Yî-sî-kiet Sû 23

Lióng Chí-moi Fam-chhui

1Song-chú lâu ngài kóng-fa; Kì kóng: 2“Ngìn-chṳ́ â, yî-chhièn yû lióng-ke khiung-ôi ke chí-moi he̍t chhai Âi-khi̍p. 3Kì-têu heu-sâng ke sṳ̀ chhiu fong-thong chhiong kî-ńg, nen-kû pûn-ngìn káu, sóng-sṳt thùng-chṳ̂n. 4Â-chí ke miàng ôn-to Â-hò-lâ — thoi-péu Sat-mâ-li-â; ló-moi ke miàng ôn-to Â-hò-li-pâ — thoi-péu Yâ-lu-sat-lâng. Ngài thó kì lióng chí-moi; kì lióng-sà lâu Ngài kiung se-ngìn-è. 5Â-hò-lâ lâu Ngài kiet-fûn heu hàn-he chhiong kî-ńg. Kì thâm-lien ke-têu Â-sut ke chhìn-lòng. 6Kì-têu chhiòn-phu he chok làm-set chṳ-fu̍k ke kui-chhu̍k lâu kôn-chóng; kì-têu chhiòn-phu chhin heu-sâng yu sṳ̂-vùn, he khì-pîn-chhui ke yúng-sṳ. 7Kì lâu só-yû ke Â-sut kiûn-kôn hàng kiên-yìm, cho kì-têu ke chhìn-fu, pai kì-têu ke ngiéu-siong lòi tá-lá-sap chhṳ-kâ. 8Kì hàn-mò piong-thet chhai Âi-khi̍p só-hàng ke yìm-lon. Kì hàn heu-sâng ke sṳ̀, chhiu yû nàm-ngìn lâu kì soi, chiông kì chún-cho kî-ńg, miâ kì ke nen-kû, lâu kì hàng kiên-yìm. 9Só-yî, Ngài chiông kì kâu-pûn kì só thâm-lien ke Â-sut chhìn-lòng. 10Kì-têu chiông kì thot kông-kông, chok kì ke chṳ́-ńg, yèn-heu yung kiam chhiuk-sí kì. Kì pî-chhám ke po-yin sàng-cho fu-ngìn-kâ ke seu-khô.

11“Kiâ ló-moi Â-hò-li-pâ sûi-yèn khon-tó liá po-yin, chúng-he pí kiâ-chí Â-hò-lâ hàn-kha fái, hàn-kha fong-thong. 12Kì ya thâm-lien ke-têu Â-sut ke kui-chhu̍k lâu kôn-chóng — chok chiâng-chiâng chṳ-fu̍k ke kiûn-ngìn — lâu khì-pîn-chhui ke kiûn-kôn; kì-têu chhiòn-phu he sṳ̂-vùn ke chhiâng-ngièn. 13Ngài khon-tó kì pûn-ngìn châu-tha̍p, kì lâu kiâ-chí khiung-yong fong-thong.

14“Kì ke fong-thong yû-kâ mò-kám. Kì sṳm-chṳ pûn tiâu-khiet chhai piak-táng ke-têu Pâ-pí-lùn kiûn-kôn ke siong mì-tó; ke-têu ngìn ke siong he yung chû-fùng set va̍k ke, 15yêu-kiên chhiòn-phu kiê-tén yêu-tai, thèu-nà tai-tén yû fâ-piên ke pâu thèu-kîn, ke-têu ngìn he Kâ-le̍t-tí ke Pâ-pí-lùn kiûn-kôn. 16Kì yit-ha khon-tó ke-têu siong chhiu oi-tó kì-têu, phai-ngìn to Pâ-pí-lùn hi khon kì-têu. 17Pâ-pí-lùn-ngìn lòi lâu kì khiung-ha soi, chhin-liong châu-tha̍p kì; kì pûn-ngìn vú-yu̍k heu, chhiu tông-nâu kì-têu. 18Kì chhai thai-chung mien-chhièn hàng yìm-lon, mò chok sâm-fu, thai-kâ chhiòn-phu ngin-vì kì he chhông-kî. Ngài tông-nâu kì, chhiong yî-chhièn nâu kiâ-chí khiung-yong. 19Kì hàn mò piong-thet heu-sâng sṳ̀ chhai Âi-khi̍p só-hàng ke yìm-lon, yit-chhṳ̍t hàng kiên-yìm. 20Kì pûn ke-têu sṳ̂n-thí chhiong yâ-lì án hiùng-thèu, chîn-li̍t chhiong yâ-mâ án-yúng ke chhìn-lòng mì-tó. 21(Â-hò-li-pâ â, ngì chhin-sióng ko heu-sâng sṳ̀ chhai Âi-khi̍p hàng kiên-yìm, pûn-ngìn káu nen-kû, sṳt-thet thùng-chṳ̂n ke-chúng fong-thong ke sên-fa̍t.)

Song-ti Sṳ́m-phan Ló-moi

22“Só-yî, Â-hò-li-pâ â, Ngài — Chṳ-kô ke Song-chú tui ngì án-ngiòng kóng: Ngì nâu thèu-pái ke ke-têu chhìn-lòng, chúng-he Ngài oi sṳ́ kì-têu fat-khién, tai kì-têu lòi vì-kûng ngì. 23Ngài oi tai-liâng só-yû ke Pâ-pí-lùn-ngìn lâu Kâ-le̍t-tí-ngìn, Pí-kot-ngìn, Sû-â-ngìn, Kô-â-ngìn, lâu só-yû ke Â-sut-ngìn lòi. Ngài oi seu-si̍p só-yû heu-sâng sṳ̂-vùn ke kui-chhu̍k, kôn-chóng, chhung-yeu kôn-yèn, lâu kô-kip kiûn-kôn chhiòn-phu khì-tén mâ lòi. 24Kì-têu oi tai-liâng thai-kiûn, chún-phi chan-chhâ lâu yun-liòng chhâ, tui pet-fông#23:24 “tui pet-fông” he kîn-kí yit kú yi̍t-pún, Hî-pak-lòi-vùn ke yi-sṳ mò chhîn-chhú. kûng-kit ngì. Kì-têu oi yung thai-thai se-se ke tún-phài lâu thiet-mo fòng-sṳ̂n, lòi vì-kûng ngì. Ngài oi ham kì-têu lòi hìn-fa̍t ngì, cheu kì-têu ke fap-li̍t sṳ́m-phan ngì. 25Yîn-vi ngì ngiâ Ngài fat-khién, Ngài oi pûn kì-têu tui ngì thai fat-khién. Kì-têu oi kot-thet ngì ke phi-kûng lâu ngí-kûng, chok-chéu ngì ke chṳ́-ńg; mò pûn-ngìn chhṳ̀-thet ke ngìn, voi pûn-ngìn sâng-sâng sêu-sí. 26Kì-têu oi thot-kông ngì ke sâm-fu, chhióng-chéu ngì ke chû-pó. 27Ngài oi chhù-thet ngì ke yìm-lon, kiet-suk ngì chhai Âi-khi̍p ho̍k-tó ke fong-thong sên-fa̍t, sṳ́ ngì mò chai ngióng-mong ngì ke chhìn-lòng#23:27 “ngì ke chhìn-lòng” ya-he yi̍t-cho “ngiéu-siong”; Hî-pak-lòi-vùn chhṳ̍t-yi̍t he “kì-têu”., ya mò chai ki-ngiam Âi-khi̍p.”

28Chṳ-kô ke Song-chú án-ngiòng kóng: “Ngài oi chiông ngì kâu-pûn ngì só-nâu, ngì só yen-hen ke ngìn. 29Kì-têu yîn-vi yen-hen ngì, oi chhióng-chéu ngì sat-mâng tá-piang tet-lòi ke chhòi-vu̍t, chiông ngì pok-kông, sṳ́ ngì mò chok sâm-fu, chhiong kî-ńg khiung-yong. Liá chhiòn-phu he ngì ke yìm-lon lâu fong-thong ngiâ-lòi ke. 30Ngì lâu lie̍t-koet hàng kiên-yìm, ngì pai kì-têu ke ngiéu-siong lòi tá-lá-sap chhṳ-kâ. 31Ngì thèn ngiâ-chí hàng ke lu, só-yî Ngài oi chiông kì lîm-ko chit-fa̍t ke chiú-pî kâu-pûn ngì lîm.”

32Chṳ-kô ke Song-chú án-ngiòng kóng:

Ngì oi lîm ngiâ-chí ke chiú-pî;

liá-chak pî-é yu chhṳ̂m yu thai.

Ngìn oi sâu-nat ngì;

liá pî-é chông-mân chit-fa̍t.

33Ngiâ-chí Sat-mâ-li-â ke chiú-pî,

chhiu-he chhin tet-ngìn-kiâng, chhî-liòng ke chiú-pî,

oi sṳ́ ngì chṳ-to chiú-chui, pî-chhám.

34Ngì oi lîm liá-pî, lièn phok ya thûn-thet;

pî-é ke sui-phién oi kot-lan ngì ke nen-kû.

Ngài — Chṳ-kô ke Song-chú án-ngiòng siên-pu lé.

35Só-yî, Chṳ-kô ke Song-chú án-ngiòng kóng: “Yîn-vi ngì m̀ ki-tet Ngài, fit-thet Ngài, ngì oi yîn-vi ngì ke yìm-lon lâu fong-thong su-chhin thung-khú.”

Song-ti Sṳ́m-phan Lióng Chí-moi

36Song-chú lâu ngài kóng: “Ngìn-chṳ́ â, ngì yû chún-phi hó oi sṳ́m-phan Â-hò-lâ lâu Â-hò-li-pâ mò? Ngì oi chṳ́-chhut kì-têu sià-ok ke hàng-vì. 37Kì-têu hàng kiên-yìm lâu chhṳ̀-ngìn ke chhui — chhiu-he pai ngiéu-siong, chhṳ̀ kì-têu lâu Ngài kiung ke chṳ́-ńg. Kì-têu chiông Ngài ke chṳ́-ńg cho sên-ngì sêu-hien pûn kì-têu ke ngiéu-siong. 38M̀-tân-chhiang án-ngiòng, kì-têu hàn tá-lá-sap Ngài ke sṳn-thien, vì-fam Ngài só chṳ-thin ke ôn-sit-ngit. 39Kì-têu chhṳ̀ Ngài ke chṳ́-ńg, chiông kì-têu cho sên-ngì sêu-hien pûn ngiéu-siong; khiung-ngit, kì-têu yu ngi̍p-to Ngài ke sṳn-thien hi, chiông kì tá-lá-sap!

40“Kì-têu yit-pái yu yit-pái phai sṳ́-chá to yén-yén ke só-chhai hi chhiáng ngìn lòi, ke-têu ngìn chhiu lòi. Lióng chí-moi chhiu sé-sṳ̂n, tá-pan, va̍k muk-mì-mô, tai chû-pó. 41Kì-têu chhô chhai chhin-chiâng ke mìn-chhòng, thèu-chhièn pài-tén yit-chông chok, chok-táng pài-mân Ngài sung-pûn kì-têu ke hiông-liau lâu kám-lám-yù. 42Yit-khiùn tui khóng-yâ lòi ke lù-màn lâu chiú-kúi thùng kì-têu khiung-ha chok-ngo̍k chhàu-nau. Kì-têu chiông sú-ak tai chhai lióng chí-moi sú-hong, chiông chiâng mo-é tai chhai kì lióng-sà thèu-nà táng. 43Ngài sîm-kôn sióng: ‘Kì-têu chhiong-he lâu ngièn-ló sôi-ngio̍k ke kî-ńg hàng kiên-yìm’#23:42-43 chiet Hî-pak-lòi-vùn mò chhîn-chhú.. 44Liá-têu ngìn yit-pái yu yit-pái lòi chhìm Â-hò-lâ lâu Â-hò-li-pâ hàng kiên-yìm, chhiu-chhiong lâu kî-ńg hàng kiên-yìm khiung-yong. 45Kûng-chṳn ke ngìn oi phan kì-têu hàng kiên-yìm lâu chhṳ̀-ngìn ke chhui; yîn-vi kì-têu he yìm-fu, mân-sú kò-tén chhṳ̀-ngìn ke hiet.”

46Chṳ-kô ke Song-chú án-ngiòng kóng: “Oi seu-si̍p chhin-tô ngìn lòi khiúng-hak kì-têu, chhióng kì-têu. 47Ke-têu ngìn yung sa̍k-thèu te̍p kì-têu, yung kiam chhiuk kì-têu, yu chhṳ̀-sí kì-têu ke chṳ́-ńg, piong-fó sêu-thet kì-têu ke vuk. 48Ngài oi chhù-thet chhiòn-koet yìm-lon ke sên-fa̍t, lòi kín-ko só-yû fu-ngìn-kâ cho-m̀-tet ho̍k kì-têu ke fong-thong. 49Ngì lióng chí-moi â, Ngài oi chit-fa̍t ngì-têu ke yìm-lon lâu pai ngiéu-siong ke chhui. Án-ngiòng, ngì-têu chhiu voi tî Ngài he Chṳ-kô ke Song-chú.”

Currently Selected:

Yî-sî-kiet Sû 23: THV12Rdb

Highlight

Copy