ǹg-è, ya m̀-sṳ́ yung-chhièn hi-mâi. Ki-tet vòng-koâ, sî-koâ, kiú-chhoi, yòng-chhûng, thai-son án-tô hó-sṳ̍t ke tûng-sî. 6Liá-ha ngài-têu mò pan-tiám ngièn-hi, yîn-vi tak-ngit chhù-liáu liá mâ-nâ yî-ngoi, má-ke tûng-sî me mò hó-sṳ̍t!”

7(Mâ-nâ ke yong-é chhiong yèn-sûi-é, set chhiong chṳ̂n-chû, 8-9tak am-pû lâu lu-súi khiung-ha lo̍k chhai yàng-thi. Thi-ngi ngit tá-chó, ngìn-mìn chhut-hi ngiâm, chiông kì nò-sui ya-he chûng-sui pien-cho fún, yèn-heu yung vo̍k-thèu chiên-cho piáng. Kì ke mi-tho chhiong kiâu kám-lám-yù phoi ke piáng.)

10Mô-sî thâng-tó ngìn-mìn kûi-khiùn khî chhai kì-têu ke chong-phùng mùn-héu kín kieu yu mài-yen. Song-chú tui ngìn-mìn fat-khién; Mô-sî sîm-tú chhiu tông kân-khú. 11Mô-sî tui Song-chú kóng: “Ngì cho-má-ke án-ngiòng vì-nàn Ngì ke phu̍k-ngìn? Cho-má-ke án-ngiòng mò fôn-hí ngài? Cho-má-ke oi ngài thu liá-têu ngìn fu án-chhûng ke chit-ngim? 12Kì-têu kám he ngài chho ke ya-he kiung ke? Cho-má-ke Ngì oi ngài cho nen-ôi, chiông kì-têu chhiong ô-nga-é án-ngiòng nám chhai hiûng-chhièn, yit-chhṳ̍t nám-to Ngì yin-hí pûn kì-têu chú-siên ke thú-thi nè? 13Ngài oi hi nai-vi chhìm ngiuk pûn liá án-tô ngìn sṳ̍t nè? Kì-têu yit-chhṳ̍t kín kieu yu mài-yen, oi ngài pûn kì-têu sṳ̍t-ngiuk! 14Kón-lî liá-têu ngìn ke chit-ngim thet-chhûng, ngài yit-sà khâi m̀-yàng! 15Na-he Ngì oi án-ngiòng tui-thai ngài, khiù Ngì khó-lièn ngài, ngiàm-sṳ̀ chiông ngài chhṳ̀-thet, sṳ́ ngài m̀-sṳ́ chai ki-siu̍k mien-tui án-ngiòng ke kiên-nàn.”

16Song-chú tui Mô-sî kóng: “Ngì oi seu-si̍p chhit-sṳ̍p ke su-ngìn chûn-kin ke chóng-ló, chiông kì-têu tai-to Ngài liá-vi lòi, lâu ngì khiung-ha khî chhai sṳn-chong-phùng sùn-thèu. 17Ngài oi hâ-lòi, chhai ke-vi tui ngì kóng-fa. Ngài oi chiông su-pûn ngì ke Lìn pûn-pûn kì-têu, kì-têu chhiu-nèn fûn-tâm ngì ke chit-ngim; ngì chhiu m̀-sṳ́ yit-sà khâi liá chhûng-tâm. 18Ngì oi fûn-fu ngìn-mìn, kóng: ‘Thai-kâ oi kiet-chhiang chhṳ-kâ, thiên-kông-ngit ngì-têu voi yû-ngiuk hó-sṳ̍t. Song-chú sṳt thâng-tó ngì-têu kín kieu mài-yen kóng: Ngài-têu sióng-oi sṳ̍t-ngiuk, ngài-têu kám-kok chhai Âi-khi̍p kha-hó. Só-yî, Song-chú chhiu oi pûn ngì-têu yû ngiuk hó-sṳ̍t lé. 19Ngì-têu m̀ tân-chhiang voi sṳ̍t yit-ngit, lióng-ngit, ńg-ngit, sṳ̍p-ngit, sṳm-chṳ ngi-sṳ̍p ngit. 20Ngì-têu voi sṳ̍t yit-chak ngie̍t, chhṳ̍t-to ngiuk tui ngì-têu ke phi-khûng phun chhut-lòi, sṳ́ ngì-têu sṳ̍t-to vi-kôi. Liá-khien sṳ yit-thin voi fat-sên; yîn-vi ngì-têu vok-thet chhai ngì-têu tông-chûng ke Song-chú, chhai Kì ke mien-chhièn kín kieu mài-yen kóng: Ngài-têu cho-má-ke lì-khôi Âi-khi̍p nè!’ ”

21Mô-sî tui Song-chú kóng: “Ngài thu ke nàm-ngìn chhiu-yû liuk-sṳ̍p van án-tô, Ngì ngióng-voi kóng Ngì oi pûn kì-têu sṳ̍t-ngiuk, sṳ́ kì-têu cho-tet sṳ̍t kûi-chak ngie̍t? 22Nai-yû án-tô ke ngiù-yòng hó chhṳ̀ lòi mân-chiuk kì-têu? Hói-tú só-yû ke ǹg-è kiâng-pha ya m̀-la kì-têu sṳ̍t nè!”

23Song-chú tui Mô-sî kóng: “Ngài ke nèn-li̍t kám yû han-chṳ mâ? Ngì liá-ha chhiu voi khon-tó Ngài kóng ke fa he m̀-he voi sṳ̍t-hien!”

24Só-yî Mô-sî chhut-hi, chiông Song-chú só kóng ke fa lâu ngìn-mìn kóng. Kì seu-si̍p chhit-sṳ̍p ke chóng-ló, ham kì-têu khî chhai sṳn-chong-phùng si chû-vì. 25Song-chú chhai yùn tông-chûng kong hâ-lòi, tui Mô-sî kóng-fa, chiông su-pûn Mô-sî ke Lìn pûn-pûn ke chhit-sṳ̍p ke chóng-ló. Lìn kong chhai kì-têu sṳ̂n-song ke sṳ̀, kì-têu chhiòn-phu chhiong siên-tî án-ngiòng su-kám kóng-fa, chúng-he yî-heu mò chai kóng.

26Khì-chûng yû lióng-ke chóng-ló Yî-li-tha̍t lâu Mí-tha̍t hàn liù chhai yàng-tú, mò to sṳn-chong-phùng ke-vi hi. Chhai yàng-tú, Lìn kong chhai kì-têu sṳ̂n-song, kì-têu ya chhiong siên-tî án-ngiòng su-kám kóng-fa. 27Yû yit-ke chhiâng-ngièn chéu-hi kien Mô-sî, chiông Yî-li-tha̍t lâu Mí-tha̍t chhai yàng-tú só-cho ke sṳ hiong kì po-ko.

28Nun ke lai-é Yok-sû-â tui heu-sâng ke sṳ̀ chhiu-he Mô-sî ke chhu-sú; liá-sṳ̀, Yok-sû-â tui Mô-sî kóng: “Mô-sî thai-ngìn â, chhiáng ngì hi chú-tóng kì-têu.”

29Mô-sî en-kóng: “Ngì vi-tó ngài ke yèn-ku lòi chhit-tu he-mò? Ngài hî-mong Song-chú chiông Kì ke Lìn su-pûn Kì só-yû ke chṳ́-mìn, sṳ́ kì-têu chhiòn-phu chhiong siên-tî án-ngiòng kóng-fa!” 30Yèn-heu, Mô-sî lâu Yî-set-lie̍t ke chhit-sṳ̍p ke chóng-ló chhiòn-phu chón-to yàng-tú hi.

Song-chú Kong-hâ Êm-thùn

31Fut-yèn-kiên, Song-chú sṳ́ fûng chhôi-hí, kûi-khiùn ke êm-thùn tui hói-song pî-lòi, lì thi-mien chṳ́-yû yit kûng-chhak kô. Kì-têu thìn chhai yàng-thi lâu si chû-vì, tak só-chhai chhiòn-phu yû, tûng-sî nàm-pet, lièn-tén kí kûng-lî#11:31 “lì thi-mien ... kí kûng-lî” ya-he yi̍t-cho “kì-têu thìn chhai yàng-thi lâu si chû-vì, tak só-chhai chhiòn-phu yû, tûng-sî nàm-pet, lièn-tén kí kûng-lî, kì-têu ye̍t tôi ye̍t-kô, yit-chhṳ̍t tôi-to yû yit kûng-chhak kô”.. 32Ngìn-mìn kûi-ngit kûi-ya chok êm-thùn; thi-ngi ngit ya kûi-ngit chok, tak-sà chui-séu chok-tó yit-chhiên kûng-kîn. Kì-têu chiông êm-thùn pài chhai yàng-thi si chû-vì sai-kôn. 33Kì-têu ngà-chhṳ́ hàn chheu-tén ngiuk ke sṳ̀, Song-chú hiong ngìn-mìn thai fat-khién, sṳ́ kì-têu pot-vûn, hoi-sí kì-têu. 34Ke thi-fông chhiu ham-cho Kî-pok-lò-Ha̍p-thâ-ngá#11:34 “Kî-pok-lò-Ha̍p-thâ-ngá” yi-sṳ he “thâm-yu̍k ke fùn-mu”., yîn-vi kì-têu chhai ke-vi mài-chong thâm-sṳ̍t ke ngìn.

35Tui Kî-pok-lò-Ha̍p-thâ-ngá, ngìn-mìn sái-to Ha̍p-sé-liu̍k, chhai ke-vi ôn-yàng.

Currently Selected:

Mìn-su Ki 11: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)