Yî-sî-kiet Sû 22

Yâ-lu-sat-lâng ke Chhui-ok

1Song-chú lâu ngài kóng-fa; 2Kì kóng: “Ngìn-chṳ́ â, ngì yû chún-phi oi sṳ́m-phan liá-chho chhûng-mân hiûng-sú ke sàng mò? Ngì oi chṳ́-chhut kì só-cho yit-chhiet sià-ok ke sṳ. 3Lâu liá-chho sàng kóng, oi thâng Ngài — Chṳ-kô ke Song-chú án-ngiòng kóng: Yîn-vi ngì chhṳ̀-sí chhin-tô thùng-pâu, yu pai ngiéu-siong lòi tá-lá-sap chhṳ-kâ, só-yî ngì ke sí-ngit to lé. 4Ngì fam chhṳ̀-ngìn ke chhui, yu pûn ngì chhṳ-kâ só-chho ke ngiéu-siong tá-lá-sap lé; án-ngiòng ngì ke sí-ngit khiûn lé, ngì ke kiet-mî to lé. Só-yî, Ngài oi sṳ́ lie̍t-koet vú-yu̍k ngì, sṳ́ van-pâng chhṳ́-seu ngì. 5Yén-khiûn ke koet-kâ chhiòn-phu voi chhṳ́-seu ngì ke fun-lon lâu chhu-miàng. 6Khon â, Yî-set-lie̍t ke liâng-chhiu lâu kôn-chóng tak-sà chhai ngì ke tông-chûng lon-yung khièn-piang, liù ngìn ke hiet. 7Sàng-tú mò-ngìn hau-kin yà-ôi. Yû-ngìn khî-fu ngoi-chhu̍k-ngìn, ap-pet kû-yì koá-fu. 8Ngì khon-khiâng Ngài ke sṳn-vu̍t, m̀ sú Ngài ke ôn-sit-ngit. 9Chhai ngì ke tông-chûng yû-ngìn sòng-sòng kóng fâ-liâu, vi-tó oi liù ngìn ke hiet; yû-ngìn chhai sân-táng sṳ̍t chi-vu̍t; yû-ngìn tông-hau hàng yìm-lon; 10yû-ngìn lâu â-pâ ke pû-ngiòng se-chiá thùng-chhòng; yû-ngìn khiòng-khiòng lâu kîn-khì chûng ke fu-ngìn-kâ thùng-fòng; 11yû-ngìn lâu phe̍t-ngìn ke pû-ngiòng hàng kiên-yìm; yû-ngìn khiòng-kiên chhṳ-kâ ke sîm-khiû; ya yû lâu khiung-yà mò khiung-ôi, khiung-ôi mò khiung-yà ke chí-moi lon-lùn. 12Chhai ngì ke tông-chûng yû-ngìn pûn-ngìn chhiáng-hi chhṳ̀-ngìn; yû-ngìn piong kô-li-thoi, hiong thùng-pâu thó li-sit, pok-siok kì-têu lòi fat-chhòi. Ngì vàn-chhiòn chiông Ngài m̀ ki-tet.” Chṳ-kô ke Song-chú án-ngiòng siên-pu lé.

13“Khon â, yîn-vi ngì thâm put-ngi ke chhièn-chhòi, liù ngìn ke hiet, Ngài oi chhut-sú kûng-kit ngì. 14Ngài lâu ngì son-sṳ ke sṳ̀, ngì hàn-yû yúng-hi mò? Hàn-yû li̍t-liong mò? Ngài — Song-chú án-ngiòng siên-pu lé. Ngài kóng-ko ke, Ngài yit-thin voi sṳ̍t-hàng. 15Ngài oi chiông ngì ke ngìn-mìn kiuk-san to kok-koet, chhù-thet ngì-têu ke lá-sap. 16Chhai lie̍t-koet mien-chhièn su-tó vú-yu̍k ke sṳ̀, ngì chhiu voi tî Ngài he Song-chú.”

Song-ti ke Thai Lien-lù

17Song-chú lâu ngài kóng-fa; Kì kóng: 18“Ngìn-chṳ́ â, Yî-set-lie̍t-ngìn he yit-tôi fi-vu̍t. Kì-têu chhiu-chhiong lien-ngiùn ke sṳ̀ chhai lù-chûng pûn chhut-lòi mò-yung ke thùng, siak, thiet, yèn liá-têu fi-vu̍t. 19Só-yî, Ngài — Chṳ-kô ke Song-chú lâu kì-têu kóng, kì-têu chhiu-chhiong ke-têu ngiùn-khóng chûng ke fái-thùng fái-thiet khiung-yong mò má-ke lu-yung. Ngài oi chiông kì-têu si̍p-chûng chhai Yâ-lu-sat-lâng, 20yung Ngài ke thai fat-khién chiông kì-têu sêu-to yùng-thet, chhiu-chhiong ngìn sû-si̍p nui-tú yû ngiùn, thùng, thiet, yèn, siak ke khóng-sa̍k piong chhai lù-chûng lòi-lien khiung-yong. 21Ngài yit-thin oi chiông kì-têu si̍p-chûng chhai Yâ-lu-sat-lâng, yung Ngài thai fat-khién ke fó lòi-lien kì-têu. 22Kì-têu oi chhai Yâ-lu-sat-lâng sêu-to yùng-thet, chhiu-chhiong ngiùn-è ke khóng-sa̍k chhai lien-lù chûng sêu-to yùng-thet. Án-ngiòng, kì-têu chhiu voi tî Ngài — Song-chú hiong kì-têu piang-chhut thai fat-khién.”

Yî-set-lie̍t Liâng-chhiu ke Chhui-ok

23Song-chú lâu ngài kóng-fa; 24Kì kóng: “Ngìn-chṳ́ â, oi lâu Yî-set-lie̍t-ngìn kóng, kì-têu ke thú-thi he mò chhiang-li ke. Só-yî, Ngài oi fat-khién chit-fa̍t kì-têu, m̀ lo̍k-súi pûn kì-têu. 25Kì-têu ke liâng-chhiu#22:25 “liâng-chhiu” he kîn-kí yit kú yi̍t-pún, Hî-pak-lòi-vùn he “siên-tî”. yîm-mèu chok-ok, chhiong ho-ho-kún ke sṳ̂-é chhá-lie̍t só chok-tó ke thung-vu̍t. Kì-têu chhṳ̀-ngìn, chhióng chhòi-pó, hoi chhin-tô fu-ngìn-kâ sàng-cho koá-fu. 26Chi-sṳ̂ vì-poi Ngài ke fap-li̍t, tá-lá-sap Ngài ke sṳn-vu̍t. Kì-têu mò fûn-phe̍t má-ke he sṳ̀n-sṳn ke, má-ke he sṳ-siu̍k ke, ya mò kâu-ngìn fûn-phe̍t chhiang-li ke lâu mò chhiang-li ke, yu méu-sṳ Ngài ke ôn-sit-ngit. Kiet-kó, Yî-set-lie̍t-ngìn chhiòn-phu m̀ chûn-kin Ngài. 27Liâng-chhiu lâu kôn-chóng chhiu-chhiong lòng-khiùn chhá-lie̍t só chok-tó ke thung-vu̍t; kì-têu chôn-mùn kho liù ngìn ke hiet lòi-pot put-ngi ke chhièn-chhòi. 28Siên-tî vi kì-têu châ chhui-ok, chhiu-chhiong ngìn yung sa̍k-fôi-súi fún-piak. Kì-têu ke yi-siong he ká ke; kì-têu ke yi-ngièn he fâ-liâu ke. Kì-têu chhṳ-kâ kóng he chhòn Chṳ-kô Song-chú ke fa, khì-sṳ̍t, Ngài — Song-chú pin-mò tui kì-têu kóng-fa. 29Yû-chhièn ngìn khî-fu, pok-siok, fái khoán-thai khiùng-khú ngìn, mò kûng-phìn tui-thai ngoi-chhu̍k ngìn. 30Ngài chhai kì-têu tông-chûng chhìm, khon yû-ngìn voi cháng sàng-chhiòng, khî chhai sàng-chhiòng lan-khûng ke só-chhai mò? Chhai Ngài fat-khién oi fí-me̍t liá-sàng ke sṳ̀ voi hó lòi pó-fu kì, chúng-he Ngài lièn yit-ke ya chhìm m̀-tó. 31Só-yî, Ngài oi hiong kì-têu piang-chhut Ngài ke thai fat-khién; Ngài thai fat-khién ke fó oi chiông kì-têu sêu-to chhiang-chhiang, cheu kì-têu só-cho ke po-yin kì-têu.” Chṳ-kô ke Song-chú án-ngiòng siên-pu lé.

Currently Selected:

Yî-sî-kiet Sû 22: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)