Chhóng-sṳ Ki 46

Ngâ-kok ke Kâ-chhu̍k Sái-to Âi-khi̍p

1Yî-set-lie̍t tai-tén kì só-yû ke yit-chhiet lòi-to Phe̍t-sṳ-pâ; kì chhai ke-vi hiong kiâ-pâ Yî-sat ke Song-ti hien-chi. 2Ke am-pû, chhai yi-siong chûng Song-ti lâu Yî-set-lie̍t kóng-fa. Song-ti ham kì: “Ngâ-kok! Ngâ-kok!”

Kì en-kóng: “Ngài chhai liá-vi!”

3Song-ti kóng: “Ngài he Song-ti, he ngiâ-pâ ke Song-ti. Ngì m̀-sṳ́ kiâng! Cho-ngì hi Âi-khi̍p, yîn-vi Ngài oi pûn ngì ke heu-thoi chhai ke-vi sàng-cho thai-koet. 4Ngài oi lâu ngì khiung-ha to Âi-khi̍p hi, ya oi tai ngì ke heu-thoi chón-lòi liá thi-fông. Ngì ko-sṳ̂n ke sṳ̀, Yok-sit voi chhai ngì sṳ̂n-piên fu̍k-sṳ.”

5Ngâ-kok tui Phe̍t-sṳ-pâ chhut-fat. Yî-set-lie̍t ke-têu lai-é pûn kì-têu ke â-pâ Ngâ-kok lâu kì-têu ke pû-ngiòng, chṳ́-ńg chhiòn-phu chhô chhai Âi-khi̍p-vòng vi Ngâ-kok phai-lòi ke chhâ-táng. 6Kì-têu yu tai-tén chhai Kâ-nàm só tet-tó ke thèu-sâng lâu chhòi-sán to Âi-khi̍p hi. Án-ngiòng, Ngâ-kok tai-liâng só-yû ke chṳ́-sûn hi-to Âi-khi̍p, 7kì ke lai-é, moi-é, sûn-é, sûn-ńg, só-yû ke heu-thoi lûng-chúng khiung-ha hi.

8Lâu Ngâ-kok khiung-ha to Âi-khi̍p ke Yî-set-lie̍t ngìn, miàng-tân chhai hâ-poi:

Ngâ-kok ke chóng-chṳ́ Lî-phien.

9Lî-phien ke lai-é:

Ha̍p-nok, Fap-lu, Hî-sṳ̂-lùn, Kâ-mí.

10Sî-mién lâu kì ke lai-é:

Yâ-mû-li, Ngâ-mén, Â-hot, Ngâ-kîn, Só-hot, lâu Kâ-nàm ńg-chṳ́ kiung ke Seu-lò.

11Li-vi lâu kì ke lai-é:

Kiet-sun, Kô-hot, Mí-lâ-li.

12Yù-thai lâu kì ke lai-é:

Sṳ-lâ, Fap-le̍t-sṳ̂, Chhia-lâ.

(Yù-thai nang-ngoi yû lióng-ke lai-é Ngí lâu Ngò-nàm sí chhai Kâ-nàm.)

Fap-le̍t-sṳ̂ ke lai-é he Hî-sṳ̂-lùn lâu Ha̍p-mû-le̍t.

13Yî-sat-kâ lâu kì ke lai-é:

Thò-lâ, Phú-ngá, Yok-pak, Sṳ̂n-lùn.

14Sî-pu-lùn lâu kì ke lai-é:

Sî-lie̍t, Yî-lùn, Ngâ-li.

15Yî-song he Li-â chhai Mî-sok-put-tha̍t-mí-â lâu Ngâ-kok kiung ke chṳ́-sûn, nang-ngoi hàn-yû moi-é Tí-nâ. Ngâ-kok tui Li-â só-chhòn hâ-lòi ke chṳ́-sûn chúng-khiung sâm-sṳ̍p sâm-sà.

16Kâ-tet lâu kì ke lai-é:

Sé-fî-yùn, Ha̍p-kî, Sû-nì, Yî-sṳ̂-pún, Yî-li, Â-lò-tí, Â-lie̍t-li.

17Â-sat lâu kì ke lai-é:

Yîm-nâ, Yit-sṳ̂-ngá, Yit-sṳ̂-ví, Pí-li-â,

hàn-yû kì-têu ke ló-moi Sî-lâ.

Pí-li-â ke lai-é he Hî-phe̍t lâu Mâ-kiet.

18Yî-song he Lâ-pân pûn kì ke moi-é Li-â cho sṳ́-ńg ke Sit-pha lâu Ngâ-kok kiung ke chṳ́-sûn, chúng-khiung sṳ̍p-liuk sà.

19Ngâ-kok ke pû-ngiòng Lùi-kiet lâu kì kiung lióng-ke lai-é:

Yok-sit lâu Phien-ngâ-mén.

20Yok-sit chhai Âi-khi̍p lâu Hî-li-pô-lî-sàng ke chi-sṳ̂ Pô-thì-fî-lâ ke moi-é Â-sî-na̍p kiung lióng-ke lai-é:

Mâ-nâ-sî lâu Yî-fap-lièn.

21Phien-ngâ-mén ke lai-é he:

Pí-lâ, Pí-kiet, Â-sṳ̍t-phe̍t, Kî-lâ, Nâi-man, Yî-hî, Lò-sṳ̍t, Mû-phìn, Fu-phìn, Â-le̍t.

22Yî-song he Lùi-kiet lâu Ngâ-kok chhòn hâ-lòi ke chṳ́-sûn, chúng-khiung sṳ̍p-si sà.

23Tan lâu kì ke lai-é:

Fu-sṳ̂n.

24Nâ-fut-thâ-li lâu kì ke lai-é:

Ngâ-siet, Kû-nì, Yâ-set, Sṳ-lâng.

25Yî-song he Lâ-pân pûn kiâ moi-é Lùi-kiet cho sṳ́-ńg ke Phit-lâ lâu Ngâ-kok chhòn hâ-lòi ke chṳ́-sûn, chúng-khiung chhit-sà.

26Lâu Ngâ-kok khiung-ha to Âi-khi̍p ke chhṳ̍t-ne chṳ́-sûn, chúng-khiung yû liuk-sṳ̍p liuk-sà, mò pâu-hàm sîm-khiû. 27Chai kâ-song Yok-sit chhai Âi-khi̍p kiung ke lióng-ke lai-é, Ngâ-kok chhiòn-kâ chhai Âi-khi̍p ke ngìn-khiéu chúng-khiung chhit-sṳ̍p sà.

Ngâ-kok Chhiòn-kâ to Âi-khi̍p

28Ngâ-kok phai Yù-thai siên-to Yok-sit ke-vi, yok kì hi Kô-sân kien-mien. Kì-têu to Kô-sân ke sṳ̀, 29Yok-sit chhô-chhâ to ke-vi ngiàng-chiap kiâ-pâ Yî-set-lie̍t. Kì-têu yit kien-mien, Yok-sit chhiu nám-tén kiâ-pâ, kieu chhin-kiú. 30Yî-set-lie̍t tui Yok-sit kóng: “Ngài yû-hó chhîn-ngién khon-tó ngì hàn-chhôi, liá-ha ngài sí ya kâm-ngien lé!”

31Heu-lòi, Yok-sit tui kì ke-têu hiûng-thi lâu kiâ-pâ vuk-hâ khì-thâ ke ngìn kóng: “Ngài oi hiong vòng po-ko: ‘Ngài ke-têu hiûng-thi lâu ngâ-pâ yit-kâ ngìn yí-kîn tui Kâ-nàm sái-to liá-vi lòi lé. 32Kì-têu he mu̍k-yòng ngìn, kho hiuk thèu-sâng lòi sên-fa̍t ke, só-yî kì-têu tai ngiù-yòng lâu só-yû ke chhòi-sán lòi-to liá-vi.’ 33Vòng seu-kien ngì-têu, mun-hí ngì-têu he cho-má-ke thèu-lu ke sṳ̀, 34ngì-têu oi lâu kì kóng, ngì-têu lâu chú-siên khiung-yong, chhiùng heu-sâng to liá-ha kho hiuk thèu-sâng lòi sên-fa̍t. Án-ngiòng, kì chhiu-voi pûn ngì-têu he̍t chhai Kô-sân thi-khî.” Yok-sit án-ngiòng kóng, he yîn-vi Âi-khi̍p-ngìn mò-oi lâu mu̍k-yòng ke ngìn lòi-vông.

Currently Selected:

Chhóng-sṳ Ki 46: THV12Rdb

Highlight

Copy