2 Korɛnt 2

1Tɨʼ ó me a tiʼe é leme wam ó, me aŋa bâʼle ze gʉʼ bɨn ye e l'empime. 2Ebe, ǃbɨn si liʼ é gœʼra-gœʼra e mocyɛʼ mo nyʉl ebe mokan mam nɛʼɛ, zé óka bâʼle gba me bɨsʉhʉ é leme? Mʉr a ngbaa sa ó, me soha ɛ, nye ó waa me a kwɨɨ empime le e! 3Me a tile kalara waa ó, ǃme si ze gʉʼ bɨn ye nɛʼɛ, me l'aka kpaa empime é lɔb bɨsyɛɛla bin, bʉr o jala le edwe me bɨsʉhʉ ɨ, ebe, me a be ó e buʼo é nko paʼ win bɨn bɨbɛh ó, é jɔʼ bɨn bé óbe si láa nye e, bɨna bé ójoʼo ga bɨsʉhʉ jwɨʼ gwar. 4Yé ó no! Me a tile bɨn ó, leme wam, wé osi loŋlo e l'empime, nyʉl wam, nye osi bul laŋle cyɛʼ, le myɛɛle é mih. Me a baatile ó, bɨn liʼɨ é gœʼra-gœʼra e mocyɛʼ mo nyʉl. Me a kʉ tile ó, njɨ me lɛʼla bɨn kpɛl apurapura me ndɨ e ye é l'efu lɨn ɨ.

Epɛʼ e bɨbaa bɨ ebebe

5Nkʉ yé e mʉr a liʼe bɨn é gœʼra-gœʼra e mocyɛʼ mo nyʉl ɨ, nye a baasa mɛm syɛɛla yaa. Nye a sa ó, bɨn bɨbɛh, nkʉ ntɔʼ lé ebene lé ebœʼ lɔɔ, me ólɛɛ ó, nye a sa ó, bʉʉ bʉr o mbɛr Zyɛm win. 6Bɨntɨʼa bʉr é buobuo é l'esama lɨn, bé a kab mʉr waa ɛ, byé a be ó si jala e syɛɛla ebebe nye a sa ɛ. 7No ó, banana, yé mu ó jɔʼ epɛʼ bɨbaa bɨ ebebe bɨn bé a láa nye e. Yé ó jɔʼ ebula gba nye nkul é nyʉl, ebe, nyʉl, nye amu jaa cyɛʼ nye. Empime le, lé amu jaa ntaa nye é nkul. 8Ebe no, me ejwɨʼla e bɨn ó nɛɛ: lɛʼla ga ó, bɨn dina ó lé ekpɛl nye. 9É lɔb waa ó me a tile bɨn kalara waa ɛ. Yé a be ó, me bobla bɨn. Me a be ó lé ekpɛl gʉa ó, nkʉ bɨn dina ó lé esa me mojoʼo é mɨlɔb mimyɛh. 10Mʉr nyiwɛh bɨn bé óbe si pɛʼ bɨbaa bɨ ebebe e, bɨn bé à gʉa ó, mɛm nteme, mɨ pɛʼ nye byaa me a niʼe nye e. Yé be ó, me a si taare niʼe nuu mʉr bɨbaa bɨ ebebe, me ze pɛʼ nye bya nɛʼɛ, lɛɛ ó, me epɛʼ nye bya ó, é nyɔm win, é mih mo Krɨst. 11Bɨna sa ga no ó, Satan nkʉʼ be, akpah bɨna ga sɔʼɔ é zi bɨkʉʉŋʉ, ebe, bɨna bé ajeʼe ga mopɨʼ me.

Ba mo Pol é l'efu e bʉr o Troas

12No ó, é jɔʼ me a to le etuno Mbɨambɨa Lɔɔ mo Krɨst, to kumo ɨ Troas ɨ, me a to kœb gʉʼ ó, Da a si dib me zi, ó me tuna we é hwɨm. 13Dam be mpʉ me a be e nkul elɛɛ lɔɔ mo Krɨst gʉ, leme wam, wé a baabe me é puuu, ebe, me a baakœb mɨɔ wam Tit ɨ Troas. Ebe no, me a be ó si fuo ka jɛna e be, ntɔʼ mʉa, to Masedwan.

14Bɨna dweʼ ga Zyɛm ekiba. Yesʉs-Krɨst, nye ó lé eliʼle bɨna ga é jɔʼ yiyɛh é l'ebʉʼ e bɨsʉhʉ, lé esoho onkɔɔ we. Bɨna ga ó ndɨ edu ga nye é koo pihe é l'asisia we#2.14 É jɔʼ nkɔɔ, yé a bula é dɔm ɨ, nye a sa asisia waa ó, lé elɛʼle bim mɨkomo nye a bula e mye e. Myé a be ó mɨkɛʼa é motwii. No ó, Pol, nye elɛɛ wâʼ ó, ompʉn mo Yesʉs, bé a taare be ó bʉr o dɔm be, bé ntɔʼ bîŋɔ é dɔm é jɔʼ Yesʉs a lwimla é l'efu le emɛr be e. . Nye nteme ó lé esa ó, bɨna dweʼ ga bʉr sikʉlʉ lé esa ó, bé gʉŋa nye e. Nye esa bɨna ga no ó, é gumo yiyɛh. Bɨna ga mu ó mpʉ motwina mo ndwam lé epyɛl mbɨambɨa monumo e. 15-16Ebe, bɨna ga ó ndɨ ndwɛa Krɨst lé entɨh Zyɛm e mbɨambɨa monumo e. ǃƗ mʉr si bi tiʼ molu mo mpoʼ mɨmɛh, nye ze jʉʼra bɨna ga nɛʼɛ, mbea we, wé ó: «Yé ó monumo mo tiʼ molu mo mpoʼ mɨmɛh!» Waa lé egʉmla é bebebebe zi nyɛɛ, é jɔʼ nye lé ejʉʼra bɨna ga ɛ, nye ebee é nko paʼ we ó: «Bé ekʉ pyɛl monumo mo efie!» Zé ndɨ e nkul ndɨ ó, nye nʉŋa mbɨambɨa syɛɛ yaa ɛ? 17No ó, bɨh bɛɛ, bé abe mpʉ obɛma o mɨlɔb mo Zyɛm. Zyɛm a lomo bɨh ó, loma. Lwib yaa, yé eduho bɨh é mɨmo si. Bɨh bé elwib mɨlɔb mye ó, é mih mo Zyɛm, é lɔb zyɛŋa wih boo Krɨst.

Currently Selected:

2 Korɛnt 2: ozmBad

Highlight

Copy

Compare