Yʉanes 15

Yesʉs ó ndɨ etin e rezɛŋ

1«Me ó mpaŋ etin e rezɛŋ. Sɔŋ wam ó b'a bè le. Nye nteme ó ndɨ ebaʼle le. 2Mɨlɔɔ mɨ tɨʼ mimyɛh ndɨ agumo mpumo e, nye etiʼe mye. No ó, mɨlɔɔ mimyɛh ndɨ e mpumo e, nye etiʼe-tiʼe bɨntoʼdu lé epah tɨʼ ɨ, le ekomlo mye ó, myé guma mpumo é buobuo. 3Motɨɨ me a dwe bɨn ɨ, mɨ pubo bɨn. Bɨn mu ó mɨpuba. 4Diʼe ga ɨ me, mɛm nteme ɨ bɨn. Lɔɔ rezɛŋ, wé abe e nkul egumo mpumo wé ome, anara e l'etin. Yé be ó, bɨn bé anara e me nɛʼɛ, lɛɛ ó, bɨn nteme bé abe e nkul egumo mpumo.

5«Me ó ndɨ etin e rezɛŋ; bɨn bɛɛ, bé ó mɨlɔɔ. Mʉr bɨh e nɔɔ ndɨ é zyɛŋa ɛ, nye ó ndɨ egumo mpumo é buobuo, ebe, ǃme baabe tɨʼ nɛʼɛ, gʉŋa ga ó, bɨn bé abe e nkul esa yʉʉ mpaŋ sɔʼɔ. 6Mʉr bɨh e nɔɔ ndɨ abe é zyɛŋa ɛ, nye ómyahɔ kʉl mpʉ lɔɔ rezɛŋ ndɨ agumo e, wé lé emyahɔ ɛ. Wé efwâh. Bé ntɔʼ syɛŋ mɨlɔɔ myaa, é syɛŋ, syɛŋ, guho mye é l'ebeʼe e siʼe. Myé ntɔʼ sie lé ediʼe. 7ǃBɨn si be é zyɛŋa wina, mokan mam loŋlo bɨn é mɨleme nɛʼɛ, dîʼe ga sa yiyɛh bɨn bé ókpɛl ɨ. Yé ósyɛɛ bɨn no. 8Sɔŋ wam óbi kum ó, é jɔʼ bɨn bé ógumo buobuo mpumo, le edi ompʉn bam ɨ.

9«Me ekpɛl bɨn mpʉ Sɔŋ wam lé ekpɛl me e. Diʼe ga é kpɛl yam tʉŋlʉ. 10ǃBɨn si du mɨtiila me lé etiile bɨn nɛʼɛ, bɨn bé óbe ó bʉr me lé ekpɛl ɨ, ebe, mɨ du mɨtiila Sɔŋ wam a tiile me e. Me egʉa nteme ó, nye ekpɛl me. 11Me elɛɛ bɨn no ó, bɨn soha mpʉ me lé esoho e. Me ekpɛl ó, bɨsʉhʉ bin, byé diʼe ntinɨ e ntinɨ. 12Me etiile bɨn tiila ó, kpɛla ga paʼra win, mpʉ me a kpɛl bɨn ɨ. 13Kpɛl ndɨ é bul laŋle bwaʼ ɛ, yé ó yaa mo mʉr lé edwe tiʼ ye é ziila e l'ofo be e. 14ǃBɨn si du motie me lé etiile bɨn nɛʼɛ, kʉ gʉa ó, bɨn bé óbe ó ofo bam. 15Me a taare jebe bɨn ó, osyɛl o mosa bam. No ó, me aŋa ka sa no, ebe, syɛl mosa, nye agʉa sa masa we lé esa ɛ. Me mu ó lé ejebe bɨn ó, ofo bam, ebe, mɨ gwih bɨn sa yiyɛh me a joʼo boo Sɔŋ wam ɨ. 16Ntʉʼ bɨn bé a pɛh me. Mɛm ó b'a pɛh bɨn. Me ó b'a lomo bɨn ó, bɨn toʼ, to gumo mpumo. Mpumo waa ódi njʉmdia e njʉmdia. No ó, Sɔŋ wam ódwe bɨn sa yiyɛh bɨn bé ódî le ejaʼ nye, pere e die lam ɨ. 17Etie me lé etiile bɨn ɨ, lé ó, bɨn kpɛla paʼra win.»

Bʉr o si nwa, bé mu lé eka bene ó, Yesʉs bé e l'ompʉn be.

18«ǃƗ bʉr o ndɨ egumo e si nwaʼ si nwim bɨn nɛʼɛ, gʉŋa ga ó, bé a taare lé enwim ó me. 19Nkʉ bɨn bé a be ó be, be bʉr o si nwaʼ nɛʼɛ, mpa bʉr o si nwa, bé a be ó si kʉ kpɛl bɨn, bʉr o ndɨ egumo e be e. To kœb ó, me a be ó si pɛh bɨn, pɛʼ bɨn é nkɔm bʉr o si nwa, gba bɨn é nkɔm wam. Ebe no ó bʉr o si nwaʼ mu si nwim bɨn ɨ. 20Toŋla ga sa me a lɛɛ bɨn ɨ: “Syɛl mosa álaa masa we é duu.” Yé be ó, bé a si tíile me nɛʼɛ, gʉŋa ga ó, bé ótíile bɨn nteme! Yé be ó, bé a si joʼo sikʉlʉ yam nɛʼɛ, gʉŋa ga ó, bé ójoʼo nteme yaa yin.

21«Sa gwar, bé ótíile bɨn ó, é lɔb wam, ebe, bé agʉa mʉr a ntɨh me e. 22Nkʉ me a be ó be, aze, ze lwib e be nɛʼɛ, mpa bé adweŋɔ mobe é lɔb mɨsyem myɔɔ. No ó, banana, bé aka be e nkar.

23«Mʉr lé enwim me e, nye enwim nteme ó Sɔŋ wam. 24Nkʉ me a be ó be, asa mbi bɨsyɛɛla nuu mʉr a baapa sa paʼra wɔɔ nɛʼɛ, mpa bé adweŋɔ mobe é lɔb mɨsyem myɔɔ. To kœb ó, banana, bɨ bee bɨsyɛɛla byam. Bé dina ó, lé ekʉ nwim bɨh e Sɔŋ wam. 25Sa gwar, bé esa no ó, lé edira lɔɔ ndɨ tila é l'okalara o motie bɔɔ ó: “Bé a nwim me ó, kʉ be mbɛh, bɨh e boo nɔɔ abe e lɔb.”

26«Mʉr ndɨ ekamle e bɨn ɨ, nye óze. Nye ó ndɨ Sisim Ocyecye, wé óduho boo Sɔŋ wam ɨ. Me ólomlo bɨn nya. Nye òduho boo Sɔŋ wam, ntɔʼ ze boʼlo lɔb wam. 27Bɨn bɛɛ nteme, bé óboʼlo lɔb wam waa, ebe, bɨna ga ó b'a be, duho é l'etɔɔrʉ.»

Currently Selected:

Yʉanes 15: ozmBad

Highlight

Copy

Compare