Milʉ́mlʉ́ 24

OYúden lɨ́ epǔr Pɔ̂l

1Píe melú métɛ̂n, njwɨ́ɨ opara Ananías ntɔ̂ʼ pyâl ɨ́ Kesáre, bé e bʉ́ʉ́ ótɔ́má bʉ̂r, ndu e kɔmlʉ wɔ́ɔ́. Díé lé, lé á be ó, Tɛ́rtulos. Nó ó bé á nze tyɛ̂b ɨ́ mpǒm mé ngóvinǎ Félix, lɨ́ etó dwě ngóvinǎ purá bé á pur Pɔ̂l yɨ́. 2Jɔʼ bé á jébe Tɛ́rtulos yɨ́, nye nzě táare énwâhle nyê. Nye ó: «Tɔ́má mʉr, go ó dí esâ ó, bɨ̌h díʼee ɨ́ mepyɛbla ɨ́ sí yɨ́h. Go ntémé ó dí esáa mépɨʼ mimbi mímyɛ̂h ó, metié mɨ́n, mé kwɨ́mlɨɨ mpʉ yé dí ejala e kúl yɨ́h yɨ́. 3Bɨ̌h bé lɨ́ esohǒ jwɨ́ɨ́ yô ɨ́ jɔʼ yɨ́yɛ̂h, ndu e gúmó yɨ́yɛ̂h, le ekʉ́ dwe gó nzyǒo tɨ̂. 4Nó ó, mpʉ mé dí, akpɛl édímle gó jɔʼ yɨ́, sá tɨ̂ʼ ó mé dí ejɨʼla e go ó, go lɛ̂ʼlaa me mpam lɨ́ ejôʼlo bɨ́h bá mâ jɔʼ tîtííǎ yɨ́. 5Bɨ̌h bé á si bee mʉr nyâʼ lɨ́ edulo óleŋéleŋé lɨ́ oYúden bɨ́bɛ̂h dí ɨ́ sí yɨ̂ʼ bá. Nye ntémé, nye ó dí lʉ́ nkɔ́m bʉr ó Nazarɛ̂t. 6-7Nye á be ntémé ó, sí gwá táare élœ̌ʼ mpáh Nzyɛ̌m nyɨ́h dí ɨ́ buǒ ti nyɨ́. Sá tɨ̂ʼ ó bɨ́h á mɛ̂r nye yɨ́. 8Gó ógwá dî nyé metíá nó, go mʉr tɨ̂, go ógʉ́a ó, bipurá bíbyɛ̂h bɨ́h dí epur nyé bí, byé kʉ́ be ó tɨ̂ʼ tyeetye.»

9OYúden, bé á be lɨ́ ekʉ́ kǎm mpʉ nyé á nwâhle Pɔ̂l yɨ́, lɨ́ elɛ́ɔɔ ó, bisâ byaá bíbyɛ̂h, byé á be ó tɨ̂.

Pɔ̂l lɨ́ ekǎr lɔ̌b wé ɨ́ mpǒm mé Félix

10Jɔʼ ngóvina á dwe Pɔ̂l lwǐb yɨ́, Pɔ̂l nzě lɛ́ɛ ó: «Me lɨ́ egʉ́a ó, go ó dí tîʼ milɔ̌b wâʼ ɨ́ sí yɨ̂ʼ mimbû mimbû. Nó, mě e mpûʼla ɨ́ léme lɨ́ ekǎr lɔ̌b wâm ɨ́ mpǒm nyǒ. 11Ɨ́ mpʉ gó dí e nkul egʉ́a yɨ́, yé dína ó, apǎ pyâl mélû kám e mebá gbaa mé á pyâl ó, mě dwé ó, Nzyɛ̌m kûm Yerʉ́zalɛm. 12Abe e mʉr á kœb me lɨ́ epére mékǎn e nyʉ́ʉ́ mʉ̂r, nkʉ̂ ntɔ̂ʼ lɨ́ etáare bíntʉ̌, damá be ɨ́ mpáh Nzyɛ̌m tʉ́ŋlʉ̌, nkʉ̂ ɨ́ mempáh mínjɨʼla mɔ́ɔ́, nkʉ̂ ntɔ̂ʼ ɨ́ gúú páʼ nkana tʉ́ŋlʉ̌. 13Nó ntémé ó, bé dí abe e nkul elɛ̂ʼle gó sá bé dí eboʼlo mé e tɨ̂ʼ ɨ́ báánâʼ yɨ́. 14Nó ó, ɨ́ lɔ̌b wɨ̂, me lɨ́ ekam ɨ́ mpǒm nyǒ ó, me lɨ́ eséǎ Nzyɛ̌m bimpám gá bíná syɛ́ɛ́, lɨ́ edû nzɨ́ mé Krîst, nyaá bʉ́ʉ́ bʉ̂r dí ejébě “bɨ́blǎ yébe” nyɨ́. Mɛm, me lɨ́ ebúʼlǎ sá yɨ́yɛ̂h dí cɛmá lɨ́ mekaná mé Moyɨ̂z ndu e maá mé ógwíha o mílɔ̌b yɨ́. 15Lémé wâm, wɨ́ lóno ɨ́ mpûʼla mpwár bé bʉr o tɨ̂ʼ dí e nye nyɨ́. Bɨ̌h bé e mpûʼla ɨ́ miléme ó, bʉr, bé ópah: otîtyěl o bʉ̂r, le onzyɛ́h ó bʉ̂r. 16Sá tɨ̂ʼ ó mé dí egbâ nkûl lɨ́ etiʼe ɨ́ míh mé Nzyɛ̌m le maá me bʉ̂r, e mipahlá mí léme mi dí ɨ́ pyɛɛɛ mí yɨ́.

17«Píe mé á boo bɔ́ʼa e Yerʉ́zalɛm mimbû mimbû, enze mé kǎ báʼǎ nze ó mé dí tɨ̂ʼ yɨ́, lɨ́ enzě súʼǒ kúl yâm, le enzě dwě Nzyɛ̌m mindwéá. 18Tɨ̂ʼ ó bʉ́ʉ́ óYúden bé á duhǒ sí Azía bá, bé á kœb me lɨ́ edîʼ míndwéá ɨ́ mpáh Nzyɛ̌m tʉ́ŋlʉ̌ yɨ́. Entumo e bʉ̂r, lé á bé abe tɨ̂. Bintʉ̌ ntémé, abe. 19Sâ gwár, bʉ́ʉ́ óYúden, bé á duhǒ sí Azía bá,... Yé bé sá jála nó, lɛ́ɛ́, bɨ́haá bʉ̂r ó b'á nze pur me ɨ́ mpǒm nyǒ wâ, yé bé me á si sâ yʉ́ʉ́ sɔ̂ʼ nó. 20Nkʉ̂ ntɔ̂ʼ ó, bâʼ bʉ̂r, bé bʉr o tɨ̂, bé páa lɛ́ɛ̌ sá ébébe bé á bee me lɨ́ esâ ɨ́ jɔʼ mé á be ɨ́ mpǒm bʉ̌m nɨ́nɨ́ɨ́ yɨ́. 21Sá bé dí bɛ̌m lɛ́ɛ gó yɨ́, yê njɨ ó, sá mé á lwib e nkul yɨ́. Me á lɛ́ɛ e bé ó: “Me lɨ́ ebúʼla ó, odwe, bé ópah. Sá tɨ̂ʼ ó mé dí etyɛ̂b wâʼ mûh ɨ́ mempǒm mɨ́n ɨ́ nkar yɨ́.”»

22Félix á be ɨ́ buú gʉ́ǎ lɔ̌b nzɨ́ mé Krîst. Nye nzě tyêl lɔ̌b. Nye ó: «Jɔ̌ʼ Lisías, njwɨ́ɨ bisójǎ nɨ́nɨ́ɨ́ ngá nze yɨ́ ó mé ngá gʉ́ǎ mpʉ me pâhlaa lɔ̌b wɨ́n yɨ́.» 23Nó nyé á lɛ́ɛ e kapitɛ̂n á bɨbaʼle Pɔ̂l nyá ó, nye páa baʼle nyé ɨ́ mbɛ̌r mímbʉʼ. Sâ gwár, nye e bíbír nyé ɨ́ byúú bíjɔʼ. Nye nzě kam ntémé ó, osó bé, bé ntáa nzě sɨséa nyé bisyɛ́ɛ́.

Félix, bé e Drósila lɨ́ enaa Pɔ̂l

24Bwá mélû nzě laa. Félix nzě pyâl, bé e mʉmá wé, Drósila. Nye á be ó sile óYúden. Nó nyé á lómo bʉr ó, bé tô jébě Pɔ̂l, le enzě jôʼlǒ sá nyé á lɨlɛ́ɛ, dumo e búʼó ɨ́ Yésʉs-Krîst yɨ́. 25Pɔ̂l nzě nyɛl édwe nyé milɛ́ʼlá ɨ́ mpʉ mʉ̂r jálá le etiʼe lɨ́ otîtyěl le emâr léme yɨ́, le mpʉ̌ Nzyɛ̌m ngá tíʼe mílɔ̌b yɨ́. Félix ntɔ̂ʼ bil bʉ́á. Nye e né ó: «Paá nyɛɛ́ swîʼ! Jɔʼ mé óbi épʉ́la yɨ́, mé obáʼǎ jébe gô.» 26Mpûʼla, nye á be nye ɨ́ léme ó, Pɔ̂l ókolo nyé e mɔnɨ́. Sá tɨ̂ʼ ó nyé á jɨjébe nye nzɔʼ nzɔʼ ó, bé e nɔ́ɔ́, bé lɛ́ɛlaa milɔ́ɔ yɨ́.

27Píe mimbú mímbá, Pɔ́rkios Fɛ́stos nzě nʉǎ dǐ mé Félix. Mpʉ̌ ngóvina Félix á be lɨ́ ekpɛl ó, oYúden, bé béyɨɨ nye mbɨ̂mbɨá yɨ́, nó ó, nyé á líʼe Pɔ̂l ɨ́ mbʉʼ.

Currently Selected:

Milʉ́mlʉ́ 24: ozm

Highlight

Copy