1 Korɛnt 15
15
Pɛ̀ha foo mo Yesʉs
1Obɨɔ ga bam aa! Me mu ó lé eze jɨm bɨtoŋla bin é nko paʼ Mbɨambɨa Lɔɔ me a tuno bɨn, waa bɨn bé a joʼo e. Wé nteme, wé ó waa ndɨ bɨn cɨma é mɨleme e. 2ǃBɨn bé óbaʼle lɔɔ waa mbɨmbɨa é mɨleme min mpʉ me a tuno bɨn nɛʼɛ, wé ódwe bɨn tiʼ molu mo mpoʼ mɨmɛh. Yé be, yé abe no nɛʼɛ, lɛɛ ó, buʼo yin, yé ó kʉ be mbɛh.
3Me a be ó si ntɛŋ bɨn lɔɔ me a lɛɔ, waa ndɨ é bwaʼ nyɔm ɨ. Wé ó nɛɛ: Krɨst a si jala e mɨsyem ga mina, mpʉ yé a bɛa be tila é Kalara Zyɛm ɨ. 4Nye a be ó si debe, ntɔʼ ze pàh é foo é l'elu elɛl, mpʉ Kalara Zyɛm lé elɛɛ ɛ. 5Nye a be ó si pyal boo Sefas, ze pyal nteme boo Esama le ompʉn ewʉm e l'oba be. 6Pie tɨ, nye ze pyal boo bʉʉ obuʼla be, laa mɨnter mɨtɛn, bɨbɛh bee nye é jɔʼ gwar. Baʼ bʉr o tɨ, bé dina ó kʉ, ze pyal é banana; bʉʉ, bɨ dime mih. 7Nye ze bâʼle pyal boo Jacques bé e mɨlʉmlʉ mimyɛh.
8É l'epihe ó nye a ka ze pyal boo me e, mɛm yɛɛ mpʉ mʉr a byɛl sono e. 9É sama mɨlʉmlʉ tʉŋlʉ, mɛm ó ndɨ mʉr epihe. É l'ocyecye, me ajala le ejebɔ ó, lʉmlʉ mo Krɨst, ebe, me a si tíile bʉr o Mbɛr-Zyɛm. 10Dam be no, me ó lʉmlʉ we, ebe mocyɛʼ mo mpom Zyɛm a sʉ me e. Nye a baasʉ me ma, mocyɛʼ mo mpom l'aliʼe bɨdweʼle. Nye a sʉ me ma ó, me nkʉʼ dɨ sea, laa myʉʉ mɨlʉmlʉ mye mimyɛh. (É l'ocyecye, ntʉʼ me lé esea. Mocyɛʼ mo mpom nye a sʉ me e, mé ó ndɨ esa ó, me sea no. 11Ebe no, nkʉ yé ó mɛm ó ndɨ ebul sea, nkʉ ntɔʼ bɛɛ: bɨh bé yɛɛ ó, lé elɛɛ lɔɔ ngwar waa. Wé ó bɨn bé a buʼla ɛ.)
Mpʉ odwè bé ópàh ɨ
12Yé be ó, yé cyecye ó, Krɨst a si pàh é foo nɛʼɛ, a bʉʉ bʉr é l'esama lɨn, bé bana kʉ lɛɛ ó, odwè, bé ákwoʼ pàh é foo nyá ɛ? 13Yé be ó, odwè, bé aŋa pàh é foo nɛʼɛ, lɛɛ ó, dam be Krɨst, nye a baapàh! 14Yé be ó, Krɨst a baapàh nɛʼɛ, lɛɛ ó, mpaŋla bɨh ndɨ ecen ɨ, nye mu ó ambɛhambɛha lɔɔ. Lɛɛ nteme ó, taa buʼo bɨn bé a jyɛʼ é mpaŋla waa ɛ, yé ó mbɛh. 15Yé be ó, yé ó no nɛʼɛ, yé enyin nteme ó, bɨh bé elɛɛ mpʉl, tiibe e Zyɛm, ebe, bɨh bé eboʼlo, tiibe e nye ó, nye ó b'a pɛ̀h Krɨst é foo. Yé be ó, odwè, bé ákwoʼ pàh é mofoo nɛʼɛ, lɛɛ ó, Zyɛm a baapɛ̀h nye é foo. 16Yé be ó, odwè, bé ákwoʼ pàh nɛʼɛ, lɛɛ ó, dam be Krɨst, nye a baapàh é foo. 17Yé be ó, Krɨst a baapàh nɛʼɛ, lɛɛ ó, buʼo yin, yé ó mbɛh e mbɛh. Mpa bɨn dina ó, é mpila mɨsyem min tʉŋlʉ. 18Mpa nteme, bʉr o b'a be é zyɛŋa wɔɔ boo Krɨst, ntɔʼ dwè e, bɨ to dim cyecye! 19Yé be ó, mɨleme ga mina, myé ejyɛʼ taa buʼo yɔɔ boo Krɨst ó, njɨ é tiʼ si nwaʼ nɛʼɛ, lɛɛ ó, bɨna ga bé ó bʉr o ndɨ é bul kpaa nkoo e, laa bʉr o si nwaʼ bɨbɛh.
20Sa gwar, Krɨst nyɛɛ a si kʉ pàh é foo. É sama bʉr o b'a dwè e, nye ó mʉr efoʼ a dwè, ntɔʼ pàh ɛ. Nye ó mpʉ tom wé a pɛʼɔ é peme e, sa ndɨ elɛʼle mpʉ bʉʉ odwè, bé ófuʼla sa ɛ. 21Jwɨʼ gwar e gwar mpʉ efie, lé a jala e bʉr bɨbɛh, duho é mʉr ngwar ɨ, no nteme ó, mʉr ngwar a jala le esa ó, odwè pàha ɛ. 22Jwɨʼ gwar mpʉ bʉr bɨbɛh lé edwè é zyɛŋa wɔɔ boo Adam ɨ, no nteme ó, Zyɛm ópɛ̀h bɨbɛh é mofoo ebe zyɛŋa wɔɔ boo Krɨst ɨ. 23Sa gwar, mʉr nyiwɛh ópàh ó, é ye cye: Krɨst efoʼ, mpʉ tom wé a pɛʼɔ peme e; bʉr be, bé óze bɔma e nye é dobo nye óbula ze e. 24É jɔʼ yaa ó esie e mbi jɔʼ yi, lé óka pyal ɨ, Krɨst ntɔʼ gbah mɨsisim mɨ apum mimyɛh: le myaa ndɨ mɨlʉ ɨ, le myaa mɨ nkul mojwɨ̀ʼa ɛ, le myaa ndɨ e monkul monɨnɨ ɨ. Nye ódwe Zyɛm Sɔŋ jwɨ̀ʼa ye yaa, 25ebe, yé a kʉ jala ó, Krɨst diʼe é dia njwɨɨ, to pyal é jɔʼ nye óbe si ntaa bʉr o dɔm be bɨbɛh é nkul dɔm, gba be é mobò me si ɨ. 26Mʉr dɔm epihe nye óka ntaa ɛ, nye óbe ó Efie lé mʉr tɨ, 27ebe, yé ó tila ó: «Zyɛm a si gba bɨsa bibyɛh é jwɨɨ ye. Byé óbe ó é mobò me si.» Ebe no, yé elɛʼle é sʉlʉlʉ ó, Zyɛm nyɛɛ, mʉr lé egba sa yiyɛh é jwɨ̀ʼa mo Krɨst yaa ɛ, nye abe tɨʼ é jwɨ̀ʼa yaa tʉŋlʉ. 28É jɔʼ nye óbe si gba sa yiyɛh é jwɨ̀ʼa mo Mwan mo Zyɛm ɨ, é jɔʼ yaa ó Mwan mo Zyɛm óka ni é jwɨ̀ʼa mo Zyɛm Sɔŋ ɨ, nyɛɛ waa a pa gba sa yiyɛh é jwɨ̀ʼa mo Mwan mo Zyɛm ɨ. Zyɛm Sɔŋ óka be ó njwɨɨ sa yiyɛh é jɔʼ yaa.
29Yé baabe no nɛʼɛ, a baa lé enʉa ndubo é l'efu le odwè e, bé óbi yé? Nkʉ Zyɛm a be ó be, abe lé epɛ̀h bʉr é mofoo nɛʼɛ, mpa ndubo waa, wé a be ó, abe ba e nyɔm. 30Nkʉ Zyɛm be ó be, abe lé epɛ̀h bʉr é mofoo nɛʼɛ, mpa yé abe e nyɔm ó, me diʼe é nkpah ebebe é jɔʼ yiyɛh. 31Obɨɔ ga bam aa! Yé cyecye ó, me epamla efie dobo lɨlɛh. Yé cyecye nteme ó, me edoʼo e bɨn é mih mo Tî ga wina Yesʉs-Krɨst. 32Yé be ó, me a si sia e mɨtuu ɨ Efɛɛz lé ekʉ du njɨ mɨnyɔm mɨ bʉr o si nwaʼ nɛʼɛ, lɛɛ ó, syɛɛla yaa, yé a ngbaa be me e wáa nyɔm? Yé be ó, Zyɛm óbe l'apɛ̀h bʉr é mofoo nɛʼɛ, lɛɛ ó, yé a baangbaa be me e nyɔm. Kɨkɛna, yé ó: «Bɨna deʼ ga mode le monwoʼ, ebe, omɛn, bɨna bé ódwè ga.»
33Abir ga ó, mʉr gomla bɨn é bebebebe zi. Kɨkɛna, yé elɛɛ ó: «Bɨbla jɔna nduo, yé ábɛa le elɨr mʉr die.» 34Saʼ ga bɨsyɛɛla ndɨ ejala ɛ. Gwaʼa ga lé esa mɨsyem. Bʉʉ bʉr o mbɛr Zyɛm win, bé agʉa Zyɛm. Me elɛɛ mpʉnʉ ó, lé egba bɨn fwon é nyʉl.
Edwan e nyʉl
35No ó, nuu mʉr, nye ó e nkul edî ó: «Odwè, bé epàh nyá ɛ? Bé óbe ó e wáa mbi monyʉl?» 36Go sa gʉ yi! É jɔʼ go lé ebè mpœʼ œ, ǃgo si bene lé efwah ye é bɨbwah nɛʼɛ, yé abe e nkul epah. 37Ntʉʼ sa go lé ebè é bɨbwah ɨ, ndɨ kubo lɨ yé ópah ɛ. Go bè ó, ma bumo. Yé ó bɛm be bumo ble, nkʉ guu mbi les fih. 38Zyɛm dwe bumo yaa nyʉl ó, mpʉ nye kpɛl ɨ. Nye edwe bumo yiyɛh nyʉl lé ejala e yiha bumo e. 39Mɨcyea bɨsa bibyɛh, byé abe jwɨʼ gwar. Bʉr, bé ó e wɔɔ mbi bɨpuno; otir e wɔɔ mbi; bɨnɔn e wɔɔ mbi; ofu nteme e wɔɔ mbi. 40Yé nteme ó e bɨsa bɨ jobo kʉ. Byé ó e wɔɔ mbi monyʉl; bɨsa bɨ si, e wɔɔ mbi. Monyʉl bɨsa bɨ jobo kʉ, mé ó e wɔɔ mbi ojaa; monyʉl bɨsa bɨ si e wɔɔ mbi ojaa. 41Dobo, lé ó e we mbi ojaa; alomo e waa we; baatwitwɛn e myɔɔ mɨmbi, ebe, bé esiila é nko paʼ moncɛnba mɔɔ.
42Yé óbe nteme ó no, é jɔʼ odwè, bé ópàh ɛ. Ndwè, nye edebe, ze bo. É jɔʼ ndwè ópàh ɛ, nye aŋa ka dwè, nkʉ bo. 43É jɔʼ ndwè lé edebe ɛ, nye é nteʼe. É jɔʼ nye ópàh ɛ, nye óbe ó, nye mu e kum. É jɔʼ nye lé edebe e, nye é kpaa nkoo, le ecyɛʼ. É jɔʼ nye ópàh ɛ, nye óbe ó e nkul. 44É jɔʼ ndwè lé edebe e, nye e nyʉl bɨpuno. É jɔʼ nye óka pàh ɛ, nye óbe ó e nyʉl sisim. Nkʉ yé cyecye ó e «nyʉl bɨpuno», yé ejala le ebe ó e «nyʉl sisim».
45Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr efoʼ, Adam, a be ó kublakubla.» Adam a fuʼla ka ze e, nye ó Sisim lé etiʼ bʉr ɨ. 46Ntʉʼ nyʉl sisim a taare ze. Yé a taare be ó nyʉl bɨpuno. É jɔʼ yaa ó nyʉl sisim nyɛɛ a ka ze epihe e. 47Adam efoʼ a meŋɔ ó e bɨbwah. Adam mba a duho ó, é jobo kʉ. 48Bʉr o ndɨ é nkɔb si nwaʼ ɛ, bé enwɨɨla ó e mʉr a meŋɔ e bɨbwah ɛ. To kœb ó, bʉr o ndɨ egumo e jobo kʉ ɨ, bé enwɨɨla ó e waa a duho é jobo kʉ ɨ. 49Mpʉ bɨna bé a taare nwɨɨla ga e mʉr a meŋɔ e bɨbwah ɛ, jwɨʼ gwar e gwar yaa nteme ó bɨna bé ónwɨɨla ga e mʉr a duho é jobo kʉ ɨ.
50Obɨɔ ga bam aa! Me ekʉ lɛɛ e bɨn ó, ntʉʼ mamʉr bɨpuno le motié ndɨ e nkul eniŋlɔ é jwɨ̀ʼa mo Zyɛm. Sa lé edwè, debe, bo e, yé abe e nkul ebi nkɔb é sa lé edi njʉmdia e njʉmdia ɛ. 51Me egwɨm pɛʼle bɨn lwib odim yi: ntʉʼ bʉr bɨbɛh, bé ódwè. Sa gwar, bɨna ga bɨbɛh, bé ódwibra ga monyʉl. 52Monyʉl ga mɨna, mé ódwibra ó, é jɔʼ gwar, mpʉ dih lé ebyɛbla ɛ. Yé óbe ó é jɔʼ sebe epihe ólwɨɨ ɨ, ebe, é jɔʼ nye ólwɨɨ ɨ, odwè, bé ópàh. Bé ódi ó, abe e nkul eka dwè. Monyʉl ga mɨna, mé ócene. 53Yé ekʉ jala ó, nyʉl lé ebo é foo e, nye lihba nyʉl ndɨ abo e; yaa ndɨ e nkul edwè e, lihba yaa ndɨ abe e nkul edwè e. 54É jɔʼ nyʉl lé ebo e, óbe si lihba waa ndɨ abo e, é jɔʼ nyʉl lé edwè e, óbe si lihba waa ndɨ adwè e, é jɔʼ yaa ó sa ndɨ tila é Kalara Zyɛm ɨ, yé ólwɨŋlɨ ɨ: «Efie, lɨ gbahɔ! Zyɛm, nyi bula e l'esaa é koo!»#15.54 Dwɛʼa Ezayi 25.8.
55«Efie ɛ, onkɔɔ go, wé mu nko?
Efie ɛ, nkul ejʉ bʉr go, nye mu nko e?»#15.55 Dwɛʼa Oze 13.14.
56Efie, lé enʉa nkul ejʉ bʉr ó, lé ebɨlan e syem. Syem, wé enʉa nkul ó, duho é motie mo Zyɛm.#15.56 Nkʉ «Mɨnjwɨr ga mina, myaa ndɨ egwɨm sa syem ɨ, myé enʉa nkul ó, duho é motie mo Zyɛm.» 57Zyoo e Zyɛm, nyɛɛ waa lé edwe bɨna ga nkul ebula e l'esaa é koo dumo e Tî ga wina Yesʉs-Krɨst ɨ!
58Ebe no, obɨɔ o kpɛl bam aa! Cyɛba ga é nkʉʼʉ. Gbaʼ ga monyʉl lé esea syɛɛ mo Da Yesʉs é jɔʼ yiyɛh. Gʉŋa ga ó, syɛɛ bɨn lé esea nye e, yé ákwoʼ dwè ntuʼ.
Currently Selected:
1 Korɛnt 15: ozmBad
Highlight
Copy
Compare
Share
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
