Mì-kâ Sû 1

1Chhai Yok-thán, Â-ha̍p-sṳ̂, Hî-sî-kâ cho Yù-thai-vòng ke khì-kiên, Song-chú hiong Mô-li-sâ-ngìn Mì-kâ khí-sṳ yû-koân Sat-mâ-li-â lâu Yâ-lu-sat-lâng ke sṳ. Hâ-poi ke ki-chai he Song-chú lâu Mì-kâ kóng ke fa.

Sat-mâ-li-â lâu Yâ-lu-sat-lâng ke Ôi-kô

2Lie̍t-koet â, ngì-têu chhiòn-phu oi thâng!

Sṳ-kiên-ngìn nâ, ngì-têu oi chu-yi thâng!

Chṳ-kô ke Song-chú oi ko ngì-têu;

Chú oi tui thiên-thìn cho-chṳn.

3Khon nâ, Song-chú tui thiên-thìn hàng chhut-lòi;

Kì oi kong-lìm chhai thi-song, kiok tha̍p chhai ke-têu sân-táng.

4Khiùn-sân chhai Kì kiok-hâ pên-thet, chhiu-chhiong la̍p pûn fó yùng-thet;

ngàm-sa̍k pien-cho thú-sa̍k-liù, chhîn-chhiong thai-súi chhûng-ngi̍p hâi-tú.

5Liá-têu sṳ yit-thin voi fat-sên, yîn-vi Yî-set-lie̍t-ngìn phoi-ngia̍k Song-ti, tet-chhui Kì. Má-ngìn yin-kôi vi Yî-set-lie̍t ke phoi-ngia̍k su chit-fa̍t nè? Sú-tû Sat-mâ-li-â yin-kôi sṳ̀n-tâm! Má-ngìn yin-kôi vi Yù-thai pai ngiéu-siong ke chhui fu-chit nè? Sú-tû Yâ-lu-sat-lâng yin-kôi fu-chit! 6Só-yî Song-chú kóng: “Ngài oi sṳ́ Sat-mâ-li-â sàng-cho lá-sap-tôi, sàng-cho chung phù-thò ke só-chhai. Ngài oi chiông kì ke sàng-chhiòng súng-lo̍k sân-lak, lu-chhut kì ke thi-kî. 7Sàng-tú só-yû ke ngiéu-siong chhiòn-phu voi pûn-ngìn khau-to sui-sui; thûng-ko sṳ̀n-ńg só-tet ke chhòi-vu̍t chhiòn-phu voi pûn-ngìn sêu-thet; Ngài oi sṳ́ só-yû ke ngiéu-siong sàng-cho fi-vu̍t. Sat-mâ-li-â chhiong chhông-kî sû-si̍p liá-têu ngiéu-siong chún-cho fàn-chhṳ̍t ke sṳ̀n-mìn, chui-heu kì-têu voi pûn thi̍t-ngìn chhióng-chéu, tai-pûn phe̍t-ke só-chhai ke chhông-kî hi-pai.”

8Só-yî Mì-kâ kóng: “Ngài oi vi liá-sṳ sông-sîm thai-kieu; ngài oi chhak-sṳ̂n lu-thí, tá chhak-kiok, hàng-lòi hàng-hi; ngài oi chhiong yâ-kiéu chhut-sâng, chhiong thò-niâu kín-kieu. 9Sat-mâ-li-â ke chho̍k-sông yî m̀-tó lé; Yù-thai ke sông ya m̀-voi hó lé. Châi-nan pet-khiûn Yâ-lu-sat-lâng sàng-mùn, voi to ngài thùng-pâu ke kâ-yèn.”

Thi̍t-ngìn Pet-khiûn Yâ-lu-sat-lâng

10M̀-hó chhai Kâ-thi̍t siên-pu ngì-têu yí-kîn chan-phai; m̀-hó pûn thi̍t-ngìn khon-tó ngì-têu sông-sîm liù muk-chṳp. Pak-Â-fut-lâ#1:10-15 Liá-thon ke thi-miàng he thi̍t-kiûn voi siên cham-liâng, lòi kûng-kit Yâ-lu-sat-lâng sî-phién ke hiông-chṳ́n. ke ngìn-mìn â, sông-sîm to chhai thi-song kín-chan! 11Sâ-fî ke ngìn-mìn â, ngì-têu voi su vú-yu̍k, chhak-sṳ̂n lu-thí, liù-mòng to ngoi-koet hi! Sat-nàm ke ngìn-mìn m̀-kám chhut-lòi. Ngì-têu thâng-tó Pak-Yî-siet ke ngìn-mìn sông-sîm thai-kieu ke sṳ̀, chhiu tî sàng-tú mò phit-nan ke só-chhai. 12Mâ-li̍t ke ngìn-mìn fî-sòng thung-khú, chhin hî-mong yû phan-fap kié-kiet, yîn-vi Song-chú yí-kîn chiông châi-nan tai-to Yâ-lu-sat-lâng ke sàng-mùn lé! 13Lâ-kit ke ngìn-mìn â, ngì-têu oi khiên voi chéu ke mâ-é lòi lâi chan-chhâ, chún-phi thò-nan! Yîn-vi Siak-ôn chṳ́-mìn ke chhui tui ngì khôi-sṳ́; Yî-set-lie̍t ke fái hàng-vì chhai ngì ke-vi chhiòn-phu chhìm-tó lé. 14Só-yî, Yù-thai ke ngìn â, ngì-têu oi ko-phe̍t Mô-li-sâ-Kâ-thi̍t-sàng. Yî-set-lie̍t ke-têu vòng chhie̍t-tui m̀-voi tui Â-kiet-sit tet-tó pông-chhu.

15Mâ-li-sâ ke ngìn-mìn â, Song-chú oi chiông ngì-têu kâu-pûn chṳ̂n-fu̍k-chá; Yî-set-lie̍t ke kui-chhu̍k oi chéu-to Â-thu-làn sân-lùng phit-nan. 16Yù-thai ke ngìn â, oi thi-kông-thèu, vi ngì-têu só-oi ke chṳ́-ńg pî-sông; oi thi-to chhiong thut-ên ke thèu án-kông, yîn-vi kì-têu voi pûn-ngìn chok-to ngoi-koet hi.

Currently Selected:

Mì-kâ Sû 1: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)