Chhut Âi-khi̍p Ki 19

Yî-set-lie̍t-ngìn Chhai Sî-nai-sân

1Yî-set-lie̍t-ngìn lì-khôi Âi-khi̍p, tú-hó chhai mân sâm-ke ngie̍t ke-ngit to Sî-nai sâ-mo̍k. 2Kì-têu siên lì-khôi Li-fî-tâng, yèn-heu to Sî-nai sâ-mo̍k, chhai Sî-nai sân-hâ ôn-yàng. 3Mô-sî sông-sân hi chhèu-kien Song-ti.

Song-chú tui sân-táng fû-ham Mô-sî kóng: “Ngì oi án-ngiòng lâu Ngâ-kok ke chṳ́-sûn Yî-set-lie̍t-ngìn kóng: 4‘Ngì-têu yí-kîn khon-tó Ngài — Song-chú ngióng-pân tui-fu Âi-khi̍p-ngìn. Ngài pà-tén ngì-têu, chhiu-chhiong ên-tiâu mà chiông se ên-tiâu pà chhai yi̍t-kap táng, chiông ngì-têu tai-to liá-vi lòi-kûi Ngài. 5Na-he ngì-têu sun-chhiùng Ngài, sú Ngài ke yok, ngì-têu chhiu-oi chhai van-mìn chûng cho Ngài pó-pi ke chṳ́-mìn. Chhiòn sṳ-kie lûng-chúng su̍k Ngài, 6chṳ́-yû ngì-têu kûi-su̍k Ngài cho chi-sṳ̂ ke koet-thu, cho sṳn-kiet ke koet-mìn.’ Liá-têu fa ngì oi lâu Yî-set-lie̍t-ngìn kóng.” 7Só-yî Mô-sî hâ-sân, seu-si̍p ngìn-mìn ke liâng-chhiu, chiông Song-chú min-lin kì ke sṳ chhiòn-phu lâu kì-têu kóng. 8Ngìn-mìn thùng-sâng en-kóng: “Ngài-têu oi chûn-cheu Song-chú ke fa cho.” Mô-sî chhiu chiông kì-têu ke fa hiong Song-chú po-ko.

9Song-chú tui Mô-sî kóng: “Ngài oi chhai phûn-phûn ke yùn-chûng kong-lìm to ngì ke-vi, pûn Ngài ke chṳ́-mìn thâng-tó Ngài lâu ngì kóng-fa, sṳ́ kì-têu vàn-chhiòn siông-sin ngì.”

Mô-sî chiông ngìn-mìn ke fa hiong Song-chú po-ko. 10Song-chú yu tui kì kóng: “Ngì hi lâu ngìn-mìn kóng, kîm-pû-ngit lâu thiên-kông-ngit kì-têu oi kiet-chhiang chhṳ-kâ, sâm-fu ya oi sé-chhiang, 11to thi-sâm ngit chhiòn-phu oi chún-phi hó. Ke-ngit, Ngài — Song-chú oi kong-lìm chhai Sî-nai sân, pûn só-yû ke ngìn-mìn khon-tó Ngài. 12Ngì oi chhai sân ke si-vì cho ki-ho, min-lin ngìn-mìn cho-m̀-tet chhêu-ko kie-han, ya cho-m̀-tet sông-sân, ya-he tha̍p-tó liá-sân. Tha̍p-tó liá-sân ke ngìn, oi pûn kì sí. 13Oi yung sa̍k-thèu te̍p-sí ya-he yung chien sa-sí, mò-lun má-ngìn chhiòn-phu put-chún miâ kì ke sṳ̂-thí. Ngìn lâu thèu-sâng chhiòn-phu oi chûn-sú; fam-tó ke oi pûn kì sí. Oi tén phùn yòng-kok ke sâng chhòn-lòi, ngìn-mìn chang cho-tet sông-sân.”

14Mô-sî hâ-sân fûn-fu ngìn-mìn, oi kì-têu kiet-chhiang chhṳ-kâ, chún-phi kin-pai. Kì-têu chhiu sé-chhiang sâm-fu; 15Mô-sî lâu kì-têu kóng: “To thi-sâm ngit yit-chhiet oi chún-phi hó; chhai liá khì-kiên cho-m̀-tet yû fòng-sṳ.”

16Thi-sâm ngit chêu-sṳ̀n, lùi-kûng kín-hióng, ngiap-lang mò-thìn, yû phûn-phûn ke yùn chhai sân-táng chhut-hien, yu thâng-tó phùn yòng-kok ke sâng chhin-hióng. Yàng-tú ke ngìn-mìn chhiòn-phu pi̍t-pi̍t-chhat. 17Mô-sî tai-liâng kì-têu chhut yàng lòi chhèu-kien Song-ti; kì-têu chhiòn-phu khî chhai sân kiok-hâ. 18Kûi-chak Sî-nai-sân pûn fó-yên châ-tén, yîn-vi Song-chú chhai fó-chûng kong-lìm. Ke fó-yên chhiong fó-yèu tú chhung chhut-lòi ke nùng-yên; kûi-chak sân thai-thai yèu-thung. 19Liá-sṳ̀ phùn yòng-kok ke sâng ye̍t-lòi ye̍t-hióng. Mô-sî kóng-fa, Song-ti hióng lùi-kûng en kì. 20Song-chú kong-lìm chhai Sî-nai sân-táng, ham Mô-sî sông-sân; Mô-sî chhiu sông-sân hi. 21Song-chú tui kì kóng: “Ngì hâ-hi kín-ko ngìn-mìn, cho-m̀-tet chhêu-ko kie-han lòi-khon Ngài, kiâng-pha chhin-tô ngìn voi-sí. 22Chhiu-lièn chi-sṳ̂ ya yit-thin siên kiet-chhiang chhṳ-kâ chang cho-tet hàng-khiûn Ngài; na-mò, Ngài voi chhut-lòi chit-fa̍t kì-têu.”

23Mô-sî tui Song-chú kóng: “Ngì ke chṳ́-mìn cho-m̀-tet sông Sî-nai sân; yîn-vi Ngì yí-kîn fûn-fu ngài-têu, oi chhai sân-piên li̍p kie-han, chiông liá-sân fûn-phe̍t cho sṳn-sân.”

24Song-chú tui Mô-sî kóng: “Ngì hâ-hi, chiông Â-lùn tai sông-lòi. Chúng-he chi-sṳ̂ lâu ngìn-mìn cho-m̀-tet chhêu-ko kie-han to Ngài liá-vi lòi, kiâng-pha Ngài voi chhut-lòi chit-fa̍t kì-têu.” 25Só-yî Mô-sî hâ-sân, chón-to ngìn-mìn ke-vi, chiông Song-chú ke fa lâu kì-têu kóng.

Currently Selected:

Chhut Âi-khi̍p Ki 19: THV12Rdb

Highlight

Copy