GENESIS 9
9
Noeywan Dios contrato rurasqanmanta
1Diosmi Noeyta hinaspa churinkunata bendecispan nirqa:
—Achka wawa-churiyoqyá kaychik, kay pachatayá huntachiychik. 2Qamkunatam katkatataspa manchakusunkichik purun animalkuna, alton pawaqkuna, allpapi llapallan qasqonpa puriqkuna chaynataq lamar qochapi challwakunapas. Chaykunapimá munaychakunkichik. 3Chaykunatam llapallanta qamkunaman qoykichik mikunaykichikpaq, verdura plantakunatapas qosqayta hinam qoykichik. 4Ichaqa amam mikunkichikchu kawsachiqnin yawarniyoq aychataqa. 5Cheqaptapunim qamkuna wañuchiq animaltaqa wañuchisaq, wañuchisaqtaqmi runamasin wañuchiq runatapas.
6Pipas runamasin wañuchiqtaqa
paytapas runamasintaqmi wañuchinqa.
Runaqa Diosman rikchakuqmi rurasqa karqa.
7Qamkunaqa achka wawa-churiyoqyá kaychik,
kay pachamanyá huntaychik,
kay pachapiyá miraychik.
8Diosmá Noeytawan churinkunata nirqa:
9—Kunanmi contratoyta rurani qamkunawan hinaspa qepaykichik hamuq miraynikichikwan, 10ruranitaqmi buquemanta qamkunawan lloqsimuq kay llapallan kawsaq animalkunawanpas, alton pawaq animalkunawanpas, uywa animalkunawanpas, purun animalkunawanpas chaynataq kay pachapi llapallan animalkunawanpas. 11Contratoytam rurani qamkunawan, manañam sinchi parawanqa wañuchisaqñachu llapallan kawsaqkunataqa, manañamá kanqachu sinchi paraqa kay pachata puchukachinanpaq. 12Qamkunawanpas chaynataq llapallan qamkunawan kaq kawsaqkunawanpas wiñaypaq contrato rurasqaypa señalninmi kayna kanqa: 13Chirapaytam churani puyupi, chay chirapam kay pachapi kawsaqkunawan contratoypa señalnin kanqa. 14Chaymi kay pachapa hawanman puyuchimuptiy chirapa puyukunapi rikurinqa. 15Hinaptinmi qamkunawan chaynataq llapallan animalkunawan contrato rurasqayta mana qonqasaqchu, manañam kanqachu sinchi paraqa chaynapi llapallan kawsaqkunaqa yakuwan manaña puchukananpaq. 16Puyupi chirapa rikurimuptinmi chayta qawaspay yuyarisaq llapallan kawsaqkunawan hinaspa kay pachapi animalkunawan wiñaypaq contrato rurasqayta —nispa.
17Diosmá nirqa Noeyta:
—Chay chirapam llapallan kay pachapi kawsaqkunawan contratoypa señalnin —nispa.
Noeymantawan churinkunamanta
18Buquemanta lloqsiq Noeypa churinkunam karqa: Sem, Cam hinaspa Jafet, Canaanpa taytanmi Cam. 19Noeypamá kimsa churinkuna karqa, paykunapa mirayninwantaqmi kay pacha huntasqa karqa.
20Chaymantam Noey chakrapi llamkayta qallarirqa hinaspam uvas huertata rurarqa. 21Chaymi vinota tomaruspan sinkarurqa hinaspam qalalla kachkarqa karpanpi. 22Hinaptinmi Canaampa taytan Cam rikururqa taytanqa qalalla kasqanta chaymi hawapi iskaynin wawqenkunaman willarqa. 23Chaymi Sem wawqen Jafetwan pachata aparikuspanku hombronkupa hawanman churaykuspa asuykurqaku qepanpalla hinaspankum taytankuta tapaykurqaku. Chaynapim taytankupa qalalla kaynintaqa mana rikurqakuchu.
24Sinkaruspa puñurusqanmanta Noey rikchariruspam sullka kaq churinpa rurasqanta yacharurqa. 25Chaymi nirqa:
¡Canaanqa ñakasqayá kachun!
¡Ayllunkunapa sirvientenmantapas
aswan humillasqaraqyá kachun!
26Noeyqa nirqataqmi:
Sempa yupaychasqan Tayta Diosqa alabasqayá kachun,
Canaanñataqyá paypa sirvienten kachun.
27 # Hebreo simipi Jafet ninanqa “hatunyachisqa” ninanmi. Jafettayá Dios hatunyachichun,
Sempa karpankunapiyá *f**yachachun,
Canaanñataqyá paypa sirvienten kachun.
28Sinchi para pasasqanmantam Noey kawsarqa kimsa pachak pichqa chunkan watataraq. 29Chaynaqa Noeymi isqon pachak pichqa chunkan watata kawsaruspan wañukurqa.
Currently Selected:
GENESIS 9: QUEAYA87
Highlight
Share
Copy
Want to have your highlights saved across all your devices? Sign up or sign in