Yî-sî-kiet Sû 43

Song-chú Chón-to Sṳn-thien

1Ke-ngìn yu tai ngài to hiong-tûng ke mùn. 2Ngài khon-tó Yî-set-lie̍t Song-ti ke yùng-kông tui tûng-fông lòi. Kì ke sâng chhiong ho-ho-kún ke thai-súi sâng; thi chhiu yîn-vi Kì ke yùng-yeu fat-kông. 3Liá-ke yi-siong lâu yî-chhièn ngài khon-tó Song-ti fí-me̍t Yâ-lu-sat-lâng ke yi-siong, pin ngài chhai Kâ-pâ-lû hò-pa sùn khon-tó ke yi-siong khiung-yong. Só-yî ngài chhiu phu̍k chhai thi-song. 4Song-chú ke yùng-kông thûng-ko tûng-mùn chin-ngi̍p sṳn-thien.

5Song-chú ke Lìn chiông ngài khià hí-lòi, tai ngài to nui-yen. Chhai ke-vi, ngài khon-tó sṳn-thien chhûng-mân Song-chú ke yùng-kông. 6Ke-ngìn khî chhai ngài sùn-thèu; ngài thâng-tó Song-chú tui sṳn-thien tú hiong ngài kóng-fa. 7Kì kóng: “Ngìn-chṳ́ â, liá só-chhai he Ngài ke pó-chho, Ngài tha̍p-kiok ke só-chhai; Ngài oi yún-yén he̍t chhai Yî-set-lie̍t-ngìn tông-chûng thúng-chhṳ kì-têu. Yî-set-lie̍t-ngìn lâu kì-têu ke kiûn-vòng chhiòn-phu m̀-voi chai hi pai ngiéu-siong, ya-he vi yí-kîn sí-thet ke kiûn-vòng li̍p ki-ngiam-pî, lòi vú-yu̍k Ngài ke sṳn-miàng. 8Kì-têu vòng-kiûng ke mùn-khiâm lâu mùn-chhû pen-tén Ngài sṳn-thien mùn-khiâm lâu mùn-chhû, ngài-têu tông-chûng chṳ́-yû kak yit-san piak. Kì-têu sṳt yung sià-ok ke hàng-vì vú-yu̍k Ngài, só-yî Ngài thai fat-khién, chiông kì-têu sêu-me̍t thet. 9Liá-ha kì-têu yit-thin oi thìn-chṳ́ pai ngiéu-siong, oi chhak-thet kì-têu vi siên-vòng só-li̍p ke ki-ngiam-pî, án-ngiòng, Ngài chhiu yún-yén he̍t chhai kì-têu tông-chûng.

10“Ngìn-chṳ́ â, ngì oi chiông sṳn-thien ke sat-kie lâu Yî-set-lie̍t-ngìn kóng, pûn kì-têu ngiên-kiu. Oi sṳ́ kì-têu yîn-vi chhṳ-kâ ke chhui-ok lòi kám-kok tó kien-seu. 11Na-he kì-têu kám-kok chhṳ-kâ kien-seu, ngì chhiu hiong kì-têu sot-mìn liá sṳn-thien ke sat-kie: Pâu-hàm sṳn-thien ke mù-hìn, chhut-ngi̍p héu, ngoi-hìn, nui-phu ke pu-chṳ, lâu só-yû ke thiàu-li kûi-chet. Ngì oi chhai kì-têu mien-chhièn chiông liá-têu siá hâ-lòi, pûn kì-têu tî yin-kôi ngióng-pân pu-chṳ, yu cheu thiàu-li kûi-chet chṳp-hàng. 12Sṳn-thien ke kûi-thin he án-ngiòng: Sṳn-thien oi hí chhai sân-táng, sṳn-thien ke si chû-vì chhiòn-phu he sṳn-thi.”

Chi-thàn

13Chi-thàn ke thai-se he án-ngiòng: Liòng chi-thàn ke chhak-chhun lâu liòng sṳn-thien ke chhak-chhun khiung-yong. Chi-thàn ke thàn-tái si-vì yû chhò, chhṳ̂m ńg-sṳ̍p kûng-fûn, fat ńg-sṳ̍p kûng-fûn, ngoi-yèn yû ngi-sṳ̍p ńg kûng-fûn kô ke piên. 14Chi-thàn ke tái-chhèn tui chhò-tái son-hí yû yit kûng-chhak kô; chûng-chhèn tui tái-chhèn ke ngoi-yèn hiong nui kiû-ngi̍p ńg-sṳ̍p kûng-fûn, yû lióng kûng-chhak kô. Song-chhèn ya tui chûng-chhèn ngoi-yèn hiong-nui kiû-ngi̍p ńg-sṳ̍p kûng-fûn. 15Song-chhèn, chhiu-he sêu sên-ngì ke só-chhai, ya he lióng kûng-chhak kô, si-kok-thèu yû thu̍t chhut-lòi ke kok. 16Chi-thàn ke song-chhèn he si-fông ke, tak-phién chhòng liuk kûng-chhak. 17Chûng-chhèn ya he si-fông ke, tak-phién chhòng chhit kûng-chhak, ngoi-yèn yû piên, kô ngi-sṳ̍p ńg kûng-fûn. (Si chû-vì yû chhò, fat ńg-sṳ̍p kûng-fûn.) Sông chi-thàn ke ton-é hiong tûng-phién.

Fung-hien Chi-thàn

18Chṳ-kô ke Song-chú tui ngài kóng: “Ngìn-chṳ́ â, oi chu-yi thâng! Hâ-poi he yû-koân fung-hien chi-thàn ke thiàu-vùn. Chi-thàn cho-hó yî-heu, ngì oi chhai chi-thàn táng hien sêu-fa-chi, hia sên-ngì ke hiet. 19Chṳ́-yû Li-vi kî-chhu̍k, Sat-tuk heu-thoi ke chi-sṳ̂ chang cho-tet to Ngài mien-chhièn sṳ-fung Ngài. Liá he Ngài — chṳ-kô Song-chú ke min-lin. Ngì oi pûn kì-têu yit-chak se ngiù-kú cho su̍k-chhui-chi. 20Ngì oi yung liá sên-ngì ke hiet kò chhai song-chhèn thu̍t chhut-lòi ke si-chak kok, chûng-chhèn ke si-chak kok, lâu ngoi-yèn ke piên. Ngì oi án-ngiòng kiet-chhiang chi-thàn, fûn-phe̍t kì vì-sṳn. 21Ngì oi chiông su̍k-chhui-chi ke se ngiù-kú, tai-to sṳn-thien ngoi-poi chṳ́-thin ke só-chhai sêu. 22Thi-ngi ngit ngì oi yung mò khiet-tiám ke sân-yòng-kú cho su̍k-chhui-chi. Ngì oi yung kì ke hiet kiet-chhiang chi-thàn, chhiong ngì yung se ngiù-kú ke hiet kiet-chhiang chi-thàn khiung-yong. 23Chi-thàn kiet-chhiang yî-heu, ngì oi tai yit-chak mò khiet-tiám ke se ngiù-kú lâu mièn-yòng-kú 24to Ngài mien-chhièn lòi. Chi-sṳ̂ oi chiông yàm ve chhai kì-têu sṳ̂n-song, cho sêu-fa-chi hien-pûn Ngài. 25Chhit-ngit nui, ngì oi tak-ngit hien yit-chak se ngiù-kú, sân-yòng-kú, mièn-yòng-kú cho su̍k-chhui-chi. Liá-têu thèu-sâng yit-thin oi mò khiet-tiám ke. 26Chhit-ngit nui, chi-sṳ̂ oi kiet-chhiang chi-thàn, chiông kì fûn-phe̍t vì-sṳn. 27Tui thi-pat ngit hí, chi-sṳ̂ oi chhai chi-thàn táng vi ngìn-mìn hien sêu-fa-chi lâu phìn-ôn-chi. Án-ngiòng, Ngài chhiu voi chiap-na̍p ngì-têu. Ngài — Chṳ-kô ke Song-chú án-ngiòng siên-pu lé.”

Currently Selected:

Yî-sî-kiet Sû 43: THV12Rdb

Highlight

Copy