Mì-kâ Sû 5

1Yâ-lu-sat-lâng ke kiûn-chhui â, oi thòn-kiet hí-lòi! Ngài-têu pûn-ngìn pâu-vì! Thi̍t-ngìn yung chhóng-è tá Yî-set-lie̍t liâng-chhiu ke choi-kok.

Tui Pak-li-hèn Lòi ke Thúng-chhṳ-chá

2Song-chú kóng: “Yî-fap-thâ thi-khî ke Pak-li-hèn â, chhai Yù-thai liá-têu sàng-chûng, ngì he yit-ke se-sàng. Chúng-he Ngài oi tui ngì ke-vi, vi Yî-set-lie̍t sién-li̍p yit-ke liâng-chhiu; kì ke kâ-ne tui thai-chhû chhiu-yû.”

3Só-yî, Song-chú oi chiông Kì ke chṳ́-mìn kâu-pûn kì-têu ke thi̍t-ngìn, chhṳ̍t-to ke chhâ-m̀-tô voi sên-sán ke fu-ngìn-kâ kiung lai-é. Yèn-heu, kì ke thùng-pâu oi tui pûn-ngìn chok-hi ke só-chhai chón-to Yî-set-lie̍t-ngìn ke-vi. 4Kì oi hong-hí-lòi, oi chhiong mu̍k-ngìn cheu-ku yòng-khiùn án-ngiòng; kì oi yung Song-chú só-su ke thai-nèn, fung Song-chú — kì Song-ti sṳn-miàng ke vî-ngiàm lòi thúng-chhṳ kì ke chṳ́-mìn. Kì-têu oi hióng-su thai-phìn, yîn-vi ke-sṳ̀ chhiòn sṳ-kie ke ngìn chhiòn-phu voi sṳ̀n-ngin kì ke ví-thai. 5Kì oi tai-lòi fò-phìn.

Kié-kiu lâu Chit-fa̍t

Â-sut-ngìn chhîm-cham ngài-têu ke thú-thi, kûng-pho ngài-têu sàng-pó ke sṳ̀, ngài-têu oi phai chhin-tô chui-khiòng ke thai-chiong lâu kì-têu siông-chhṳ̀. 6Liá-têu thai-chiong voi yung vú-li̍t cham-liâng Â-sut — Nèn-liu̍k ke thi. Tông Â-sut-ngìn chhîm-lio̍k ngài-têu koet-kâ ke sṳ̀, kì#5:6 “kì”: Chṳ́ 5:2-5 ke “liâng-chhiu”. voi kiu ngài-têu.

7Chhai van-mìn chûng, hàn-chhûn ke ke-têu Yî-set-lie̍t-ngìn chhiong-he Song-chú kong hâ-lòi ke lu-súi, chhiong chṳ̂-yun chhó-muk ke kâm-lìm. Kì-têu yí-kho Song-ti, m̀ yí-kho ngìn. 8Chhai lie̍t-koet chûng, Yî-set-lie̍t hàn-chhûn ke ngìn chhiong-he hiùng-sṳ̂ chhai su-lìm ke pak-chhu chûng, chhiong-he se sṳ̂-é chhong-ngi̍p yòng-khiùn chûng, hi chhá-lie̍t thûn-sṳ̍t, má-ngìn ya mò fap-thu tí-tóng. 9Yî-set-lie̍t oi chṳ̂n-fu̍k thi̍t-ngìn, vàn-chhiòn fí-me̍t kì-têu.

10Song-chú kóng: “Ke-sṳ̀, Ngài oi me̍t-thet ngì-têu ke pîn-mâ, tá-fái ngì-têu ke chan-chhâ. 11Ngài oi fí-me̍t ngì-têu koet-nui ke sàng-sṳ, chhak-thet só-yû ke sàng-pó. 12Ngài oi sêu-me̍t ngì-têu ke sià-su̍t, m̀ liù-hâ yit-ke puk-koa ke. 13Ngài oi chhù-me̍t ngì-têu só tiâu-khiet ke ngiéu-siong lâu sa̍k-chhû; ngì-têu m̀-voi chai pai chhṳ-kâ ke sú só chṳ-chho ke tûng-sî. 14Ngài oi chhak-thet ngì-têu koet-nui ke Â-sa-lâ ńg-sṳ̀n siong, fí-me̍t ngì-têu ke sàng-sṳ. 15Ngài oi thai fat-khién lòi po-fu̍k só-yû m̀ fu̍k-chhiùng Ngài ke koet-kâ.”

Currently Selected:

Mì-kâ Sû 5: THV12Rdb

Highlight

Copy