Chhut Âi-khi̍p Ki 13

Fung-hien Thèu-thôi

1Song-chú tui Mô-sî kóng: 2“Ngì-têu oi chiông chóng-chṳ́ fûn-phe̍t vì-sṳn kûi-pûn Ngài, yîn-vi Yî-set-lie̍t-ngìn ke chóng-chṳ́ lâu thèu-thôi ke thèu-sâng chhiòn-phu he su̍k Ngài ke.”

Chhù-kau-chiet

3Mô-sî tui Yî-set-lie̍t-ngìn kóng: “Oi ki-tet liá-ngit; liá-ngit ngì-têu lì-khôi Âi-khi̍p — ngì-têu cho nù-chhòi ke thi-fông. Liá-ngit he Song-chú yung Kì thai-nèn ke sú thu ngì-têu chhut-lòi ke ngit-è. Ngì-têu cho-m̀-tet sṳ̍t yû-kau ke piáng. 4Ngì-têu lì-khôi Âi-khi̍p ke liá-ngit he chhai Â-pit-ngie̍t, chhiu-he thi-yit chak ngie̍t. 5Song-chú sṳt tui ngì-têu ke chú-siên fat-sṳ, oi chiông Kâ-nàm-ngìn, Het-ngìn, Â-mô-li-ngìn, Hî-vi-ngìn lâu Yâ-pu-sṳ̂-ngìn ke thú-thi su-pûn ngì-têu. Song-chú chiông ngì-têu tai-ngi̍p liá liù-nen-lâu-me̍t ke thú-thi yî-heu, ngì-têu oi chhai tak-ngièn ke châng-ngie̍t khin-chuk liá chiet-khì. 6Chhit-ngit nui, ngì-têu yit-thin oi sṳ̍t vù-kau-piáng; chhai thi-chhit ngit, ngì-têu oi sú liá-chiet lòi ki-ngiam Song-chú. 7Chhai liá chhit-ngit nui, ngì-têu yit-thin oi sṳ̍t vù-kau-piáng. Ngì-têu ke kin-nui cho-m̀-tet yû-kau, ya-he yû-kau ke piáng. 8Chhai ke-ngit ngì-têu chhiu-oi tui lai-é kóng: ‘Liá he vi-tó ki-ngiam ngài-têu lì-khôi Âi-khi̍p ke sṳ̀ Song-chú só-hàng ke yit-chhiet.’ 9Sú liá chiet-khì he-oi thì-siáng ngì-têu, chhiu-chhiong chhai sú-hong ya-he ngiak-thèu cho yit-chak ki-ho, sṳ́ ngì-têu ki-tet oi ki-siu̍k phoi Song-chú ke fap-li̍t, yîn-vi Song-chú sṳt yung thai-nèn ke sú thu ngì-têu lì-khôi Âi-khi̍p. 10Tak-ngièn to liá sṳ̀-chiet, ngì-têu oi sú liá chiet-khì.”

Chóng-chṳ́

11“Chiông-lòi, Song-chú cheu Kì tui ngì-têu lâu ngì-têu ke chú-siên fat-sṳ, oi chiông ngì-têu thu-ngi̍p Kâ-nàm-ngìn ke thú-thi, chiông thi su-pûn ngì-têu, 12ke-sṳ̀, ngì-têu yit-thin oi chiông chóng-chṳ́ hien-pûn Song-chú. Thèu-thôi ke thèu-sâng chhiòn-phu ya he su̍k Song-chú. 13Ngì-têu oi yung se-yòng hi su̍k kûng-lì chón-lòi. Na-he ngì-têu mò tá-son su̍k kûng-lì chón-lòi, chhiu-oi áu-thôn kì ke kiáng-kîn. Ngì-têu yit-thin oi chiông chóng-chṳ́ su̍k chón-lòi. 14Chiông-lòi ngì-têu ke lai-é mun: ‘Liá he má-ke yi-sṳ nè?’ ngì-têu oi en-kóng: ‘Song-chú yung thai-nèn ke sú tui Âi-khi̍p — ngài-têu cho nù-chhòi ke thi-fông chiông ngài-têu thu chhut-lòi. 15Ke-sṳ̀, Âi-khi̍p-vòng sîm-ngang, m̀ piong ngài-têu chéu, Song-chú chhṳ̀-thet Âi-khi̍p só-yû ke thèu-thôi — pâu-hàm ngìn ke chóng-chṳ́ lâu thèu-thôi ke thèu-sâng. Só-yî, ngài-têu chiông só-yû thèu-thôi, kûng ke thèu-sâng, hien-pûn Song-chú, chúng-he chiông chóng-chṳ́ chhiòn-phu su̍k chón-lòi. 16Ngài-têu chûn-sú liá li-kûi he vi-tó thì-siáng ngài-têu, chhiu-chhiong chhai sú-hong ya-he ngiak-thèu cho ki-ho, sṳ́ ngài-têu ki-tet Song-chú sṳt yung thai-nèn ke sú tui Âi-khi̍p thu ngài-têu chhut-lòi.’ ”

Yùn-chhû lâu Fó-chhû

17Âi-khi̍p-vòng piong Yî-set-lie̍t-ngìn chéu ke sṳ̀, Song-ti mò tai kì-têu hàng Fî-li-sṳ hói-piên ke-thiàu kha-khiûn ke lu. Song-ti kóng: “Kiâng-pha Ngài ke chṳ́-mìn tù-tó chan-chên chhiu heu-fí, to-chón Âi-khi̍p hi.” 18Só-yî Song-ti tai kì-têu lit yén-lu, kîn-ko khóng-yâ, hiong Fùng-hói#13:18 “Fùng-hói” Hî-pak-lòi-vùn yi-sṳ he “Lù-chuk ke Fù”. hàng. Yî-set-lie̍t-ngìn lì-khôi Âi-khi̍p ke sṳ̀ yí-kîn chún-phi hó vú-chông chhut-chan.

19Mô-sî tai-tén Yok-sit ke kut-hài hi, yîn-vi Yok-sit sṳt ham Yî-set-lie̍t-ngìn ngiàm-ngiàm fat-sṳ, tui kì-têu kóng: “Song-ti yit-thin voi cheu-ku ngì-têu; yèn-heu ngì-têu oi chiông ngài ke kut-thèu tui liá-vi khiung-ha tai chón-hi.”

20Yî-set-lie̍t-ngìn lì-khôi Sû-kot, chhai sâ-mo̍k sùn-thèu ke Yî-thóng ôn-yàng. 21Ngit-sṳ̀-thèu, Song-chú hàng chhai kì-têu thèu-chhièn, yung yùn-chhû chṳ́-sṳ fông-hiong; am-pû-sṳ̀, Song-chú hàng chhai thèu-chhièn, yung fó-chhû cheu-tén kì-têu. Án-ngiòng, kì-têu ngit-ya lûng-chúng cho-tet hàng. 22Ngit-sṳ̀-thèu yû yùn-chhû, am-pû-sṳ̀ yû fó-chhû, yit-chhṳ̍t hàng chhai kì-têu thèu-chhièn.

Currently Selected:

Chhut Âi-khi̍p Ki 13: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)