Kô-lìm-tô Chhièn-sû 2

Kî-tuk Sṳ̍p-sṳ-ka ke Tho-lî

1Hiûng-thi chí-moi â, ngài thèu-pái hi ngì-têu ke-vi, pin mò yung má-ke chiâng ke fa ya-he kô-chhṳ̂m ke ho̍k-mun lòi tui ngì-têu chhòn-yòng Song-ti ke o-meu#2:1 “o-meu” yû-têu kú-kién he “kien-chṳn”.. 2Yîn-vi ngài kiet-yi, thùng ngì-têu khiung-ha ke sṳ̀, chhù-liáu Yâ-sû Kî-tuk lâu kì sí chhai sṳ̍p-sṳ-ka-táng ke sṳ-chhìn yî-ngoi, má-ke tû m̀ thì. 3Hàn-yû, chhai ngì-têu ke-vi ke sṳ̀, ngài kám-kok chhin ngiôn-ngio̍k, sîm-nui chhin kiâng, thai-thai chho̍k-kip. 4Ngài só-kóng ke tho-lî, só-chhòn ke fuk-yîm, lûng-chúng mò yung hó-thâng yû chṳ-fi ke fa, chṳ́-yû kho Sṳn-Lìn ke thai-nèn lòi kien-chṳn chṳ̂n-lî, 5sṳ́ ngì-têu ke sin-ngióng mò kîn-kí ngìn ke chṳ-fi, he kîn-kí Song-ti ke thai-nèn.

Song-ti ke Chṳ-fi

6Khì-sṳ̍t, tui ke-têu lìn-sin sṳ̀n-su̍k ke ngìn, ngài-têu ya kóng chṳ-fi. Chúng-he, m̀-he kóng liá sṳ-kiên ke chṳ-fi, ya m̀-he liá sṳ-kiên thúng-chhṳ-chá ke chṳ-fi; kì-têu ke khièn-sṳ chhiam-chhiam voi sêu-me̍t thet-hi. 7Ngài-têu só-kóng ke chṳ-fi he Song-ti o-meu ke chṳ-fi, pún-lòi tui ngìn he khong-tén ke, chhiu-he chhai sṳ-kie chhóng-chho yî-chhièn Song-ti yí-kîn yi-thin oi pûn ngài-têu tet yùng-kông ke chṳ-fi. 8Sṳ-kiên ke thúng-chhṳ-chá mò yit-ke tî liá chṳ-fi; na-he tî, kì-têu chhiu m̀-voi chiông yùng-kông ke Chú tâng chhai sṳ̍p-sṳ-ka-táng lé. 9Chhiong Sṳn-kîn só kóng:

Song-ti vi kin-oi Kì ke ngìn só yi-phi ke,

he ngìn muk-chû màng-sṳt khon-ko,

ngí-kûng màng-sṳt thâng-ko,

ngìn-sîm màng-sṳt sióng-ko ke!

10Chúng-he, Song-ti thûng-ko chhṳ-kâ ke Lìn chiông Kì ke o-meu khí-sṳ ngài-têu. Sṳn-Lìn nèn khon-theu só-yû ke sṳ, lièn Song-ti chhṳ̂m-chhṳ̂m khong-tén ke sîm-yi, Kì ya tî. 11Ngìn ke sîm-sṳ̂, chṳ́-yû chhṳ-kâ tî-poi ke lìn chang tî. Khiung-yong, Song-ti ke sṳ, ya chṳ́-yû Song-ti ke Lìn chang chhîn-chhú. 12Ngài-têu só liâng-su ke Lìn m̀-he liá sṳ-kiên ke lìn, he Song-ti só phai-lòi ke Lìn, hó-pûn ngài-têu tî Song-ti só su ngài-têu ke yit-chhiet ên-su.

13Só-yî, ngài-têu kóng-tho m̀-he yung ngìn ke chṳ-fi só-kâu ke fa, he yung Sṳn-Lìn só-kâu ke fa, tui su̍k Sṳn-Lìn ke ngìn#2:13 “tui su̍k Sṳn-Lìn ke ngìn” ya-he yi̍t-cho “yung su̍k Sṳn-Lìn ke fa”. kóng-lun su̍k-lìn ke chṳ̂n-lî. 14Chúng-he, ke-têu mò Song-ti ke Lìn ke ngìn mò fap-thu liâng-su Song-ti ke Lìn só pûn ke ên-su. Liá-chúng ngìn mò khó-nèn mìn-pha̍k liá-têu sṳ, kì-têu khon-cho he ngong-tong ke; yîn-vi liá-têu sṳ ke ka-chhṳ̍t oi yung su̍k-lìn ke muk-chû chang khon tet-chhut. 15Su̍k Sṳn-Lìn ke ngìn nèn phan-ton van-sṳ ke ka-chhṳ̍t, chúng-he mò-ngìn nèn phan-ton kì. 16Chhiong Sṳn-kîn só kóng:

Má-ngìn tî Chú ke sîm nè?

Má-ngìn voi kau-thô Kì nè?

Chúng-he, ngài-têu su̍k Sṳn-Lìn ke ngìn yû Kî-tuk ke sîm.

Currently Selected:

Kô-lìm-tô Chhièn-sû 2: THV12Rdb

Highlight

Copy

Want to have your highlights saved across all your devices? Sign up or sign in

Learn More About HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)