2 Korɛnt 6
6
1No ó, mpʉ bɨh lé esea e Zyɛm syɛɛ gwar yaa ɛ, no nteme ó bɨh lé ejwɨʼla e bɨn ó, é mpʉ Zyɛm mu si lɛʼle bɨn ncwɨncwɨa no e, abi ga ncwɨncwɨa waa mbɛh, 2ebe, yé ó tila ó:
«É jɔʼ me a bee mbɨmbɨa ó, me cwɨa ó e go e, me a si joʼo go.
É dobo me a pyal ó, me ntaʼ, ze dwe bʉr tiʼ molu mo mpoʼ mɨmɛh ɛ, me a si kɛm go.»
Jɔʼ Zyɛm a bee mbɨmbɨa ó, nye ejala le ecwɨa e bɨna ga ɛ, yé ó yi!
Dobo nye a cyel ó, nye ódwe bɨna ga tiʼ molu mo mpoʼ mɨmɛh ɛ, lé ó lɨ!
Mɨtuu mo Pol
3Bɨh bé aŋa gba bʉr mobɔʼ é zi, lé ekpɛɛ ó, mʉr amu twe. No nteme ó bɨh bé ósa syɛɛ-Zyɛm, mʉr adwe bɨh mobe tɨʼ ɨ. 4Bɨh bé elɛʼle é zi bɨsyɛɛla bih ó, bɨh bé ó kʉ be cyecye osyɛl o mosa mo Zyɛm. Bɨh bé esa no ó: lé esa zyee, lé edihbe mɨtuu e mɨndɛl, lé edihbe edi é mpila bɨsyɛɛ, lé edi e leme cyela kʉ, 5lé edihbe ebiʼe, lé edihbe mbʉʼ, lé edihbe bɨntʉ, lé edihbe mɨtuu, lé edihbe nkehe, lé edihbe eti mode. 6Bɨh bé elɛʼle bɨn bɨdweʼle, sa yé a lɛʼle bɨn ó, bɨh bé ó mɨlʉmlʉ ɨ. Yé a be ó: é l'ebò e cyen lɨh lé a be é pememe e, é ngwɨa wih, é bihbe wih, é ncwɨncwɨa wih, é bɨsyɛɛla bɨh lé esa é Mbɨambɨa Sisim ɨ, é kpɛl ndɨ eduho bɨh é mɨmo si ɨ, 7é tuno bɨh lé etuno ocyecye e, é nkul nɨnɨ mo Zyɛm, é mokʉa mo dɔm bɨh lé eguho, nkʉ ntɔʼ monkuo bɨh lé epemle mokʉa mo bʉʉ bʉr e tɨʼ ɨ. Mokʉa mo dɔm mɨh maa, mé ó ocɨcyel wih. 8Bɨh bé elɛʼle bɨn bɨdweʼle bɨ cye lʉmlʉ yih ó: é jɔʼ bé lé edwiibɨ bɨh, nkʉ sa bɨh pyeh e, é jɔʼ bé lé efœʼ bɨh nkʉ gumlo bɨh ɨ, é jɔʼ bé lé enʉa bɨh mpʉ mɨmpʉmpʉl, bɨh bɛɛ yɛɛ lé elɛɛ ocyecye e, 9é jɔʼ bé ndɨ enʉa bɨh mpʉ bʉr o ndɨ agʉŋɔ ɛ, bɨh bɛɛ yɛɛ bʉr o lé egʉŋɔ ɛ, é jɔʼ bé ndɨ enʉa bɨh mpʉ mɨmuu, bɨh bɛɛ yɛɛ bʉr o dina kʉ ɨ, é jɔʼ bɨh lé ekabɔ bɨntɨʼa, bɨh bɛɛ yɛɛ l'ajʉŋɔ ɛ, 10é jɔʼ bé sa ó, bɨh liʼɨ é gœʼra-gœʼra e mocyɛʼ mo nyʉl ɨ, bɨh bé eto dolo lé esoho é jɔʼ yiyɛh, é jɔʼ bɨh ndɨ é l'enteʼe, bɨh bɛɛ lé ekab buobuo bʉr mopoʼ e, é jɔʼ bɨh ndɨ é l'enteʼe e, bɨh bɛɛ yɛɛ lé entuʼba ɛ.
11Bɨh bé a si lwib e bɨn é l'ocyecye, obɨɔ bɨh, bʉr o Korɛnt. Bɨh bé ekpɛl bɨn é buobuo, kpɛl yaa lé eduho bɨh é mɨmo si. 12Bɨh bé a baabene bɨn. Bɨn ó lé ebene bɨh. 13No ó, me elwib e bɨn ó, mpʉ bwan bam. Saʼ ga bɨh syɛɛla lé ejala e kpɛl yih yaa ɛ. Kpɛlɨ ga bɨh nteme é buobuo!
Etiʼe nduula e bʉr o ndɨ abuʼla ɛ
14É syɛɛ-Zyɛm yin, adɨ baʼra ga mobo yɛɛ e bʉr o ndɨ abuʼla ɛ, ebe, wáa mbi zyɛŋa-mɨleme cɨcyel mʉr bé e bɨbla mʉr, bé e nkul ebe e nye e?#6.14 Motie 22.10 Myɛn e l'edurʉ, byé ó e nkul esyɛŋa nyá ɛ? 15Krɨst bé e Njwɨɨ moleme#6.15 É lwib grɛk, Pol a jebe Njwɨɨ moleme ó, Beliar., bé ó e nkul etwe twii wáa mbi? Nkʉ ntɔʼ ó, wáa mbi nkɔb mbuʼla ndɨ e nkul ebi, bé e mʉr ndɨ abuʼla ɛ, jwɨʼ gwar ɨ? 16Zê opara ndɨ esea é l'Odia mo Zyɛm tʉŋlʉ ɨ, bé e baa lé eto é mpah bé ndɨ edwiibɨ bɨbaŋabaŋa bɨdweʼle e, bé ó e nkul emɛʼle mɨlɔb é mbi ngwar ɛ?
Ebe, monyʉl ga mɨna, mé ó bana kʉ be Odia mo Zyɛm ndɨ kublakubla ɛ! Zyɛm nye mʉr tɨʼ a lɛɛ ó:
«Me ódi é sama yɔɔ, lé ekœʼ e be.
Me óbe ó Zyɛm wɔɔ. Bɛɛ, bé óbe ó bʉr bam.»
17Ebe no ó Da lé elɛɛ ó:
«Duha ga é sama yɔɔ. Bɔʼa ga e be.
Anyamle kuna ga e sa ndɨ elœʼ mʉr é mih mo Zyɛm ɨ.
No ó me ómɛʼle lé ebaʼle bɨn me ye e.
18Me óbe ó Sɔŋ win; bɨn bé óbe me ó bwan, mɨsile ndwe e mɨsoho.
No ó Zyɛm Nkul nyiwɛh ndɨ elɛɛ ɛ.»
Currently Selected:
2 Korɛnt 6: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
