Chhut Âi-khi̍p Ki 6

1Song-chú tui Mô-sî kóng: “Ngì voi ngiàm-sṳ̀ khon-tó Ngài ngióng-pân tui-fu Âi-khi̍p-vòng. Ngài oi pet kì piong Ngài ke chṳ́-mìn chéu. Ngài oi pet kì chiông kì-têu kón-chhut kì ke koet-kâ.”

Song-ti Fû-seu Mô-sî

2Song-ti chṳ́-sṳ Mô-sî kóng: “Ngài he Song-chú. 3Ngài thèu-pái tui Â-pak-lâ-hón, Yî-sat, Ngâ-kok hién-hien cho chhiòn-nèn ke Song-ti; chúng-he, Ngài m̀-sṳt chiông Ngài ke miàng — Song-chú khí-sṳ pûn kì-têu. 4Ngài sṳt lâu kì-têu li̍p-yok, yin-hí chiông kì-têu cho lî-hak chhiam-sṳ̀ he̍t-ko ke Kâ-nàm-thi su-pûn kì-têu. 5Liá-ha Ngài thâng-tó Yî-set-lie̍t-ngìn yîn-vi pûn Âi-khi̍p-ngìn khî-fu só fat-chhut ke chhên-sâng, Ngài chhiu sióng-tó Ngài ke yok. 6Só-yî ngì hi lâu Yî-set-lie̍t-ngìn kóng: ‘Ngài he Song-chú; Ngài oi kiu ngì-têu, tui Âi-khi̍p-ngìn pûn ngì-têu khâi ke chhûng-tâm chûng kiu ngì-têu chhut-lòi. Ngài oi chhûn-chhut thai-nèn ke sú chhûng-chhûng chit-fa̍t Âi-khi̍p-ngìn; Ngài oi chṳ́n-kiu ngì-têu. 7Ngài oi chiông ngì-têu khon-cho Ngài ke chṳ́-mìn, Ngài ya oi cho ngì-têu ke Song-ti. Tông ngì-têu tui Âi-khi̍p-ngìn pûn ngì-têu ke chhûng-tâm chûng tet-tó chhṳ-yù ke sṳ̀, ngì-têu chhiu-voi tî Ngài he Song-chú, he ngì-têu ke Song-ti. 8Ngài sṳt yin-hí Â-pak-lâ-hón, Yî-sat, Ngâ-kok, só-yî Ngài yit-thin oi chiông ngì-têu tai-to ke thi-fông, chiông ke thi-fông su-pûn ngì-têu cho sán-ngia̍p. Ngài chhiu-he Song-chú.’ ” 9Mô-sî chiông liá-têu fa lâu Yî-set-lie̍t-ngìn kóng, chúng-he kì-têu m̀-hén thâng, yîn-vi kân-khú ke nù-chhòi sên-fa̍t yí-kîn sṳ́ kì-têu fôi-sîm sṳt-chṳ.

10Só-yî Song-chú tui Mô-sî kóng: 11“Ngì hi lâu koet-vòng kóng, oi pûn Yî-set-lie̍t-ngìn lì-khôi Âi-khi̍p.”

12Chúng-he Mô-sî chhai Song-chú mien-chhièn kóng: “Lièn Yî-set-lie̍t-ngìn chhiòn m̀-thâng ngài ke fa, Âi-khi̍p-vòng ngióng-voi thâng ngài kóng nè? Ngài he yit-ke choi-thun sa̍t-khu̍t ke ngìn.”

13Song-chú hàn-he min-lin Mô-sî lâu Â-lùn to Yî-set-lie̍t-ngìn lâu Âi-khi̍p-vòng ke-vi hi, chiông Yî-set-lie̍t-ngìn tui Âi-khi̍p tai chhut-lòi.

Â-lùn lâu Mô-sî ke Chhu̍k-phú

14Hâ-poi só-ki ke he Yî-set-lie̍t ke chhu̍k-chóng. Ngâ-kok ke chóng-chṳ́ Lî-phien yû si-ke lai-é: Ha̍p-nok, Fap-lu, Hî-sṳ̂-lùn lâu Kâ-mí; kì-têu sàng-cho Lî-phien kî-chhu̍k.

15Sî-mién yû liuk-ke lai-é: Yâ-mû-li, Ngâ-mén, Â-hot, Ngâ-kîn, Só-hot lâu Seu-lò — Seu-lò he Kâ-nàm ke se-moi-é só-kiung ke; kì-têu sàng-cho Sî-mién kî-chhu̍k.

16Li-vi yû sâm-ke lai-é: Kiet-sun, Kô-hot lâu Mí-lâ-li; kì-têu sàng-cho Li-vi kî-chhu̍k. Li-vi sṳ̍t-to yit-pak sâm-sṳ̍p chhit-se.

17Kiet-sun yû lióng-ke lai-é: Li̍p-nì lâu Sṳ-mî; kì-têu tak-sà yû chhin-tô chṳ́-sûn.

18Kô-hot yû si-ke lai-é: Am-làn, Yî-sṳ̂-ha̍p, Hî-pak-lùn lâu Vû-siet. Kô-hot sṳ̍t-to yit-pak sâm-sṳ̍p sâm-se.

19Mí-lâ-li yû lióng-ke lai-é: Mat-li lâu Mû-sṳ. Liá chhiu-he Li-vi kî-chhu̍k lâu kì-têu ke heu-thoi.

20Am-làn thó chhṳ-kâ ke â-kû Yok-kî-phe̍t; kì kiung Â-lùn lâu Mô-sî. Am-làn sṳ̍t-to yit-pak sâm-sṳ̍p chhit-se.

21Yî-sṳ̂-ha̍p yû sâm-ke lai-é: Khó-lâ, Nì-fî lâu Se-kî-li.

22Vû-siet yû sâm-ke lai-é: Mí-sâ-li, Yî-li-sat-fán lâu Sî-thì-li.

23Â-lùn thó Yî-li-sâ-pâ; kì he Â-mí-nâ-tha̍t ke moi-é, Nâ-sun ke ló-moi. Yî-li-sâ-pâ vi Â-lùn kiung si-ke lai-é: Nâ-tap, Â-pí-fu, Yî-li-â-sat lâu Yî-thâ-mâ.

24Khó-lâ kiung sâm-ke lai-é: Â-siak, Yî-li-kâ-nâ lâu Â-pí-â-sat; kì-têu he Khó-lâ chûng-chhu̍k kok-fòng ke chú-siên.

25Â-lùn ke lai-é Yî-li-â-sat thó Phú-thiet ke moi-é; kì kiung Fî-nì-ha̍p.

Liá-têu chhiòn-phu he Li-vi kî-chhu̍k hâ kok chûng-chhu̍k, kâ-chhu̍k ke chhu̍k-chóng.

26Â-lùn lâu Mô-sî liá lióng-sà, Song-chú sṳt min-lin kì-têu kóng: “Ngì-têu hi chiông Yî-set-lie̍t-ngìn ke kiûn-chhui yit-chhui yit-chhui tui Âi-khi̍p thu chhut-lòi.” 27Tui Âi-khi̍p-vòng kóng oi piong Yî-set-lie̍t-ngìn chéu ke, ya he Mô-sî lâu Â-lùn.

Song-chú Min-lin Mô-sî lâu Â-lùn

28Yî-chhièn Song-chú chhai Âi-khi̍p tui Mô-sî kóng-fa ke sṳ̀, 29Kì kóng: “Ngài he Song-chú; Ngài lâu ngì kóng ke fa, ngì chhiòn-phu oi lâu Âi-khi̍p-vòng kóng.”

30Chúng-he Mô-sî chhai Song-chú mien-chhièn kóng: “Ngì tî ngài he choi-thun sa̍t-khu̍t ke ngìn, koet-vòng ngióng-voi thâng ngài ke fa nè?”

Currently Selected:

Chhut Âi-khi̍p Ki 6: THV12Rdb

Highlight

Copy