Rôm 12
12
Edwán é twiʼ ɨ́ nzɨ̌ mé Krîst
1Nó, bɨ́ɔɔ́ bâm ɛ̌, me lɨ́ ejɨʼla e bɨ̌n ɨ́ nkoó Nzyɛ̌m á jɨ̂ʼ gá mɨná nyɨ́, ó bɨ̌n tímlaa nye menyʉ́l mɨ́n ntinɨ̂ e ntinɨ̂, ebě, menyʉ́l mɨ́n, mé ɨ́ jala le esûʼla ó, mikublakúbla míndwéá mi dí ti ɨ́ míh mé Nzyɛ̌m mí. Nye óbee bícwiʼ bín byaá mbɨ̂mbɨá. Yé ntémé ó dí mpǎŋ ndwéá kûm dí ejala e misísǐm mín wɨ́. 2Adû gá metum me bʉ̂r ó myǎ wɨ̂. Yé jala ó, Nzyɛ̌m dwêʼ bɨ̌n bijwɨʼ bidwân, ó nye dwírɨɨ bɨ̌n miléme. Nó ó bɨ́n ngá gʉ́ǎ sá Nzyɛ̌m dí ekpɛl yɨ́. Bɨ̌n bé ogʉ́ǎ sá dí ɨ́ mbɨa yɨ́, sá dí ejala e né yɨ́, ndu e yaá dí ɨ́ pémémé ɨ́ mipáʼ mímyɛ̂h yɨ́.
3Nzyɛ̌m á si lɛ̂ʼle me mpam nyé. Ɨ́ mpam nyaá ó mé dí elɛ́ɛ e mʉr nyɨnyɛ̂h dí ɨ́ sɔ́má yɨ́n nyá ó: mʉ̌r sá abuú láa nyé mʉr tɨ̂. Nye sêʼlaa nye mʉr tɨ̂ʼ, antaa sʉ́ŋa. Mʉr nyɨnyɛ̂h, nye pâhlaa nye mʉr tɨ̂, nye nkʉ̂ gʉ́ǎ mbi mʉ̂r nyé dí wɨ́, lɨ́ edû mbǐ búʼó Nzyɛ̌m á gbâ nye ɨ́ léme wɨ́. 4Mʉr, nye ó nyʉ̂l mpwár, nyʉ̂l nyɨɛ bitîl ɨ́ buo buo. Bitíl bíbyɛ̂h, byé abe e syɛ́ɛ́ éséa njɨ gwár. Bisyɛ́ɛ́ byɔ́ɔ́, byé ɨ́ buo. 5Jwɨʼ gwár yaá ntémé ó, mɨ́ná dí gá ɨ́ buo yɨ́. Sâ gwár, mɨná gá bé ó nyʉ̂l mpwár ɨ́ mpúhlá gá nyɨ́ná e Krîst. Mɨná gá óbɛ̂h, bé ó bitíl bí nyʉ̂l bi dí minɛrá ɨ́ nyʉ̂l mpwár bí. 6Nzyɛ̌m á dwe mɨná gá mindwéá ó, mimbi mimbi. Mpʉ nyé á kpɛl edwe mɨná gá mindwéá myaá yɨ́, nó ó, mʉ̂r nyɨnyɛ̂h jálá le eséǎ Nzyɛ̌m syɛ́ɛ́ yɨ́. Yé bé nye á si dwe go ndwéá égwîh mílɔ̌b myé nó, tóʼ le egwîh myé dóló ɨ́ nzɨ̌ búʼó. 7Yé bé Nzyɛ̌m á dwe go ó, ndwéá ékɛm bʉ̂r nó, séáá syɛ́ɛ́ yaá. Yé bé nye á dwe gua ó, ndwéá édwe bʉ̂r milɛ́ʼlá nó, lɛ́ʼláá bê. 8Yé bé nye á dwe gua ó, metwɨ́ɨ́ me dí egbâ bʉ̂r nkul ɨ́ miléme má nó, gbáʼ bé nkul nyaá. Yé bé nye á si dwe gua nkul ekab báántéʼenteʼe o bʉ̂r mebi nó, dwéʼ bé mǎ e lémé gô wɨ́wɛ̂h. Yé bé nye á tyêl gua ó, ɨ́ dǐ tyɛ̂b esôʼ nó, léme díʼee go ɨ́ báná báná ó, go séaa syɛ́ɛ́ yaá mbɨ̂mbɨá. Yé bé nye á dwe gua ó, ndwéá écwɨ́a e bʉ́ʉ́ bʉ̂r nó, lɛ́ʼláá bé mpam nyaá e bisʉhʉʉ.
9Kpɛ̌l, yé díʼee abe e mikóo. Nwimɨɨ gá sá yɨ́yɛ̂h dí ɨ́ bébe yɨ́. Kpɛlɨɨ gá sɔ̂ʼ njɨ yaá dí ɨ́ mbɨa yɨ́. 10Kpɛlaa gá páʼ nyɨ́n mpʉ bɨ́ɔɔ́ e bɨ́ɔɔ́ jálá le ekpɛla yɨ́. Diʼee gá le ánɨ̂nɨ̂n dúu páʼ nyɨ́n! 11Séáá gá syɛ́ɛ́ e nkul, abe le epɨ̂h. Sísǐm mé Nzyɛ̌m, nye kúblaa ɨ́ milémé mín. Séáá gá Tî Yésʉs e milémé mín mímyɛ̂h. 12Diʼee gá e bisʉhʉʉ ɨ́ mpûʼlǎ Nzyɛ̌m á gbâ bɨ̌n ɨ́ miléme nyɨ́. Júhwáá gá mitúú bɨ́n dí esia e myé mí. Tirwaa gá syɛ́ɛ́ mínjɨʼla. 13Dwéʼ gá bʉr o mé Nzyɛ̌m bisâ bi dí esâ bé sɔ́ɔlʉ bí. Nʉnʉa gá ojwóo o dí epyâl kwá nyɨ́n bá mbɨ̂mbɨá.
14Syɛyɨɨ gá baá o dí etíble bɨ́n bá metyéelé. Líʼe ó, bɨ̌n syɛ́mɨɨ bê, syɛyɨɨ gá bé metyéelé.
15Sohaa gá, bɨ̌n e bʉr o dí esoho bá. Jɨʼee gá medwê, bɨ̌n e baá o dí ejɨ bá. 16Diʼee gá twíí páʼ nyɨ́n. Asâ gá enkɛ́ɛ́ é nyʉ̂l. Séáá gá mbǐ syɛ́ɛ́ yɨ́yɛ̂h, yé damá bě mbi syɛ́ɛ́ dí aláŋɔɔ ɨ́ nkɔb yɨ́. Ajwɨʼ gá ó, bɨ̌n ó dí ocwóó.
17Abɔla gá ebébe le ebébe. Sáŋáá gá nzɨ̌ esâ bʉ̂r bɨ́bɛ̂h bisyɛ́ɛla bi dí ɨ́ buú mbɨa ɨ́ míh mé bʉ̂r bɨ́bɛ̂h bí. 18Yé báná bɨ́n nó, sáʼ gá mbi wɨ́wɛ̂h ɨ́ páʼ wɨ́n ó, bɨ̌n e bʉr bɨ́bɛ̂h díʼee ɨ́ mepyɛbla! 19Bʉr ó kpɛ̌l bâm, ayɨ́ bɔla gá bɨ̌n bʉr o tɨ̂. Kamaa gá ó, Dâ Nzyɛ̌m nye omér, nye lɛ̂ʼlaa nkpaa dí bɨ̌n ɨ́ miléme nyɨ́, ebě, yê cɛmá ó: «Dâ Nzyɛ̌m lɛ́ɛ́ ó: Me ó dí e mpɔlá. Me ó ngá dwe myɛ́na.» 20Yê cɛmá ntémé ó:
«Ntɨ̂m e mbɨn gǒ bé lɨ́ ejóʼo nzâ nó, dwéʼ nyé sá éde.
Nyé ká jóʼǒ dwéh médíbé nó, dwéʼ nyé mǎ.
Gó ósâ nó wá, gǒ kaʼlé ó, nye má mé siʼe ɨ́ lʉ̂.»
21Mʉ̌r sá abîr ó, ebébe, lé ntáŋaa nye ɨ́ nkul. Nyɨɛ ntáŋaa lé ɨ́ nkul lɨ́ esâ bísyɛ́ɛla bi dí ɨ́ mbɨa bí.
Currently Selected:
Rôm 12: ozm
Highlight
Share
Copy
Want to have your highlights saved across all your devices? Sign up or sign in
