Chhut Âi-khi̍p Ki 1

Yî-set-lie̍t-ngìn chhai Âi-khi̍p Su Fái Khoán-thai

1Yî-set-lie̍t ke-têu lai-é tak-sà tai-tén kâ-su̍k, lâu Ngâ-kok khiung-ha to Âi-khi̍p hi. Kì-têu ke miàng he: 2Lî-phien, Sî-mién, Li-vi, Yù-thai, 3Yî-sat-kâ, Sî-pu-lùn, Phien-ngâ-mén, 4Tan, Nâ-fut-thâ-li, Kâ-tet, Â-sat. 5Ngâ-kok chhòn-hâ ke chṳ́-sûn, chúng-su yû chhit-sṳ̍p ngìn. Ngâ-kok nang-ngoi yit-ke lai-é Yok-sit chó chhiu chhai Âi-khi̍p. 6Heu-lòi, Yok-sit sí-thet, kì ke-têu hiûng-thi lâu ke sṳ-thoi ke ngìn ya chhiòn-phu sí-thet. 7Chúng-he, kì-têu ke heu-thoi, chhiu-he Yî-set-lie̍t-ngìn, ngìn-khiéu chen-kâ tông-kiak, tông-vong tông-khiòng; Âi-khi̍p koet-nui tak-vi khon tet-tó kì-têu.

8Heu-lòi, Âi-khi̍p yû yit-ke sîn-vòng hîn-hí, kì tui Yok-sit ke sṳ vàn-chhiòn m̀-tî. 9Kì tui Âi-khi̍p-ngìn kóng: “Liá-têu Yî-set-lie̍t-ngìn yu-tô yu khiòng-chong, tui ngài-têu he chhin-thai ke vî-hia̍p. 10Na-he fat-sên chan-chên, kì-têu khó-nèn lâu thi̍t-ngìn lièn-ha̍p kûng-tá ên-têu, lì-khôi ngài-têu ke koet-kâ. Ngài-têu yit-thin oi sat-fap mo̍k pûn kì-têu ke ngìn-khiéu chen-kâ.” 11Só-yî Âi-khi̍p-ngìn chṳ́-phai kam-kûng, khiòng-pet Yî-set-lie̍t-ngìn cho khú-kûng, ham kì-têu hí Pí-tûng-sàng lâu Làn-sai-sàng, lòi-cho koet-vòng ke pú-kip chûng-sîm; yung liá fông-fap lòi tá-kit kì-têu ke sîm-chhìn. 12Chúng-he Âi-khi̍p-ngìn ye̍t fái khoán-thai Yî-set-lie̍t-ngìn, Yî-set-lie̍t-ngìn chhiu ye̍t-kiung ye̍t-tô, ngìn-khiéu fûn-phu ye̍t-fat; só-yî Âi-khi̍p-ngìn chhin-kiâng Yî-set-lie̍t-ngìn. 13Âi-khi̍p-ngìn khiòng-khiòng pet Yî-set-lie̍t-ngìn cho tông-chhûng ke khú-kûng, 14châu-tha̍p kì-têu, oi kì-têu lien-nài cho chôn-é, yu oi cho thièn-tú yit-chhiet ke kûng-chok, sṳ́ kì-têu fî-sòng thung-khú.

15Âi-khi̍p-vòng ham Hî-pak-lòi ke sán-phò lòi, yit-ke ôn-to Sṳ̂-fut-lâ, nang-ngoi yit-ke ôn-to Phú-â; kì fûn-fu kì-têu kóng: 16“Ngì-têu vi Hî-pak-lòi ke fu-ńg chiap-sên#1:16 “chiap-sên” Hî-pak-lòi-vùn chhṳ̍t-yi̍t he “chiap-sên, khon kì-têu chhô chhai lióng-te sa̍k-thèu hong oi kiung”. ke sṳ̀, na-he kì-têu kiung ke he se-lai-é, oi chiông kì chhṳ̀-thet; na-he se-moi-é, chhiu liù kì ke sâng-miang.” 17Chúng-he liá lióng-ke sán-phò kin-vi Song-ti, mò cheu Âi-khi̍p-vòng ke min-lin cho; kì-têu hàn-he liù se-lai-é ke sâng-miang. 18Só-yî Âi-khi̍p-vòng hêm lióng-ke sán-phò lòi, mun kì-têu: “Ngì-têu cho-má-ke án-ngiòng cho? Cho-má-ke liù se-lai-é ke sâng-miang nè?”

19Sán-phò en vòng kóng: “Hî-pak-lòi ke fu-ńg mò chhiong Âi-khi̍p ke fu-ńg; kì-têu tông chap, ngài-têu hàn-màng kón-to, kì-têu yí-kîn kiung lé.” 20-21Yîn-vi sán-phò kin-vi Song-ti, Song-ti thi̍t-phe̍t khon-ku kì-têu, pûn kì-têu yû chhṳ-kâ ke kâ-thìn. Yî-set-lie̍t-ngìn ki-siu̍k chen-kâ, ye̍t-lòi ye̍t-khiòng. 22Chui-heu, Âi-khi̍p-vòng min-lin chhiòn-koet ngìn-mìn kóng: “Hî-pak-lòi-ngìn#1:22 “Hî-pak-lòi-ngìn” he cheu yit-têu kú yi̍t-pún; Hî-pak-lòi-vùn mò liá kí-chak sṳ. yit-chhiet só-kiung ke se-lai-é, oi chhiòn-phu fit-lo̍k Nì-lò-hò, se-moi-é ke sâng-miang chhiu liù hâ-lòi.”

Currently Selected:

Chhut Âi-khi̍p Ki 1: THV12Rdb

Highlight

Copy

Want to have your highlights saved across all your devices? Sign up or sign in