Li-vi Ki 19

Yû-koân Sṳn-kiet lâu Chṳn-ngi ke Kie-min

1Song-chú fûn-fu Mô-sî 2hiong Yî-set-lie̍t chhiòn fi-chung siên-pu: “Ngì-têu oi sṳn-kiet, yîn-vi Ngài — Song-chú, ngì-têu ke Song-ti he sṳn-kiet ke.

3“Ngì-têu tak-sà yit-thin oi chûn-sú Ngài ke kie-min, hau-sun fu-mû, sú ôn-sit-ngit. Ngài he Song-chú — ngì-têu ke Song-ti.

4“Ngì-têu cho-m̀-tet lì-khôi Ngài hi pai ngiéu-siong; ya cho-m̀-tet vi chhṳ-kâ chu-chho ngiéu-siong. Ngài he Song-chú — ngì-têu ke Song-ti.

5“Ngì-têu chhṳ̀ thèu-sâng cho phìn-ôn-chi hien-pûn Ngài — Song-chú ke sṳ̀, oi cheu Ngài pân-pu pûn ngì-têu ke thiàu-li, Ngài chhiu voi chiap-su ngì-têu ke sên-ngì. 6Chi-ngiuk oi chhai fung-hien ke tông-ngit ya-he thi-ngi ngit sṳ̍t-thet. To thi-sâm ngit, chi-ngiuk na-he hàn-yû chhûn, oi yung fó sêu-thet, 7yîn-vi liá he mò chhiang-li ke. Na yû-ngìn nâ-hi sṳ̍t, Ngài chhiu m̀ chiap-su só-hien ke sên-ngì. 8Sṳ̍t ke ngìn chhiu yû-chhui, yîn-vi kì siet-thu̍k hien-pûn Ngài ke sṳn-vu̍t; kì yit-thin voi tui Ngài ke chṳ́-mìn chûng chhù-miàng.

9“Ngì-têu sû-kot ke sṳ̀, m̀-hó chiông thièn-kok kot chhiang-chhiang, ya m̀-hó hi-ngiâm tiet hâ-lòi ke kuk-chhon. 10Cho-m̀-tet chiông phù-thò-yèn ke phù-thò chak chhiang-chhiang, ya cho-m̀-tet ngiâm tiet hâ-lòi ke phù-thò; oi chiông liá-têu liù-pûn khiùng-khú ngìn lâu chhiam-he̍t ke lî-hak. Ngài he Song-chú — ngì-têu ke Song-ti.

11“Cho-m̀-tet cho-chhe̍t; cho-m̀-tet khî-phien; cho-m̀-tet kóng fâ-liâu. 12Cho-m̀-tet chṳ́-tén Ngài ke miàng fat ká-sṳ, vú-yu̍k Ngài ke miàng. Ngài he Song-chú — ngì-têu ke Song-ti.

13“Cho-m̀-tet pok-siok lìn-sa, ya cho-m̀-tet chhióng kì ke tûng-sî. Oi fu-pûn kûng-ngìn ke kûng-chhièn cho-m̀-tet thô, chhiu-son yit am-pû ya cho-m̀-tet.

14“Cho-m̀-tet chu-ma ngí-lûng ke, ya cho-m̀-tet chú-ngoi mô-muk ke lu, sṳ́ kì tiet-tó. Ngì-têu oi kin-vi Ngài; Ngài he Song-chú — ngì-têu ke Song-ti.

15“Ngì-têu sṳ́m-phan ke sṳ̀-chiet, cho-m̀-tet mò kûng-tong; cho-m̀-tet phiên-sîm tui-thai khiùng-khú ngìn, ya cho-m̀-tet pâ-kiet yû khièn-sṳ ke ngìn. Oi yung kûng-chṳn tui-thai thùng-pâu. 16Cho-m̀-tet to-chhu hi pân-nung sṳ-fî; cho-m̀-tet hoi lìn-sa ke sâng-miang. Ngài he Song-chú.

17“Cho-m̀-tet sîm-tú yen-hen hiûng-thi; thùng-pâu yû m̀-chho̍k, ngì oi thán-pha̍k chṳ́-chit kì, miên-tet ngì yîn-vi kì lòi tâm-tó chhui. 18Cho-m̀-tet po-sù; ya cho-m̀-tet koai-yen pún-koet ke thùng-pâu. Oi siak lìn-sa, chhiu-chhiong siak chhṳ-kâ yit-yong. Ngài he Song-chú.

19“Ngì-têu oi chûn-sú Ngài ke kie-min.

“Cho-m̀-tet sṳ́ mò khiung-lui ke thèu-sâng phi-chúng. Cho-m̀-tet chhai yit-khiû thièn ve lióng-yong chúng. Cho-m̀-tet chok lióng-chúng ngièn-liau chhiak-sṳ̀n ke sâm-fu.

20“Yí-kîn lâu phe̍t-ngìn yû fûn-yok ke nù-pî, hàn-màng pûn-ngìn su̍k chón-hi, hàn-màng chhṳ-yù ke sṳ̀, na-he yû ngìn lâu kì yû sin koân-he, ke-ngìn oi su chhú-fa̍t#19:20 “oi su chhú-fa̍t” ya-he yi̍t-cho “oi su thiàu-chhà”.; chúng-he m̀-hó chiông lióng-sà chhú-sí, yîn-vi ke-sṳ̀ nù-pî hàn-màng tet-tó chhṳ-yù. 21Ke-ngìn oi khiên yit-chak mièn-yòng-kú to sṳn-chong-phùng mùn-héu cho su̍k-ko-sṳt-chi hien-pûn Song-chú. 22Chi-sṳ̂ oi yung ke-chak yòng chhai Song-chú mien-chhièn thoi kì hàng su̍k-chhui-lî, Song-chú chang voi sa-miên kì só fam ke chhui.

23“Ngì-têu chin-ngi̍p Kâ-nàm-thi yî-heu, mò-lun chung nai-chúng kó-chṳ́-su, thèu sâm-ngièn ke kó-chṳ́ oi khon-cho su kim-chṳ́ ke, ngì-têu cho-m̀-tet sṳ̍t. 24Thi-si ngièn tá ke kó-chṳ́ oi chhiòn-phu fung-hien pûn Song-chú cho sṳn-vu̍t, péu-sṳ ngì-têu tui Ngài ke kám-ên. 25To thi-ńg ngièn, ngì-têu chhiu cho-tet sṳ̍t ke su-táng ke kó-chṳ́. Ngì-têu án-ngiòng cho, kó-chṳ́-su chhiu voi kiet-chhut ko-kha tô ke kó-chṳ́. Ngài he Song-chú — ngì-têu ke Song-ti.

26“Ngì-têu cho-m̀-tet sṳ̍t tai-hiet ke ngiuk.

“Cho-m̀-tet puk-koa, ya cho-m̀-tet son-miang.

27“Cho-m̀-tet thi-thet thèu-nà chû-vì ke thèu-nà-mô, ya cho-m̀-tet chiông fù-sî ke chû-vì thi-thet. 28Vi sí-ngìn ôi-sông ke sṳ̀, cho-m̀-tet vùn-sṳ̂n, ya-he kot chhṳ-kâ ke sṳ̂n-thí. Ngài he Song-chú.

29“Ngì-têu cho-m̀-tet pûn chhṳ-kâ ke moi-é su vú-yu̍k hi-cho sṳ̀n-meu chhông-kî. Na-he án-ngiòng cho, ngì-têu voi chón-hiong phe̍t ke sṳ̀n-mìn, sṳ́ ngì-têu he̍t ke thi-fông chhûng-mân yìm-lon.

30“Ngì-têu oi sú Ngài ke ôn-sit-ngit, chûn-chhung Ngài ke sṳn-só. Ngài he Song-chú.

31“Ngì-têu cho-m̀-tet hi kâu-kúi, ya cho-m̀-tet hi mun hàng sià-su̍t ke; na-he khiù-mun kì-têu, ngì-têu chhiu pien-cho mò chhiang-li. Ngài he Song-chú — ngì-têu ke Song-ti.

32“Ngì-têu oi chûn-kin ló-ngìn-kâ, chhai pha̍k thèu-nà-mô ke ngìn mien-chhièn kiûng-kin khî-tén. Ngì-têu oi kin-vi Ngài; Ngài he Song-chú — ngì-têu ke Song-ti.

33“Ngì-têu cho-m̀-tet khî-fu chhiam-sṳ̀ he̍t chhai ngì-têu tông-chûng ke lî-hak. 34Khoán-thai kì-têu oi chhiong khoán-thai Yî-set-lie̍t thùng-pâu án-ngiòng, siak kì-têu oi chhiong siak chhṳ-kâ khiung-yong. Oi ki-tet ngì-têu sṳt chhai Âi-khi̍p chhiam-he̍t ko. Ngài he Song-chú — ngì-têu ke Song-ti.

35“Cho-m̀-tet yung mò kûng-phìn ke chhak, téu, chhṳn khî-phien ngìn; 36oi-yung kûng-phìn ke chhṳn, chhak, téu.

“Ngài he Song-chú — ngì-têu ke Song-ti; Ngài tui Âi-khi̍p chiông ngì-têu thu chhut-lòi. 37Ngì-têu oi chûn-sú Ngài yit-chhiet ke fap-li̍t, sṳ̍t-hàng Ngài yit-chhiet ke thiàu-li. Ngài he Song-chú.”

Currently Selected:

Li-vi Ki 19: THV12Rdb

Highlight

Copy

Compare

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)