Rom 3

Mɨtiʼa mo Zyɛm, myé ó njɨ é l'ocɨcyel

1Yé be no nɛʼɛ, wáa nyɔm mʉr ndɨ e we é jɔʼ nye ndɨ mbyɛla Yʉden ɨ? Esaŋɔ mpʉn nteme lé e wáa nyɔm? 2Yé e nyɔm é mozi mɨmɛh! Gumo nyɔm we ndɨ enyin ɨ, yé ó, Zyɛm a taare timle mɨngwiha mɨlɔb mye ó, bɨh oYʉden, ó bɨh baʼla mye. 3No ó, bɨna bé ólɛɛ ga é yé, tiibe e bʉr o b'a baajyɛʼ taa buʼo yɔɔ boo Zyɛm ɨ? Zê elele e mɨleme lɔɔ, lé ó e nkul ekamle Zyɛm lé edira monkɛʼ me ɛ? 4Hɨʼɨ, yé abe ba no. Dam be ó, bʉr bɨbɛh, bé ó mɨmpʉmpʉl, Zyɛm nyɛɛ, nye ekʉ ka lɛɛ ó njɨ ocyecye:

«É l'efu ó, go nkʉʼ dweŋɔ mokebe é jɔʼ bʉr lé ejoʼo mokan mo e.

ǃBé si jwɨʼla saa epur go é mpah mɨlɔb nɛʼɛ, gwɔɔ, go óbi mokebe.»

5Nuu mʉr óbɛm lɛɛ ó: «Bɨsyɛɛla bɨ ozyɛhozyɛh ga bɨna, byé egul Zyɛm ó, nye lɛʼla bʉr mpʉ nye ndɨ cɨcyel ɨ.» Bɨna bé óka lɛɛ ga é yé? Bɨna bé óbɛm yɨm nkpaa lé eko tɨʼ ó: «Zê Zyɛm, nye akœʼ é l'ozyɛhozyɛh é jɔʼ nye lé ekpaa empime e bɨna ga ɛ?» (Gumo me lé elwib nɨ, me elwib ó, é mpʉ mɨzɨze mɨ bʉr lé elwib ɨ!) 6Hɨʼɨ, yé abe ba no, ebe, nkʉ Zyɛm be ó be, l'abe e nkam lé edwe bɨna ga mobe ebe mɨsyem nɛʼɛ, mpa nye abe e nkul etiʼe bʉr bɨbɛh mɨlɔb.

7Yé nteme, yé ó mpʉ bé ndɨ e nkul elɛɛ ó: «Yé be ó, mpʉl wam, nye egʉa lɛʼle ocyecye mo Zyɛm, ndwe le esa ó, bʉr gumla nye nɛʼɛ, ebe yé nye lé edwe me mobe, le elɛɛ ó, mɨ sa syem ɨ?» 8Bɨn bɛɛ, bʉr o ndɨ elwib no e, ebe yé bɨn ndɨ aka to dolo lé elɛɛ nteme ó: «Bɨna saʼ ga ebebe, embɨa nkʉʼ buo pie tɨʼ» ɨ? Bʉʉ bʉr, bé efœʼ me é jɔʼ bé lé elɛɛ ó, me a si bana lɛɛ bɨsa mokan maa. Zyɛm ókab bʉr onɨ mɨmbi bɨntɨʼa lé ejala e be e!

Abe e mʉr ndɨ cɨcyel

9Yé be no nɛʼɛ, zê bɨh oYʉden o ndɨ elaa bʉʉ bʉr é mih mo Zyɛm? Hɨʼɨ, yé abe ba no. Me be ó si dwe oYʉden ndwe e bʉr o ndɨ abe oYʉden ɨ, mobe. Mɨsyem myɔɔ, myé ejwɨʼ ó bɨbɛh. 10Yé ó mpʉ yé ndɨ tila é Kalara Zyɛm ɨ. Yé ó tila ó:

«Abe e mʉr ndɨ cɨcyel. Abe e mʉr ngwar.

11Abe e mʉr lé egʉa sa ndɨ cɨcyel ɨ. Abe e mʉr lé esaa Zyɛm.

12Bʉr bɨbɛh, bé a si gʉmla é bebebebe zi.

Bɨbɛh, bɨ dwè ntuʼ é jɔʼ gwar.

Abe e mʉr lé ecwɨa e bʉʉ bʉr. Abe e mʉr ngwar.

13Mɨnʉm myɔɔ, myé é bebe, laa mofoo bé lwanbe kʉ gwii ɨ.

Mɨnʉm myɔɔ, myé ekʉ ka lwib ó njɨ bɨkʉʉŋʉ.

Sa lé eduho é mɨnʉm myɔɔ ɛ, yé ó mpʉ ful gurokɔɔ.

14Bɨlwib byɔɔ, byé ó lwɨŋla e mosyomlʉ ndwe e modwie.

15Bé ekpahbe fim mɨkam ó, njɨ lé eto jʉ bʉr.

16Gumo yiyɛh bé lé elaa ɛ, bé eliʼe pie koo wɔɔ ó

njɨ mokwar é tiilʉ, liʼe bʉr é vwaʼ.

17Bé agʉa zi edwe bʉr motala.

18Bé agʉa edwaabe Zyɛm.»

19Bɨna bé egʉa ga ó, sa yiyɛh ndɨ Kalara Zyɛm ɨ, yé ó é l'efu e bʉr o ndɨ é monkara mo mɛra motie e. Motie Zyɛm a tiile be e, mé epɨr bʉr bɨbɛh mɨnʉm, le edwe bɨbɛh mobe é mih me. 20Mʉr ákwoʼ bi mokebe é mih mo Zyɛm ebe mbi nye lé edu motie e. Motie, mé ekʉ ka sea syɛɛ ó njɨ yaa elɛʼle bɨna ga ó, bɨna ga bé ó bʉr o mɨsyem.

Mʉr, nye etiʼe ó, ebe buʼo ye

21To kœb ó, banana, Zyɛm, nyi lɛʼle bʉr ó, bé e nkul ebi mokebe, abe ó, bé edu motie mo Moyiz. Nye mʉr tɨʼ a si kar zi fih é l'efu le edwe bʉr baa mokebe. Motie mo Moyiz ndwe e sikʉlʉ ogwiha o mɨlɔb, bé a dwe e, yé eboʼlo ó, zi waa, nye ódibɔ. 22Zyɛm mu lé edwe bʉr mokebe é mih me ó, njɨ ebe taa buʼo bé lé ejyɛʼ boo Yesʉs-Krɨst ɨ. Zyɛm a kar zi waa ó, é l'efu e baa bɨbɛh lé ejyɛʼ taa buʼo yɔɔ boo nye e, ebe, bʉr bɨbɛh, bé ó jwɨʼ gwar. 23Bɨbɛh bé a be ó si sa syem. Kum mo Zyɛm mu ó si cɛra e be. 24Dam be no, Zyɛm, nye edwe be mokebe é mih me ó, é zi ncwɨncwɨa we, mʉr ajɛna sɔʼɔ. Nye edwe be mokebe maa ó, ebe, Yesʉs-Krɨst a si dwih be é mpila ebebe lɔɔ é pololo. 25Zyɛm a ntɨh Yesʉs ó, nye ntaʼ, ze dwè, jala e mɨsyem ga mina é l'efu ó, efie le nkʉʼ leʼe empime mo Sɔŋ. Nye a dwè ó, nye nkʉʼ kɛm bʉr, ó bé jyɛʼɛ taa buʼo yɔɔ boo nye é lɔb ndwɛa motié waa ɛ. É zea Yesʉs-Krɨst a ze e, Zyɛm a si lɛʼle mpʉ nye ndɨ cɨcyel ɨ. Mɨsyem bʉr, bé a bɛa sa-sa ɛ, Zyɛm a si bul dihbe mye, kʉ lɛŋ mye é buobuo, alwib. 26No ó, banana, nyi ka lɛʼle bʉr ó, nye mʉr tɨ, nye ó cɨcyel mʉr. Nye nteme, nye ó waa lé edwe bʉr o ndɨ ejyɛʼ taa buʼo yɔɔ boo Yesʉs ɨ, mokebe e.

27É mpʉ yé ndɨ no e, zê mʉr óbana to dolo lé edoʼo e bɨsyɛɛla bye nye mʉr tɨʼ ɛ? Hɨʼɨ, yʉʉ sɔʼɔ, yé abe no. Yé ndɨ ekamle bɨna lé edoʼo ga? Zê motie mo Zyɛm ó ndɨ ekamle bɨna ga lé edoʼo ɛ? Hɨʼɨ, sa ndɨ esa ó, bɨna beʼ l'aka doʼo ga ɛ, yé ó buʼo bɨna mu lé edu ga ɛ, 28ebe, mbea wih, wé ó, mʉr Zyɛm lé edwe mokebe e, nye ó waa lé ejyɛʼ taa buʼo ye boo Zyɛm ɨ. Nye adwe nye mokebe é dɔɔ mbaʼla motie we. 29Zê Zyɛm, nye ó njɨ waa oYʉden bé ome ɛ? Ntʉʼ nye ndɨ Zyɛm é l'efu e bʉr o bɨkul bɨfih nteme ɛ? Eee, nye ó kʉ be Zyɛm wɔɔ nteme, 30ebe, Zyɛm, nye ó njɨ ngwar! É nko paʼ bʉr o b'a saŋɔ mpʉn ɨ, nye edwe be mokebe ó, ebe taa buʼo bé lé ejyɛʼ boo Zyɛm ɨ. Nye edwe mokebe nteme ó, bʉr o b'a baasaŋɔ mpʉn ɨ, ebe buʼo gwar yaa. 31É jɔʼ bɨh lé elɛɛ lɔɔ buʼo ga yina ɛ, zê bɨh bé lé egbɛɛ motie ɛ? Hɨʼɨ, yé abe ba no. Bɨh bé elɨl motie maa ó, lɨl lɨlɨ.

Currently Selected:

Rom 3: ozmBad

Highlight

Copy

Compare