Yok-ngí Sû 3

Song-chú oi Sṳ́m-phan Van-koet

1Song-chú kóng:

Chhai ke-ngit,

Ngài oi sṳ́ Yù-thai lâu Yâ-lu-sat-lâng chhùng-sîn tet-tó fàn-yùng.

2Ngài oi seu-si̍p van-koet van-mìn hâ-to “Sṳ́m-phan Sân-lak”;

Ngài oi yîn-vi kì-têu kâ-pûn Ngài chṳ́-mìn ke sông-hoi sṳ́m-phan kì-têu.

Kì-têu sṳt chiông Yî-set-lie̍t-ngìn fûn-san to lie̍t-koet,

fûn-kot Ngài ke thú-thi Yî-set-lie̍t.

3Kì-têu chhû-chhiâm kiet-thin,

khon má-ngìn tet-tó chok-lòi ke ngìn.

Kì-têu yung se-â-kô-é von kî-ńg,

mai se-â-moi-é hi mâi-chiú lîm.

4“Thai-ngì, Sî-tun, lâu Fî-li-sṳ tak só-chhai ke ngìn â, ngì-têu sióng-oi hiong Ngài po-fu̍k he-mò? Na-he sióng, Ngài tông-kiak chhiu voi hiong ngì-têu po-fu̍k. 5Ngì-têu chhióng Ngài ke kîm-ngiùn, chhióng Ngài ke chhòi-pó, chiông kì-têu piong chhai ngì-têu ke sṳ̀n-meu tú. 6Ngì-têu chiông Yù-thai lâu Yâ-lu-sat-lâng ke ngìn-mìn mai-pûn Hî-lia̍p-ngìn, sṳ́ kì-têu yén-lì chhṳ-kâ ke kâ-hiông. 7Ngài ngiàm-sṳ̀ oi chiông kì-têu tui ngì-têu mai hi ke só-chhai tai chón-lòi. Ngài oi cheu ngì-têu khoán-thai kì-têu ke fông-fap tui-fu ngì-têu. 8Ngài oi chiông ngì-têu ke chṳ́-ńg mai pûn Yù-thai-ngìn; kì-têu voi chiông ngì-têu ke chṳ́-ńg chón-mai pûn yén-fông ke Sṳ-pâ-ngìn. Ngài he Song-chú; Ngài án-ngiòng siên-pu lé.”

9Ngì-têu oi chhai van-koet chûng siên-pu:

Chún-phi siông-chhṳ̀!

Seu-si̍p chan-sṳ!

Si̍p-ha̍p só-yû ke kiûn-pîn chhièn-chin!

10Oi chiông lài-thèu tá-cho tô-kiam;

chiông liàm-è tá-cho chhiông.

Kha ngiôn-ngio̍k ke ngìn ya oi cho yúng-sṳ chhut-chhṳn.

11Si-vì ke lie̍t-koet â, kiak-kiak lòi!

Si̍p-ha̍p chhai sân-lak chûng.

Song-chú â, khiù Ngì phai Ngì ke kiûn-chhui kûng-tá kì-têu!

12Van-koet oi chún-phi hó,

to “Sṳ́m-phan Sân-lak” lòi.

Ngài — Song-chú oi chhô chhai ke-vi,

sṳ́m-phan si-vì ke lie̍t-koet.

13Kì-têu chhui-thai ok-khi̍t;

só-yî, oi chám-sí kì-têu,

chhiong sû-kot ńg-kuk án-ngiòng.

Oi tha̍p-mièn kì-têu,

chhiong phù-thò chhai chiú-chhò pûn-ngìn tha̍p-mièn,

chhṳ̍t-to chiú-chhò nêm chhut-lòi.

14Chhiên-chhiên van-van ke ngìn chhi-si̍p chhai “Sṳ́m-phan Sân-lak”;

yîn-vi Song-chú sṳ́m-phan ke ngit-è chhiu oi chhai ke-vi lìm-to.

15Ngit-ngie̍t mò kông,

sên-sṳ̀n vû-am.

Song-chú oi Su-fuk pûn Kì ke Chṳ́-mìn

16Song-chú tui Siak-ôn chhiong sṳ̂-é ho-ho-kún,

tui Yâ-lu-sat-lâng chhiong lùi-kûng lung-lung-kún.

Thiên lâu thi chhiòn-phu pi̍t-pi̍t-chhat,

chúng-he Song-chú oi pó-fu Kì ke chṳ́-mìn,

cho Yî-set-lie̍t-ngìn ke phit-nan-só.

17Song-chú kóng:

Ke-sṳ̀ ngì-têu chhiu voi tî Ngài he Song-chú — ngì-têu ke Song-ti.

Ngài he̍t chhai Ngài ke sṳn-sân Siak-ôn;

Yâ-lu-sat-lâng voi sàng-cho sṳn-sàng,

ngoi-chhu̍k-ngìn yún-yén m̀-voi chai cham-liâng kì.

18To ke-sṳ̀, thai-sân voi tit-chiú, se-sân liù-nen;

Yù-thai ke hâi-súi voi liù mò-thìn.

Yû chhièn-súi oi tui Song-chú ke sṳn-thien liù chhut-lòi,

yim-to Sṳ̍p-thìn sân-lak.

19Âi-khi̍p voi sàng-cho fông-thi;

Yî-tûng voi sàng-cho khóng-yâ.

Yîn-vi kì-têu sṳt yung khiòng-phau tui-fu Yù-thai,

liù mò-chhui ngìn ke hiet.

20-21Ngài oi vi su-hoi ke ngìn po-sù#3:20-21 “po-sù” he kîn-kí yit-têu kú yi̍t-pún, Hî-pak-lòi-vùn he “siên-pu mò-chhui”.;

Ngài chhie̍t-tui m̀-voi piong-ko ke-têu hiûng-fam.

Chúng-he Yù-thai yún-yén voi yû-ngìn he̍t,

Yâ-lu-sat-lâng voi thoi-thoi siông-chhòn.

Ngài — Song-chú oi he̍t chhai Siak-ôn-sân.

Currently Selected:

Yok-ngí Sû 3: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)