Â-mô-sṳ̂ Sû 5

Fû-ham Yî-set-lie̍t-ngìn Fí-kói

1Thâng â, Yî-set-lie̍t-ngìn, Ngài oi vi ngì-têu chhong yit-sú ôi-kô:

2Ngìn-kâ-ńg Yî-set-lie̍t yí-kîn tiet-tó,

hong m̀ hí-lòi lé.

Kì pûn-ngìn fit chhai thi-song,

mò-ngìn chiông kì fù hí-lòi.

3Chṳ-kô ke Song-chú án-ngiòng kóng: “Yî-set-lie̍t ke sàng, phai-chhut yit-chhiên ke pîn-é, chhûn yit-pak ke chón-lòi; phai-chhut yit-pak sà, chhûn sṳ̍p sà chón-lòi.”

4Song-chú hiong Yî-set-lie̍t-ngìn kóng: “Oi chhìm Ngài chang yû sâng-lu. 5M̀-hó to Phe̍t-sṳ-pâ hi lî-pai. M̀-hó to Pak-thi̍t-li hi chhìm Ngài; yîn-vi Pak-thi̍t-li voi mò-thet. M̀-hó hi Kit-kap; yîn-vi Kit-kap ke ngìn voi pûn-ngìn chok-hi.”

6Oi chhìm Song-chú, ngì-têu chang yû sâng-lu. Na-he ngì-têu m̀ hi chhìm Kì, Kì voi chhiong yit-chhṳn fó chiông Yok-sit ke heu-thoi sêu-thet. Liá-chhṳn fó voi chiông Pak-thi̍t-li ke ngìn-mìn sêu-thet, mò-ngìn voi tá-vû. 7Ngì-têu voi tù-tó châi-nan lé! Yîn-vi ngì-têu vâi-khiuk chṳn-ngi, châu-tha̍p ngìn-mìn ke khièn-li!

8Song-chú chhóng-chho sên-sṳ̀n,

chho Méu-sên lâu Chhâm-sên.

Kì ham ngit-sṳ̀-thèu pien-cho am-pû-thèu,

chiông vû-am pien-cho kông-mìn.

Kì chiông hói-yòng ke súi tó chhai thi-song.

Kì ke miàng he Song-chú.

9Kì sṳ́ sṳ-li̍t khiòng-thai ke me̍t-mòng,

sṳ́ sàng-pó pûn-ngìn tá vang-thet.

10Ngì-têu tông-nâu phe̍t-ngìn chhai fap-thìn chú-chhṳ̀ kûng-tho, kûng-chṳn vù-sṳ̂. 11Ngì-têu khî-fu khiùng-khú ngìn, chhióng kì-têu ke liòng-sṳ̍t; ngì-têu yung sa̍k-thèu hí chhin-chiâng ke thai-vuk, chúng-he chhie̍t-tui mò fap-thu he̍t; ngì-têu kâng-chung chhin-chiâng ke phù-thò-yèn, chúng-he chhie̍t-tui mò fap-thu lîm só-chhut ke chiú. 12Ngài tî ngì-têu ke chhui-ko tông-tô, chhui-ok tông-thai. Ngì-têu khî-fu hó-ngìn, pûn-ngìn sû-mâi, chhai fap-thìn yên-vóng khiùng-khú ngìn. 13Liá he sià-ok ke sṳ̀-thoi; mo̍k koai chhûng-mìn-ngìn chhiòn-phu m̀ kóng-fa lé.

14Oi chûi-khiù liòng-san, thot-lì sià-ok, ngì-têu chang yû sâng-lu. Án-ngiòng, chhiu cheu ngì-têu kóng ke, Song-chú — Van-kiûn ke Ngièn-soi Song-ti chang voi chṳn-kîn lâu ngì-têu khiung-ha. 15Nâu sià-ok, oi liòng-san, chhai fap-thìn sṳ̂n-chông chṳn-ngi. Án-ngiòng, khó-nèn Song-chú — Van-kiûn ke Ngièn-soi Song-ti chhiu voi hiong Yok-sit heu-thoi chhûn-tó ke ngìn sṳ̂-ên.

16Só-yî, Chṳ-kô ke Song-chú — Van-kiûn ke Ngièn-soi Song-ti án-ngiòng kóng: “Kiê-lu tak só-chhai voi yû pî-sông thai-kieu ke sâng, kóng: ‘Âi-châi! Âi-châi!’ Chhong ôi-kô ke ngìn chhiòn-phu pûn-ngìn chhiáng-thet lé, chṳ́-yû hi lâi kâng-chung-ngìn lòi then-sú thoi-kieu. 17Phù-thò-yèn tú chṳ́-yû thâng-tó pî-sông ke kieu-sâng. Liá-têu sṳ yit-thin voi fat-sên, yîn-vi Ngài oi lòi chit-fa̍t ngì-têu.” Song-chú án-ngiòng siên-pu lé.

18Tén Song-chú ke ngit-è lòi-to ke ngìn â, ngì-têu chhám lé! Song-chú ke ngit-è tui ngì-têu yû má-ke hó-chhu nè? Song-chú ke ngit-è tui ngì-têu he vû-am, m̀-he kông-mìn. 19Ke ngit-è to ke sṳ̀, ngì-têu mò só-chhai hó chéu-sám, chhiong yit-ke ngìn sám-ko sṳ̂-é, yu tù-tó yùng! Yu chhiong yit-ke ngìn chón-to vuk-hâ, tông-thiám ke sṳ̀, yung sú fù-piak, yu pûn sà ngâu-tó. 20Song-chú ke ngit-è voi tai-lòi vû-am, m̀-he kông-mìn; ke he sông-sîm ke ngit-è, mò yit-si̍t-é hî-mong.

21Song-chú án-ngiòng kóng: “Ngài chhin-nâu ngì-têu ke chiet-khì, ngiûn m̀-hâ ngì-têu ke thai-fi! 22Ngì-têu hien ke sêu-fa-chi lâu su-chi, Ngài m̀ chiap-su; hien tông-phì ke thèu-sâng cho phìn-ôn-chi, Ngài ya mò-oi khon. 23Ngài mò fôn-hí ngì-têu chhàu-nau ke kô-sâng, ya mò-oi thâng ngì-têu thàn-cheu ke khìm-sâng. 24Fán-chón, oi pûn kûng-phìn chhiong thai-súi kún-kún chhûng-tén hâ! Oi pûn kûng-ngi chhiong hâi-súi chhṳ̍t-chhṳ̍t liù-tén hi!#5:24 Pún-chiet ya-he yi̍t-cho “Fán-chón, oi pûn chṳn-ngi sṳ̂n-chông, chhîn-chhiong kún-kún yúng-chhut ke thai-súi! Oi pûn kûng-tho thûng-hàng, chhîn-chhiong chhòng-liù put-sit ke kông-hò!”

25“Yî-set-lie̍t-ngìn â, chhai khóng-yâ ke si-sṳ̍p ngièn, ngì-têu pin-mò hien má-ke sên-ngì ya-he lî-vu̍t pûn Ngài! 26Liá-ha ngì-têu pà-hí chhṳ-kâ tiâu-khiet ke ngiéu-siong — Sat-ku vòng-sṳ̀n lâu Kâ-vûn sên-sṳ̀n. 27Só-yî Ngài oi chiông ngì-têu kiuk-to Thai-mâ-sṳ-kiet ngoi-poi yén-yén ke só-chhai hi.” Song-chú án-ngiòng siên-pu lé; Kì ke miàng he Van-kiûn ke Ngièn-soi Song-ti.

Currently Selected:

Â-mô-sṳ̂ Sû 5: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)