2 Korɛnt 4

Fela sɔʼɔ bɨh ndɨ e we é mɨkaʼ tʉŋlʉ ɨ

1É mpʉ yé ndɨ ó, Zyɛm, nyi jwɨʼ bɨh nkoo lé etimle bɨh syɛɛ yiʼ ɨ, bɨh bé adimle nkul é monyʉl. 2Bɨh bé a nʉa tiʼa ó, bɨh bé aŋa sa bɨsyɛɛla bɨ fwon ndwe e byaa mofo, nkʉ sea e pɨʼ bɨkʉʉŋʉ. Lɔɔ Zyɛm bɨh bé a timlɔ, waa bɨh lé eyeʼle e, bɨh bé asiila sɔʼɔ tɨ. Bɨh bé ekʉ ka dwe ó njɨ mpaŋ sikʉlʉ ndɨ cyecye e. É mbi waa ó bɨh lé esa ó, mʉr nyiwɛh beŋɨ bɨh e mɨpɛhla mɨ leme ndɨ é pyɛɛɛ ɛ. Bɨh bé esa no ó, é mih mo Zyɛm. 3Yé ka be é bananaʼ ó, Mbɨambɨa Lɔɔ bɨh bé lé elɛɛ ɛ, wé enyin é dimlɨ-di-dimlɨ nɛʼɛ, bʉr mu si pɔhba ɛ, bé ome ó lé ebee we é mbi waa ɛ. 4Bʉr o ndɨ abuʼla ɛ, bé abe e pɨʼ ndɨ ó, bé joʼa lɔɔ wih, ntɔʼ buʼla we, ebe, Njwɨɨ mbi jɔʼ yiʼ a si dimle be pɨʼ. Nye esa no ó, nye kamla be lé ebee mɨmbah lé epan, duho é moncɛnba mo Krɨst ɨ. Nye ebene ó, bé amu bee moncɛnba maa é zi Mbɨambɨa Lɔɔ mo Yesʉs, bé ntɔʼ gʉa ó, Yesʉs ó ndɨ bana kʉ be gulo mo Zyɛm. 5Ebe, bɨh bé alɛɛ lɔɔ wih, bɨh bʉr o tɨ. Lɔɔ bɨh ndɨ elɛɛ ɛ, wé etiibe ó, e Da Yesʉs-Krɨst. No ó, é wih paʼ, bɨh bɛɛ ó ndɨ osyɛl o mosa bɨn é l'efu mo Yesʉs. 6Ebe, Zyɛm a lɛɛ ó: «Myɛn, wé pana, duho é l'edurʉ tʉŋlʉ.» Waa a lwib no e, a sa nteme ó, myɛn pana é mɨleme ga mina tʉŋlʉ. Myɛn waa ó lé esa ó, bɨna beŋɨ ga moncɛnba mo Zyɛm lé ebee Krɨst nye mʉr tɨ.

7To kœb ó, bɨh bʉr o ndɨ egʉa kum mo Zyɛm waa ɛ, bɨh bé ebaʼle okum waa ó, é mɨkaʼ mɨ deʼe tʉŋlʉ, é mbi ndɨ ó, yé nkʉʼ gʉa nyin é sʉlʉlʉ ó, nkul waa, nye ekʉ duho ó boo Zyɛm, abe é bɨh bʉr o tɨ. 8Mɨmbi mɨtuu mimyɛh, myé ó bɨh njɨ twii. Sa gwar, bé atíile bɨh é siilʉ. Bɨh bé ó mɨleme é mo é zaaama; sa gwar, bɨh bé apa pʉʼa é zi. 9Bé etíile bɨh; sa gwar, Zyɛm, nye aliʼe bɨh. Bé dam dumo bɨh si; sa gwar, bé abe e nkul ejʉ bɨh. 10Bɨjɔʼ bibyɛh, bɨh bé enkɛɛ efie mo Yesʉs é monyʉl mɨh, é mbi ndɨ ó, tiʼ mo Yesʉs nkʉʼ nyin bʉr é mih é zi bɨtiʼ bih. 11Bɨh dam be mɨkubla, bɨh bé é jɔʼ yiyɛh ó, njɨ é l'efie kʉ, duho é buʼo lé etiibe e Yesʉs ɨ, é l'efu ó, tiʼ ye, yé nyinɨ é bɨtiʼ bih, byaa lé elaa mpʉ ngul mpaa ɛ. 12No ó, bɨh bé esia e l'efie, bɨn bɛɛ lé ebuʼba é bɨtiʼ bin! 13Yé ó tila ó: «Me a si buʼla. Ebe no ó me a lwib ɨ.»

Bɨh bé e buʼo é mɨleme mbi ngwar e ngwar waa. Ndwe nteme, mpʉ bɨh bé a buʼla ɛ, mbi ngwar waa nteme ó bɨh bé a lwib ɨ. 14Ebe, bɨh bé ebuʼla ó, waa a pɛ̀h Da Yesʉs é foo e, nye nteme ópɛ̀h bɨna ga e boo nɔɔ. Nye ócyel bɨna ga é mih me é gumo Yesʉs ndɨ ɨ. 15Ebe, mɨtuu myaa mimyɛh, myé epyal bɨh ó, é l'efu lɨn. No ó, ncwɨncwɨa mo Zyɛm óbul lɛʼlɔ é l'efu ó, bʉr o ndɨ edwe nye ekiba ɛ, bé bua, Zyɛm lé ebi kum tɨ.

Sa efie, lé ófuʼla ɛ

16Ebe no, bɨh bé adimle nkul é monyʉl. Bɨh mu ó lé ekʉ bo é nko paʼ nyʉl lé enyin kʉl ɨ, sa gwar, sa ndɨ é nyʉl waa tʉŋlʉ ɨ, yé eto le edwanba moho wiwɛh, 17ebe, bwa o mɨtuu mɨ apyɛbpyɛb bɨh lé ebee é bananaʼ ɛ, myé elaa mpʉ ngul mpaa. Mɨtuu myaa, myé ó sa lé esa ó, bɨh biʼe buobuo kum ódi njʉmdia e njʉmdia ɛ. 18Bɨh bé agba mɨleme é bɨsa lé enyin ɨ, njɨ é bɨsa ndɨ anyin ɨ, ebe, byaa lé enyin ɨ, byé elaa mpʉ ngul mpaa. To kœb ó, byaa ndɨ anyin ɨ, byɛɛ ó ndɨ edi njʉmdia e njʉmdia.

Currently Selected:

2 Korɛnt 4: ozmBad

Highlight

Copy

Compare