Chhut Âi-khi̍p Ki 34

Sṳ̍p-thiàu Kie-min ke Sîn Sa̍k-pán

(Sṳ̂n-min Ki 10:1-5)

1Song-chú tui Mô-sî kóng: “Ngì oi chai tá lióng-te sa̍k-pán, lâu yî-chhièn ke lióng-te khiung-yong; Ngài oi chiông ngì piâng sui-thet ke ke sa̍k-pán táng ke fa siá chhai liá lióng-te sa̍k-pán táng. 2Thiên-kông chêu-sṳ̀n, ngì oi chún-phi hó, sông Sî-nai-sân hi, chhai sân táng-kô khî chhai Ngài mien-chhièn. 3M̀-hó pûn ngìn lâu ngì khiung-ha sông-lòi; kûi-chak sân cho-m̀-tet yû-ngìn, ya cho-m̀-tet yû ngiù-yòng chhai sân kiok-hâ sṳ̍t-chhó.” 4Só-yî Mô-sî chai tá lióng-te sa̍k-pán, lâu yî-chhièn ke lióng-te khiung-yong; thi-ngi ngit tá-chó, kì cheu Song-chú ke fûn-fu chiông sa̍k-pán nâ-tén sông Sî-nai-sân hi.

5Song-chú chhai yùn-chûng kong-lìm, lâu Mô-sî khî chhai ke-vi, siên-ko Kì ke sṳn-miàng — Song-chú. 6Song-chú tui Mô-sî mien-chhièn kîn-ko, siên-ko kóng: “Ngài he Song-chú#34:6 “Song-chú” khon Chhut Âi-khi̍p Ki 3:14., Ngài he chhṳ̀-pî lâu lìn-mén ke Song-ti. Ngài m̀-voi sùi-phien fat-khién, yû fûng-sṳn ke chhṳ̀-oi lâu sin-sṳ̍t. 7Ngài kiên-sú put-pien ke chhṳ̀-oi chhṳ̍t-to chhiên-van thoi, pin sa-miên chhui-ok lâu ko-fam. Chúng-he, Ngài m̀-voi chiông yû-chhui ke chún-cho mò-chhui, Ngài yit-thin voi yîn-vi yà-ôi ke chhui lòi chit-fa̍t kì-têu ke chṳ́-ńg, chhṳ̍t-to sâm-si thoi.”

8Mô-sî kiak-kiak phu̍k chhai thi-song kin-pai. 9Kì kóng: “Chú â, na-he ngài chhai Ngì mien-chhièn mùng-ên, khiù Ngì lâu ngài-têu khiung-ha hàng. Sûi-yèn liá-khiùn ngìn tông ngang-kiáng, chúng-he khiù Ngì sa-miên ngài-têu ke chhui-ok lâu ko-fam, chiap-na̍p ngài-têu cho Ngì ke chṳ́-mìn.”

Chhùng-sîn Li̍p-yok

(Chhut Âi-khi̍p Ki 23:14-19; Sṳ̂n-min Ki 7:1-5; 16:1-17)

10Song-chú tui Mô-sî kóng: “Liá-ha Ngài lâu Yî-set-lie̍t ngìn-mìn li̍p-yok. Ngài oi chhai ngì mien-chhièn hàng thai-sṳ, he sṳ-song só-yû ke thi-fông, só-yû ke mìn-chhu̍k m̀-sṳt khon-ko ke. Ngì si chû-vì ke mìn-chhu̍k voi khon-tó Ngài — Song-chú ke chok-vì, yîn-vi Ngài oi hiong ngì hàng tet-ngìn-kiâng ke sṳ. 11Ngài kîm-pû-ngit fûn-fu pûn ngì ke fap-li̍t, ngì oi chûn-sú. Chhai ngì chhièn-chin ke sṳ̀, Ngài oi kiuk-chéu Â-mô-li-ngìn, Kâ-nàm-ngìn, Het-ngìn, Pí-li-sé-ngìn, Hî-vi-ngìn lâu Yâ-pu-sṳ̂-ngìn. 12Ngì oi kiún-sṳ́m, cho-m̀-tet lâu ngì oi-hi ke thi-fông ke ngìn-mìn li̍p-yok, yîn-vi ke-voi sàng-cho ngì chṳ-miang ke lò-mióng. 13Ngì-têu fán-chón oi chhak-thet kì-têu ke chi-thàn, tá-sui kì-têu ke sṳ̀n-chhû, chám-vang kì-têu ke Â-sa-lâ ńg-sṳ̀n siong.

14“Cho-m̀-tet kin-pai phe̍t ke sṳ̀n-mìn, yîn-vi Ngài — Song-chú he chôn-chhìn ke Song-ti, Ngài ke miàng ôn-to ‘Chôn-chhìn-chá’#34:14 “Chôn-chhìn-chá” ya-he yi̍t-cho “Chhit-tu-chá” ya-he “Khí-sià-chá”, khon Chhut Âi-khi̍p Ki 20:5.. 15Cho-m̀-tet lâu tông-thi ke ngìn-mìn li̍p-yok, kiâng-pha kì-têu pai chhṳ-kâ ke sṳ̀n-mìn, hàng kiên-yìm, hien-chi ke sṳ̀, voi yêu-chhiáng ngì hi chhâm-kâ, ngì voi pûn-ngìn yín-yu hi-sṳ̍t kì-têu hien-pûn sṳ̀n-mìn ke chi-vu̍t. 16Kiâng-pha ngì ke lai-é lâu phe̍t-chhu̍k ke se-moi-é thûng-fûn, ke-têu se-moi-é pai chhṳ-kâ ke sṳ̀n-mìn, hàng kiên-yìm, ngì ke lai-é chhiu voi thèn-tén hi-pai phe̍t ke sṳ̀n-mìn, hàng kiên-yìm.

17“Cho-m̀-tet chu-chho ya-he kin-pai sṳ̀n-siong.”

18“Oi sú Chhù-kau-chiet. Ngì oi chûn-cheu Ngài ke fûn-fu, chhai Â-pit-ngie̍t sṳ̍t vù-kau-piáng chhit-ngit, yîn-vi ngì he chhai Â-pit-ngie̍t lì-khôi Âi-khi̍p ke.

19“Só-yû thèu-thôi ke lai-é lâu só-yû thèu-thôi kú ke thèu-sâng, mò-lun he ngiù he yòng, chhiòn-phu su̍k Ngài; 20chúng-he ngì oi-yung se-yòng su̍k-chón só-yû thèu-thôi ke lì, na m̀ su̍k chón-hi, chhiu-oi tá-thôn kì ke kiáng-kîn. Ngì chṳ́-sûn chûng só-yû thèu-thôi ke lai-é chhiòn-phu oi su̍k chón-hi.

“Cho-m̀-tet khûng-sú lòi kin-pai Ngài.

21“Ngì liuk-ngit oi kûng-chok, chúng-he thi-chhit ngit, ngì yit-thin oi hiet-khun; chhiu-son kâng-chung ya-he sû-kot khì-kiên, ya oi hiet-khun.

22“Chhai khôi-sṳ́ sû-kot sîn-chhut ke ma̍k-é ke sṳ̀ oi sú Chhit-chhit Sû-kot-chiet; chhiû-kui sû-chhòng nùng-sán-vu̍t ke sṳ̀, oi sú Sû-chhòng-chiet.

23“Yit-ngièn sâm-pái, só-yû nàm-ngìn chhiòn-phu oi-lòi chhèu-pai Ngài — Chṳ-kô ke Song-chú, Yî-set-lie̍t ke Song-ti. 24Ngài oi tui ngì mien-chhièn kiuk-chhut kok mìn-chhu̍k, khok-chán ngì ke kin-kie; ngì yit-ngièn sâm-pái sông-hi chhèu-pai Ngài — Song-chú, ngì Song-ti ke sṳ̀, m̀-voi yû-ngìn chhîm-lio̍k ngì ke koet-thú.

25“Ngì hien sên-chi ke sṳ̀, cho-m̀-tet nâ sên-chi ke hiet lâu yû-kau ke piáng khiung-ha hien. Phàn-ko-chiet chhṳ̀ ke thèu-sâng cho-m̀-tet liù-to kak-ngit chêu-sṳ̀n.

26“Tak-ngièn oi chiông ngì só sû-sṳ̀n chui-hó ke sîn-chhut nùng-sán-vu̍t tai-to Song-chú — ngì Song-ti ke sṳn-thien.

“Cho-m̀-tet yung yòng-mà ke nen lòi chú se yòng-è.”

27Song-chú tui Mô-sî kóng: “Chiông liá-têu fa siá hâ-lòi; yîn-vi Ngài oi yung liá-têu fa cho kîn-kí, thùng ngì lâu Yî-set-lie̍t-ngìn li̍p-yok.” 28Mô-sî chhai Song-chú ke-vi thìn-liù si-sṳ̍p ngit-ya, mò-sṳ̍t mò-lîm. Kì chiông liá-yok ke fa, chhiu-he sṳ̍p-thiàu kie-min, siá chhai lióng-te sa̍k-pán táng.

Mô-sî tui Sân-táng Hâ-lòi

29Mô-sî tai-tén sṳ̍p-thiàu-kie ke lióng-te sa̍k-pán tui Sî-nai-sân hâ-lòi ke sṳ̀, mien-mau hâu-kông, yîn-vi kì lâu Song-chú kóng-ko fa; chúng-he kì chhṳ-kâ m̀-tî. 30Â-lùn lâu Yî-set-lie̍t ngìn-mìn khon-tó Mô-sî mien-song ke yùng-kông, m̀-kám vá-khiun kì. 31Mô-sî ham kì-têu ko-lòi; Â-lùn lâu ke-têu fi-chung ke liâng-chhiu lûng-chúng hàng chhièn-lòi, Mô-sî chhiu lâu kì-têu kóng-fa. 32Sùi-heu Yî-set-lie̍t ngìn-mìn chhiòn-phu lòi-to Mô-sî mien-chhièn, Mô-sî chhiu chiông Song-chú chhai Sî-nai-sân kâu-tai pûn kì ke fap-li̍t chhiòn-phu lâu ngìn-mìn kóng. 33Mô-sî lâu kì-têu kóng-so̍t, nâ pha-é êm chhṳ-kâ ke mien. 34Tak-pái Mô-sî chin-ngi̍p sṳn-chong-phùng lâu Song-chú kóng-fa, yit-thin chiông pha-é hiên hí-lòi, chhut-lòi ke sṳ̀ chhiu chiông Song-chú só fûn-fu ke fa lâu Yî-set-lie̍t ngìn-mìn kóng. 35Kì-têu khon-tó kì ke mien hâu-kông; yèn-heu Mô-sî chai yung pha-é êm-mien, tén-to chai ngi̍p-hi lâu Song-chú kóng-fa chang hiên khôi-lòi.

Currently Selected:

Chhut Âi-khi̍p Ki 34: THV12Rdb

Highlight

Copy