GENESIS 39
39
Joseyta Potifarpa warmin munapayasqanmanta
1Egipto nacionman Joseyta aparuptinkum Potifar sutiyoq Egipto nacionniyoq runa rantirurqa apaqnin Ismael casta runakunamanta. Potifarqariki karqa Rey Faraonta waqaychaq soldadokunapa capitanninmi. 2Ichaqa Joseyta Tayta Dios yanapaptinmi favorecesqa karqa Egipto nacionniyoq patronninpa wasinpi kaspan. 3Patronninmi qawarqa Joseytaqa Tayta Dios yanapasqanta chaynataq tukuy rurasqanpipas Tayta Dios allinllataña favorecesqanta. 4Hinaptinmi Joseyta patronnin favorecerqa hinaspam churarqa wasinpi mayordomonpaq hinaspam tukuy kapuqninkunata confiaykurqa. 5Chaymi wasinta chaynataq tukuy kapuqninkunata cuentallikusqan punchawmanta Potifarpa wasinta Tayta Dios bendecirqa Joseyrayku. Chaymi Tayta Diospa bendicionnin karqa tukuy kapuqninpi, wasinpi chaynataq chakranpipas. 6Chaymi tukuy kapuqninta Joseyman dejaykuspan manaña imamantapas piensarqachu aswanqa mikunallanmantañam.
Joseyqa karqa buenmozo allin rikchayniyoqmi. 7Patronninpa warminmi Joseyta qawapayaq hinaspam nirqa:
—Ñoqawan puñuy —nispa.
8Joseyñataqmi mana munaspan nirqa patronanta:
—Patronniyqa wasinpi kaqkunamantaqa manam preocupakunchu, tukuy imantam confiaykuwan. 9Manam kay wasipiqa ñoqamanta aswan atiyniyoqqa pipas kanchu. Kayqayá wasinpi tukuy kaqta patronniy entregaykuwan ichaqa qamllatañam mana qowanchu warmin kasqaykirayku. ¿Imaynataq kay mana allinta ruraspayqa Diospa contranpiqa huchallikuyman? —nispa.
10Chay warmim sapa punchaw Joseyta hikutaq paywan puñunanpaq ichaqa Joseymi mana munarqachu. 11Chaymi huk punchaw, wasi allichaq Josey yaykuptin mana pipas wasipi karqachu. 12Hinaptinmi Joseypa pachanmanta chay warmi hapirurqa:
—Puñusun ñoqawan —nispan.
Ichaqa hawamanmi lluptikaramurqa warmipa makinpi pachantapas dejaramuspan. 13Chaymi makinpi Joseypa pachan quedaramusqanta warmi qawaykuspan 14qayarqa wasinpi sirvientenkunata hinaspam nirqa:
—Qawaychik, qosaypa pusamusqan Hebreo casta runam burlakuwachkanchikña. Paymi yaykumuwarqa puñunaykupaq chaymi hatunmanta qaparirqani. 15Qaparispay qayakuptiymi lluptiramurqa hawaman pachantapas ladoypi dejaruspan —nispa.
16Chay warmim Joseypa pachanta churarqa Joseypa patronnin wasiman kutimunankama. 17Chay warmimá chay wakin sirvientenkunaman rimasqanta hinalla qosanman willaspan nirqa:
—Hebreo casta pusamusqayki sirvientem yaykumuwarqa burlakuwananpaq 18chaymi qaparispay qayakuptiy lluptiramurqa hawaman pachantapas ladoypi dejaruspan. 19Kaytam rurawan sirvienteki —nispa.
Warmin chaynata willaykuptinmi Joseypa patronnin sinchita piñakururqa. 20Chaymi Joseyta churarurqa reypa presonkunapa kasqan carcelman hinaptinmi karqa chay carcelpi. 21Aswanqa Tayta Diosmi karqa Joseywan hinaspam favorecerqa, favorecechirqataqmi carcelpi jefewanpas. 22Chaymi Joseyman carcelpi kamachikuq jefe entregaykurqa carcelpi llapallan presokunata chaynapi payña cuentallikunanpaq, Joseymi chay carcelpi tukuy ima kamachikuq karqa. 23Carcelpi jefeqa Joseyman entregasqan punchawmantam mana preocupakurqachu Joseywanqa Tayta Dios kasqanrayku, Tayta Diosmi paypa rurasqanpi favorecerqa.
Currently Selected:
GENESIS 39: QUEAYA87
Highlight
Share
Copy
Want to have your highlights saved across all your devices? Sign up or sign in