Matius 1
AYZ

Matius 1

1
Yesus Kristus hohos na
1Yesus Kristus hohos na to mfi fefo: Yesus Kristus tait ybam raa mana ro Daud, tna Daud ybam raa mana ro Abraham. 2Masmair rau to Abraham yabe Ishak, tna Ishak yabe Yakub, tna Yakub yabe Yehuda ysya yao na. 3Tna Yehuda yasen yabe Peres ysya Zerah mbam fai Tamar. Tna Peres yabe Hezron. 4Tna Hezron yasen yabe Ram, tna Ram yabe Aminadab, tna Aminadab yabe Nahason, tna Nahason yabe Salmon. 5Tna Salmon yabe Boas ybam fai Rahab, tna Boas yabe Obed ybam fai Rut. Tna Obed yabe Isai. 6Tna Isai yabe raja Daud, tna Daud yoo Uria yfain tna yabe Salomo. 7Tna Salomo yabe Rehabeam, tna Rehabeam yabe Abia, tna Abia yabe Asa. 8Tna Asa yabe Yosafat, tna Yosafat yabe Yoram, tna Yoram yabe Uzia. 9Tna Uzia yabe Yotam, tna Yotam yabe Ahas, tna Ahas yabe Hizkia. 10Tna Hizkia yabe Manasye, tna Manasye yabe Amon, tna Amon yabe Yosia. 11Tna wore wo raa mfot raa ro Yahudi makah mamoʼt Babel to, Yosia yabe Yekhonya ysya yao na. 12Raa ro Yahudi mamoʼt oo ro Babel to, Yekhonya yabe Sealtiel, tna Sealtiel yabe Zerubabel. 13Tna Zerubabel yabe Abihud, tna Abihud yabe Elyakim, tna Elyakim yabe Azor. 14Tna Azor yabe Zadok, tna Zadok yabe Akhim, tna Akhim yabe Eliud. 15Tna Eliud yabe Eleazar, tna Eleazar yabe Matan, tna Matan yabe Yakub. 16Tna Yakub yabe Yusuf ro yoo fai Maria, tna au mabe Yesus ro raa mtu Kristus tait.
17Maban Abraham raa mabe mamo snok Daud raa mabe to, biin beta trion 14 firwas wa. Tna maban Daud raa mabe mamo snok raa ro Yahudi raa mfot tna makah mamoʼt oo ro Babel to, biin trion 14 firwas ye. Tna maban tahun reto snok mam Kristus raa fnya mabe to biin 14 firwas wa ye.
Maria mabe Yesus
18Masmair rau ro Yesus Kristus fai Maria mabe to fefo: Maria msya Yusuf mbewok mkir anya sai fares, menohe Maria mrok mhaf. Maria mhaf reto to, mbam Har ro Tuhan. Maria msya Yusuf mbewok mjin su fefares. 19Tna Yusuf ynaut bait mam srau mato yawe yitsre Maria makus. Yusuf fi ait raa ro ja yno bo ro moof, tna ait ynaut yawe yno Maria masom mkair ma. 20Yusuf ynaut bo reto kri-kri to, tna ait yjin smi. Ait smi ymat malaikat Tuhan sau mbrah nenat kʼait tna mawe, “Yusuf, ku ro Daud yare: Waa ma. Noo Maria mamo nfain. Ku ro yhau kʼau mhaf retait tait ybam Har ro Tuhan meto. 21Meen Maria mabe Ku ro sme sait. Nafan Ku retait yasom Yesus. Ait oh mi meen yoo riof ro mase yee kʼraa wAit. Tna re Allah yyon iro wana to.” 22Tuhan yno bo weto beta mamo mnan si bo ro tiwya ykyas kʼanu raa wia. Tiwya ybis nabi rAit sait yama ykyas bo weto matim. Ait yawe,
23“Ku sau ro ja mjin msya raa su fefares to, kbe mhaf tna mabe Ku sme sait. Tna kbe raa mtu Ku retait yasom Imanuel.”
Yesaya 7:14
Imanuel mam mai ranu to 'Allah yatam anu'. 24Yusuf yrok yasen. Tna yno bo ro malaikat Tuhan riwai mawe kʼait: Ait yoo Maria mamo yfain. 25Menohe Yusuf yjin su ysya au fee mamo snok mam ati ro au mabe Ku sme retait. Tna Yusuf yafan Ku retait ytu yasom Yesus.

© 2005 Wycliffe Bible Translators, Inc. in cooperation with Yayasan Sumber Sejahtera, 2005


Learn More About Watum ro Tuhan Bosi ro Tna

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.