Chhut Âi-khi̍p Ki 33

Song-chú Min-lin Yî-set-lie̍t-ngìn Lì-khôi Sî-nai-sân

1Song-chú tui Mô-sî kóng: “Ngì lâu ngì tui Âi-khi̍p thu chhut-lòi ke ngìn-mìn oi lì-khôi liá thi-fông, to Ngài yin-hí su-pûn Â-pak-lâ-hón, Yî-sat, Ngâ-kok, lâu kì-têu heu-thoi ke thú-thi hi. 2Ngài oi phai thiên-sṳ́ thu ngì; Ngài oi kiuk-chéu Kâ-nàm-ngìn, Â-mô-li-ngìn, Het-ngìn, Pí-li-sé-ngìn, Hî-vi-ngìn lâu Yâ-pu-sṳ̂-ngìn. 3Ngì oi hi ke thi-fông he liù-nen-lâu-me̍t ke hó thi-fông. Chúng-he, Ngài m̀ lâu ngì-têu khiung-ha hi; yîn-vi ngì-têu tông ngang-kiáng, kiâng-pha Ngài voi chhai lu-hong chiông ngì-têu sêu-me̍t thet.”

4Ngìn-mìn thâng-tó liá fái sêu-sit, chhiu tông pî-sông, mò-ngìn chai tai chông-sṳt-phín, 5yîn-vi Song-ti yû fûn-fu Mô-sî chón-ko Yî-set-lie̍t-ngìn, kóng: “Ngì-têu he ngang-kiáng ke ngìn; na-he Ngài lâu ngì-têu khiung-ha hi, yit-ha-é, Ngài chhiu voi chiông ngì-têu sêu-me̍t thet. Liá-ha ngì-têu oi chiông sṳ̂n-song ke chông-sṳt-phín chhiòn-phu pok hâ-lòi, Ngài chang kiet-thin ngióng-pân chhú-lî ngì-têu.” 6Só-yî, Yî-set-lie̍t-ngìn lì-khôi Hò-lie̍t-sân yî-heu, chhiu mò-ngìn chai tai chông-sṳt-phín.

Sṳn-chong-phùng

7Tak-pái Yî-set-lie̍t-ngìn ôn-yàng, Mô-sî chhiu chiông yit-chông chong-phùng tap chhai lì yàng kha yén ke thi-fông; liá chong-phùng ôn-to sṳn-chong-phùng#33:7 “sṳn-chong-phùng” ngièn-vùn chhṳ̍t-yi̍t he “siông-kien ke chong-phùng”. Liá sṳn-chong-phùng he chhiam-sṳ̀ ke, yèn-heu von ko nang-ngoi yit-chông yû yok-khui, chi-thàn, tén-tén ke sṳn-chong-phùng.. Só-yû oi khiù-mun Song-chú ke ngìn chhiòn-phu to ke-vi hi. 8Tak-pái Mô-sî chhut yàng to sṳn-chong-phùng hi, ngìn-mìn chhiòn-phu khî chhai chhṳ-kâ ke chong-phùng héu, khon-tén Mô-sî, chhṳ̍t-to kì chin-ngi̍p sṳn-chong-phùng. 9Mô-sî ngi̍p-hi yî-heu, yùn-chhû chhiu kong hâ-lòi, thìn chhai sṳn-chong-phùng mùn-héu; Song-chú chhiu tui yùn-tú hiong Mô-sî kóng-fa. 10Ngìn-mìn yit khon-tó yùn-chhû thìn chhai sṳn-chong-phùng mùn-héu, tak-sà chhiu chhai chhṳ-kâ ke chong-phùng héu khúi-pai. 11Tak-pái Song-chú lâu Mô-sî mien-tui-mien kóng-fa, chhiong ngìn lâu phèn-yû kóng-fa yit-yong. Mô-sî chón-yàng ke sṳ̀, kì ke heu-sâng chhu-sú — Nun ke lai-é Yok-sû-â liù chhai sṳn-chong-phùng tú.

Song-chú Yin-hí lâu Chṳ́-mìn Thùng-chhai

12Mô-sî tui Song-chú kóng: “Ngì fûn-fu ngài thu ngìn-mìn to ke thi-fông hi, chúng-he Ngì pin-mò chṳ́-sṳ ngài oi phai má-ngìn lâu ngài khiung-ha hi. Ngì kóng-ko Ngì chhin liáu-kié ngài, ya fôn-hí ngài. 13Án-ngiòng, khiù Ngì chiông Ngì ke kie-va̍k chṳ́-sṳ ngài, sṳ́ ngài tô ngin-sṳt Ngì, ki-siu̍k chhai Ngì mien-chhièn mùng-ên. Khiù Ngì ki-tet liá mìn-chhu̍k he su̍k Ngì ke.”

14Song-chú kóng: “Ngài chhṳ-kâ oi lâu ngì khiung-ha hi; Ngài oi kám-séu ngì ke chhûng-tâm.” 15Mô-sî en-kóng: “Na-he Ngì chhṳ-kâ m̀ lâu ngài-têu khiung-ha hi, khiù Ngì m̀-hó ham ngài-têu lì-khôi liá-vi. 16Na-he Ngì m̀ lâu ngài-têu khiung-ha hi, ngióng-voi yû-ngìn tî ngài lâu Ngì ke chṳ́-mìn he chhai Ngì mien-chhièn mùng-ên ke? Ngì ke thùng-chhai sṳ́ ngài-têu lâu sṳ-song khì-thâ mìn-chhu̍k yû fûn-phe̍t.”

17Song-chú tui Mô-sî kóng: “Ngài oi cheu ngì só-khiù ke cho; yîn-vi Ngài chhin liáu-kié ngì, ya fôn-hí ngì.”

18Só-yî Mô-sî kóng: “Khiù Ngì pûn ngài khon-tó Ngì ke yùng-kông.”

19Song-chú en-kóng: “Ngài oi hién-chhut Ngài só-yû ke ên-fi, chhai ngì mien-chhièn kîn-ko, pin siên-ko Ngài ke sṳn-miàng. Ngài he Song-chú; Ngài oi sṳ̂-ên pûn má-ngìn, chhiu sṳ̂-ên pûn kì; Ngài oi lìn-mén má-ngìn, chhiu lìn-mén kì. 20Ngài m̀-pûn ngì khon-tó Ngài ke mien-mau, yîn-vi khon-tó Ngài ke ngìn chhiu-voi mò-miang. 21Chúng-he chhai Ngài ke sùn-thèu yû yit-ke thi-fông, ngì cho-tet khî chhai ke-chak phàn-sa̍k táng. 22Tông Ngài ke yùng-kông kîn-ko ke sṳ̀, Ngài voi chiông ngì piong chhai sa̍k-khûng tú, yung Ngài ke sú châ-tén ngì, tén Ngài ko-hi, 23yèn-heu Ngài oi sû-chón Ngài ke sú; ngì chhiu voi khon-tó Ngài ke poi-nòng, chúng-he cho-m̀-tet khon Ngài ke mien-mau.”

Currently Selected:

Chhut Âi-khi̍p Ki 33: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)