Tan-yî-lî Sû 2

Nì-pu-kap-nì-sat Pot-mung

1Nì-pu-kap-nì-sat chhai-vi ke thi-ngi ngièn, kì pot yit-chak mung; liá mung hoi kì sîm-kôn lon chhiang-chhiang, soi m̀ lo̍k-kau. 2Só-yî, kì phai-ngìn ham son-miang ke, voi fap-su̍t ke, hàng sià-su̍t ke, lâu sên-siong-kâ#2:2 “sên-siong-kâ” ngièn-vùn chhṳ̍t-yi̍t he Kâ-le̍t-tí-ngìn, khó-nèn chṳ́ Pâ-pí-lùn ke ngàu-ngìn, chhai pún-sû chhut-hien kí-pái. lòi vi kì kié-mung. Liá-têu ngìn lòi-to, khî chhai vòng mien-chhièn ke sṳ̀, 3vòng tui kì-têu kóng: “Ngài pot yit-chak mung, sîm-kôn lon chhiang-chhiang, ngài oi tî ke-chak mung ke yi-sṳ.”

4Liá-têu ngìn yung Â-làn-fa tui vòng kóng:#2:4 Tui liá-vi to 7:28, ngièn-vùn he yung Â-làn-vùn siá ke, m̀-he yung Hî-pak-lòi-vùn. “Ngien vòng van-soi! Chhiáng chiông ke-chak mung lâu phu̍k-ngìn kóng, ngài-têu chhiu lòi vi vòng kié-sṳt.”

5Vòng en-kóng: “Ngài yí-kîn kiet-thin: Ngì-têu na mò chiông mung lâu ngài kóng, pin chiông mung ke yi-sṳ lâu ngài kié-sṳt, ngài oi chám-thôn ngì-têu ke sú-kiok, yu oi sṳ́ ngì-têu ke vuk sàng-cho lá-sap-tôi. 6Na-he ngì-têu chiông ngài ke mung kóng chhut-lòi, yu kié-sṳt mung ke yi-sṳ, ngài chhiu chióng-sóng ngì-têu, yu su chûn-yùng miàng-sâng pûn ngì-têu. Liá-ha, hó chiông ngài ke mung kóng chhut-lòi, kié-sṳt pûn ngài thâng.”

7Kì-têu chai en vòng yit-pái, kóng: “Chhiáng koet-vòng chiông mung lâu phu̍k-ngìn kóng, ngài-têu chang yû phan-fap vi vòng kié-sṳt.”

8Liá-sṳ̀, vòng thai-sâng kóng: “Ngài chó chhiu tî ngì-têu voi sióng-oi thô sṳ̀-kiên, yîn-vi ngì-têu tî ngài yí-kîn kiet-thin lé: 9Na-he ngì-têu kóng m̀-chhut ngài ke mung, ngài chṳ́-yû yit-ke phan-fap tui-fu ngì-têu. Ngì-têu thai-kâ kóng-hó, sióng-oi lon-kóng khî-phien ngài, oi tén-to chhìn-khóng kói-pien. Liá-ha kiak-kiak chiông ngài ke mung kóng chhut-lòi, ngài chhiu tî ngì-têu ton-chṳ̂n voi kié-mung.”

10Kì-têu en vòng kóng: “Sṳ-kie-song mò-ngìn yû khó-nèn chiông koet-vòng só-mun ke sṳ kóng chhut-lòi. Chhiùng-lòi m̀-sṳt yû yit-ke vòng tui son-miang ke, voi fap-su̍t ke, ya-he sên-siong-kâ án-ngiòng yêu-khiù; chhiu-son chhin ví-thai, chhin yû khièn-li̍t ke vòng ya m̀-sṳt án-ngiòng. 11Koet-vòng só-mun ke sṳ̍t-chhai thet-nàn fì-tap lé. Chhù-liáu sṳ̀n-mìn yî-ngoi, mò-ngìn yû phan-fap fì-tap, chúng-he sṳ̀n-mìn pin-mò he̍t chhai ngìn-kiên.”

12Vòng thai fat-khién, min-lin chiông Pâ-pí-lùn vòng-kiûng só-yû ke ku-mun chhiòn-phu chhú-sí. 13Só-yî vòng ke min-lin fat-chhut, oi chhṳ̀ chhiòn-phu ke ku-mun, ngìn ya hi chhìm Tan-yî-lî lâu kì ke-têu phèn-yû, oi chhṳ̀ kì-têu.

Song-ti Chṳ́-sṳ Tan-yî-lî

14Tan-yî-lî hi kien ke chṳp-hàng vòng min-lin ke sṳ-ví-chóng Â-lio̍k. 15Tan-yî-lî chhin chîn-lìn hó-choi mun Â-lio̍k, cho-má-ke vòng fat-chhut án-ngiàm ke min-lin. Â-lio̍k chhiu chiông sṳ-chhìn ke kîn-ko lâu kì kóng.

16Tan-yî-lî chhiu ngi̍p-hi khiù vòng pûn kì sṳ̀-kiên, hó sṳ́ kì vi vòng kié-sṳt ke-chak mung. 17Yèn-heu Tan-yî-lî chón-hi vuk-hâ, chiông sṳ-chhìn ke kîn-ko lâu kì ke phèn-yû Ha̍p-nâ-nì-ngâ, Mí-sâ-li lâu Â-sat-li-ngâ kóng. 18Kì yêu-khiù kì-têu hiong thiên-táng ke Song-ti khì-tó, khiù Kì lìn-mén, khí-sṳ liá-mung ke o-pi, miên-tet kì-têu lâu khì-thâ Pâ-pí-lùn vòng-kiûng ke ku-mun khiung-ha sí. 19Ke am-pû, Tan-yî-lî chhai yi-siong chûng tet-tó o-pi ke khí-sṳ. Só-yî, kì siung-chan thiên-táng ke Song-ti, kóng:

20Ngien Song-ti ke miàng tet-tó chhṳ̂n-siung,

sṳ-sṳ thoi-thoi mò-thìn!

Yîn-vi chṳ-fi lâu khièn-nèn chhiòn-phu su̍k Kì.

21Kì kói-pien sṳ̀-kiên, si-kui;

Kì fi-thet vòng, sat-li̍p vòng;

Kì su chṳ-sṳt pûn chhûng-mìn ngìn,

su chṳ-fi pûn thûng-tha̍t ngìn.

22Kì khí-sṳ o-pi ke sṳ;

Kì tî am-chûng só-yû ke sṳ;

kông yit-chhṳ̍t lâu Kì thùng-chhai.

23Ngài chú-siên ke Song-ti â,

ngài kám-chhia Ngì, siung-chan Ngì!

Ngì su-pûn ngài chṳ-fi lâu li̍t-liong;

Ngì thâng ngài ke khì-khiù,

chṳ́-sṳ ngài-têu oi ngióng-pân hiong vòng kié-mung.

Tan-yî-lî Vi Vòng Kié-mung

24Só-yî, Tan-yî-lî hi kien ke chṳp-hàng vòng min-lin ke Â-lio̍k, tui kì kóng: “Khiù ngì m̀-hó chhṳ̀-thet Pâ-pí-lùn vòng-kiûng ke ku-mun; tai ngài hi kien vòng, ngài voi vi vòng kié-sṳt kì ke mung.”

25Â-lio̍k chit-sṳ̀ tai Tan-yî-lî to Nì-pu-kap-nì-sat-vòng mien-chhièn, tui vòng kóng: “Ngài chhai ke-têu tui Yù-thai chok-lòi ke ngìn tông-chûng, chhìm-tó yit-sà yû fap-thu kié-sṳt vòng ke mung.”

26Vòng tui Tan-yî-lî (yu ham-cho Pak-thì-sâ-sat) kóng: “Ngì yû fap-thu chiông ngài pot ke mung kóng chhut-lòi, yu kié-sṳt mung ke yi-sṳ, he-mò?”

27Tan-yî-lî en-kóng: “Koet-vòng â, vòng-kiûng ke ku-mun, voi fap-su̍t ke, hàng sià-su̍t ke, ya-he son-miang ke, chhiòn-phu mò fap-thu hiong ngì kié-mìn liá o-pi ke sṳ; 28chúng-he, thiên-táng yû yit-ke khí-sṳ o-pi ke Song-ti, Kì yí-kîn chiông ngit-heu oi fat-sên ke sṳ chṳ́-sṳ Nì-pu-kap-nì-sat-vòng. Liá-ha ngài oi chiông vòng ke mung, chhiu-he vòng soi-thet ke sṳ̀ tet-tó ke yi-siong hiong vòng kié-sṳt.

29“Koet-vòng â, ngì soi-thet ke sṳ̀, mung-tó chiông-lòi ke sṳ. Khí-sṳ o-pi ke Song-ti chiông oi fat-sên ke sṳ chṳ́-sṳ vòng. 30Liá o-pi ke sṳ, ngài yí-kîn tet-tó khí-sṳ; liá pin m̀-he yîn-vi ngài pí phe̍t-ngìn kha chhûng-mìn, he oi pûn vòng tî liá-mung ke yi-sṳ lâu ngì sîm-tú sióng-oi mìn-pha̍k ke sṳ.

31“Koet-vòng â, ngì chhai yi-siong chûng khon-tó chhai ngì mien-chhièn yû yit-chho tông-kô tông-thai ke siong, fî-sòng chhiuk-muk, hìn-è tông tet-ngìn-kiâng. 32Liá siong ke thèu-nà he yung sùn-kîm cho ke, hiûng-phù lâu sú-pí he ngiùn-è cho ke, yêu-sṳ̂n lâu thai kiok-pí chhiòn-phu he thùng cho ke, 33kiok-koáng he thiet cho ke, kiok-phàn he pan-thiet pan-nài cho ke. 34Ngì khon-tén ke sṳ̀, yû yit-chak m̀-he yung ngìn ke sú chho̍k chhut-lòi ke thai sa̍k-thèu tui sân-táng chan hâ-lòi, chhong-tó ke-chho siong, chiông ke-sûng pan-thiet pan-nài ke kiok-phàn chhong sui-thet. 35Ke nài, thiet, thùng, ngiùn, kîm ngiàm-sṳ̀ ya cho yit-ha sui-thet, chhiong ngie̍t-thiên vò-thàng ke lùng-hông, pûn-fûng chhôi-san, chhiòn chhìm m̀-tó. Chúng-he ke thai sa̍k-thèu ye̍t-lòi ye̍t-thai, pien-cho yit-chho thai-sân, khièm-tén chhiòn-thi.

36“Liá chhiu-he koet-vòng pot ke mung. Liá-ha ngài-têu oi hiong ngì kié-sṳt. 37Koet-vòng â, ngì he só-yû kiûn-vòng chûng chui ví-thai ke vòng. Thiên-táng ke Song-ti sat-li̍p ngì cho vòng, su-pûn ngì koet-thu, khièn-piang, nèn-li̍t lâu chûn-yùng. 38Kì sṳ́ ngì thúng-chhṳ ngìn-lui só-he̍t ke sṳ-kie, kón-lî fî-niâu, chéu-chhu. Ngì he ke-chho siong ke kîm-thèu. 39Chhai ngì yî-heu voi yû nang-ngoi yit-chak ti-koet chhut-hien, chúng-he mò ngì ke koet án-thai; heu-lòi yu yû thi-sâm chak ti-koet chhut-hien, chhiu-he thùng ke ti-koet, oi thúng-chhṳ chhiòn sṳ-kie. 40Heu-lòi yû thi-si chak ti-koet, kì chhiong thiet-è án kiên-khiòng, nèn tá-sui só-yû ke tûng-sî. Chhiu-chhiong thiet-è tá-lan tûng-sî khiung-yong, kì oi tá-vang só-yû yî-chhièn ke ti-koet. 41Ngì só khon-tó ke pan-nài pan-thiet ke kiok-phàn lâu kiok-chṳ́, he péu-sṳ ke-chak ti-koet voi fûn-lie̍t; kì yû thiet ke li̍t-liong, yîn-vi kì he pan-thiet pan-nài ke. 42Pan-thiet pan-nài ke kiok-chṳ́ he péu-sṳ ke-chak ti-koet voi yit-pan khiòng yit-pan ngio̍k. 43Ngì khon-tó thiet lâu nài chhâm khiung-ha; liá he péu-sṳ ke-chak ti-koet ke thúng-chhṳ-chá sióng-oi yung thûng-fûn lòi thúng-yit tak mìn-chhu̍k#2:43 “ke-chak ti-koet ... mìn-chhu̍k” ya-he yi̍t-cho “ke ti-koet ke ngìn-mìn lâu kok-koet ke ngìn-mìn chhâm khiung-ha”., chúng-he mò phan-fap lièn-ha̍p hí-lòi, chhiu-chhiong thiet lâu nài cho-m̀-tet kap khiung-ha. 44Tông ke-têu vòng chhai-vi khì-kiên, thiên-táng ke Song-ti oi kien-li̍p yit-ke yún-yén ke koet. Liá-koet chhie̍t-tui m̀-voi pûn-ngìn cham-liâng, fán-chón oi chha̍t-tái fí-me̍t só-yû ke ti-koet lòi yún-yén chhòng-chhùn. 45Ngì khon-tó yit-chak m̀-he yung ngìn ke sú chho̍k chhut-lòi ke thai sa̍k-thèu, tui sân-táng chan hâ-lòi; ngì yu khon-tó kì chhong-sui kîm, ngiùn, thùng, thiet lâu nài cho ke siong. Ví-thai ke Song-ti oi pûn koet-vòng tî chiông-lòi oi fat-sên ke sṳ. Liá mung he chṳ̂n-sṳ̍t ke, kié-sṳt he khó-kho ke.”

Vòng Chióng-sóng Tan-yî-lî

46Nì-pu-kap-nì-sat-vòng phu̍k chhai thi-song, pai Tan-yî-lî, yu min-lin hiong kì hien lî-vu̍t lâu hiông. 47Vòng tui Tan-yî-lî kóng: “Yîn-vi ngì kié-sṳt liá o-pi ke sṳ, ngài tî ngì ke Song-ti he chung-sṳ̀n tî-poi chui ví-thai ke sṳ̀n, he van-vòng ke Chú, he khí-sṳ o-pi ke Song-ti.” 48Yèn-heu, vòng sóng-su Tan-yî-lî chhin-tô kui-chhung ke lî-vu̍t, yu sṳ̂n kì ke kôn-vi, phai kì kón-lî Pâ-pí-lùn-sén, pin sat-li̍p kì cho vòng-kiûng ku-mun ke chúng-kón. 49Vòng tap-yin Tan-yî-lî ke chhiáng-khiù, phai Sâ-tet-lâ, Mí-sâ, Â-pak-nì-kô kón-lî Pâ-pí-lùn-sén ke sṳ-vu; chúng-he Tan-yî-lî pún-ngìn hàn liù chhai vòng-kiûng fu̍k-sṳ vòng.

Currently Selected:

Tan-yî-lî Sû 2: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)