Milʉ́mlʉ́ 15

Gwɨ́hlá Mbɛ̌r-Nzyɛ̌m ɨ́ Yerʉ́zalɛm

1Bʉ́ʉ́ bʉ̂r, bé á si duhǒ sí Yʉ́da, tô Antiôs. Bê nzě dwe bɨ́ɔɔ́ bɨ́ná milɛ́ʼlá ó: “Bɨ́n bé atíʼɔɔ mpʉ́n mpʉ étié mé Moyɨ̂z dí elɛ́ɛ yɨ́ nó, bɨ̌n bé ákóʼó bǐ twǐʼ njʉ̌m dǐ.” 2Nó ó Pɔ̂l, bé e Banabâs, bé á be ó lɨ́ ebuú pére mékǎn e bê, le edoŋɔɔ. Bê nzě kǎ tíʼe ó, Pɔ̂l, bé e Banabâs ti e bʉ́ʉ́ bʉ̂r ó Antiôs, bé tôʼ Yerʉ́zalɛm, tó kœb bʉ̂r o mílʉ́mlʉ́ mé Yésʉs, bé le otyɛ̂b bé ésôʼ ó Mbɛ̌r-Nzyɛ̌m, ó bé báʼa tó timlě lɔ̌b waá gʉ̂.

3Bʉr ó Mbɛ̌r-Nzyɛ̌m Antiôs ó b'á súʼo bé ɨ́ tyen yɔ́ɔ́ yaá. Nó ó bé á laǎ sí Fénikia ndu e yaá Samarî, lɨ́ etô le elɛ́ɛ̌ mpʉ bʉ̂r o bíkûl e biloo, bé á dwira miléme, dyɛ̂ʼwɔɔ e Nzyɛ̌m yɨ́. Bɨ́ɔɔ́ bɨ́ná le okɛ́l bɨ́ná bɨ́bɛ̂h, bé ntɔ̂ʼ soho ɨ́ buo buo lɨ́ ejóʼǒ lɔ́ɔ waá. 4Jɔʼ bé á pyâl Yerʉ́zalɛm yɨ́, bʉr ó Mbɛ̌r-Nzyɛ̌m, bé á si nʉa bê, bé e bʉr o mílʉ́mlʉ́ mé Yésʉs, bé le otyɛ̂b bé ésôʼ ó Mbɛ̌r-Nzyɛ̌m. Bʉr o b'á duhǒ Antiôs bá bɨɛ, bê nzě lɛ́ɛ bé sá yɨ́yɛ̂h Nzyɛ̌m á sâ ɨ́ sɔ́má yɔ́ɔ́ yɨ́. 5Bʉ́ʉ́ bʉ̂r o b'á bûʼla bá, bé á bɨbe ó, ɨ́ nkɔ̌m oFarizyɛ̂n. Bê nzě mɔa sí, lɛ́ɔɔ ó: «Bé ɨ́ jala le etíʼe bé mpʉ́n, le elɛ́ɛ e bé ó, bé bâʼlaa metié mé Moyɨ̂z.»

6Bʉr o mílʉ́mlʉ́ le otyɛ̂b bé ésôʼ ó Mbɛ̌r-Nzyɛ̌m nzě syɛŋa gúmo gwár, lɨ́ etimlě lɔ̌b waá. 7Jɔʼ bé á be ɨ́ do ɨ́ do do yɨ́, Pétrus nzě tyɛ̂b tîtyěl. Nye ó: «Bɨ́ɔɔ́ bâm! Okɛ́l bâm! Bɨ̌n bé lɨ́ egʉ́a ó, Nzyɛ̌m á be ɨ́ boó pɛ̂h mé ɨ́ sɔ́má yɨ́n, ó me túnaa Mbɨambɨa Lɔ́ɔ kwá bʉr o dí abe óYúden bá, ó bé jóʼaa lɔ́ɔ waá, bûʼla wê. 8Nó ó, Nzyɛ̌m, mʉr dí egʉ́a mílémé mí bʉ̂r nyá, á si kʉ lɛ̂ʼle ó, nyɨ́ kam bê, ebě, nye á si ntɨh bé Sísǐm wé jwɨʼ gwár e gwár e mpʉ nyé á ntɨh mɨná gá wǎ yɨ́. 9Nyé agbâ tɔʼ e mbɔ́ʼ ngwár páʼ gá nyɨ́ná le onɔ́ɔ́. Nye á be ó sí pubo mílémé myɔ́ɔ́ ɨ́ lɔ̌b búʼó yɔ́ɔ́. 10Á nó, bɨ̌n kǎ bóblǒ Nzyɛ̌m báánâʼ ɨ́ yé ɛ́? Bɨ̌n bé lɨ́ edǐ gbâ ómpʉ́n baá mbeʼ ɨ́ dile dile ɨ́ koo, abe ó bimpám gá bíná, nkʉ̂ mɨná gá bʉr o tɨ̂ʼ bɨ́ɛ, bé á si koʼo wé lɨ́ enkɛ́ɛ. 11Ɨ́ mpʉ mɨ́ná dí ebúʼla gá ó, mɨná bé á bi gá twiʼ ó, njɨ e nzɨ̌ mpam mé Tî Yésʉs yɨ́, jwɨʼ gwár yaá ntémé ó bɨ́ɛ bé á bi twiʼ yɨ́.»

12Bʉr ó bʉm bɨ́bɛ̂h ntɔ̂ʼ di ɨ́ jolaaa ɨ́ jɔʼ bé á jóʼo Banabâs, bé e Pɔ̂l lɨ́ elɛ́ɛ bé lɔ́ɔ́ tɨ̂ʼ yɨ́: mpʉ̌ Nzyɛ̌m á sâ mesimá, ti e bisá bí ékâm témé bʉr o b'á be abe oYúden bá yɨ́. 13Jɔʼ bé á be, bé dína ɨ́ jwɨ́m yɨ́, Jacques ntɔ̂ʼ nʉǎ lwǐb. Nye ó: «Bɨ́ɔɔ́ bâm! Okɛ́l bâm! Jóʼláá gá me! 14Simon, nyɨ́ lɛ́ɛ̌ mpʉ̌ Nzyɛ̌m á tô bikúl bíswîh ɨ́ menɔɔlʉ yɨ́. Nzyɛ̌m, nyɨ́ twâr ntémé bʉ́ʉ́ bʉ̂r ɨ́ sɔ́má bíkûl byaá ó, bé dyéʼee koo e né. 15Bisyɛ́ɛla bî, byê bɔmá ó e mekǎn ógwíha o mílɔ̌b bé á cɛma má. Yê cɛmá ɨ́ Mekaná mé Nzyɛ̌m ó: 16“Píe tɨ̂, me óbáʼǎ nze. Me óbáʼǎ sumǒ mbɛ̌r mé David wé á boo bîʼ, duma sí wɨ́. Me óbáʼǎ tyêl wé tîtyěl. 17Bʉ́ʉ́ bʉ̂r, bé ntémé sáŋaa Dâ Nzyɛ̌m, bé e bʉr o bíkûl bíbyɛ̂h dí ejwɨrɔɔ díé lâm bá. Nó ó Dâ Nzyɛ̌m dí elɛ́ɛ yɨ́, nyɨɛ mʉr dí esâ bísyɛ́ɛla byaá, 18waá dí eboó gʉ́a byé táarě myâ nyá.”»

19Jacques, nye ó: «Nó mɛ̂m dí elɛ́ɛ ó: mʉr, nyé ajala le ekûhlo mépɨʼ mé éntɨ̂ʼ bʉ̂r o bíkúl bíswîh ɨ́ jɔʼ bé dí edwira, dyêʼ koo e Nzyɛ̌m yɨ́. 20Mɨná cɛ́maa gá yɨ́ɛ mekaná ó, bé syɛ̂hlaa edulo mélwaʼwo ɨ́ menyʉ́l mɔ́ɔ́ e menzɨ̌ mâ:

lɨ́ edwe bíkpɛʼkpɛ̂ʼ bí ónzyɛ̌m dúu,

lɨ́ esâ bímolá,

lɨ́ ede tír á pa dwe tû nyá,

nkʉ̂ lɨ́ ede métié.

21«Ebě, táare ɨ́ melú mé épíhe, nzě kumǒ kumáa mûh, metié mé Moyɨ̂z, mé lɨ́ eláŋɔɔ ɨ́ binkana bíbyɛ̂h. Mé lɨ́láŋɔ́ɔ́ ɨ́ mempáh mínjɨʼla ó, ɨ́ mimóhó mí sábat mímyɛ̂h.»

Mekaná mé á tyenɔɔ bʉr ó Antiôs má

22Nó bʉ̂r o mílʉ́mlʉ́, bé le otyɛ̂b bé ésôʼ ó Mbɛ̌r-Nzyɛ̌m ndu e bʉr ó Mbɛ̌r-Nzyɛ̌m bɨ́bɛ̂h, bé á nze tíʼe ó, bé ópɛ̂h bʉ́ʉ́ bʉ̂r ɨ́ sɔ́má yɔ́ɔ́, bé olómo bé Antiôs, bé e Pɔ̂l, ndu e Banabâs. Nó ó bé á pɛ̂h Yʉ́da, waá bé jɨ́jébé ntémé “Barsabâs” nyá, bé e Silâs. Bʉr baá bɨ́bɛ̂h obá, bé á be ó e dúu ɨ́ sɔ́má bɨ́ɔɔ́ bɨ́ná. 23Bé á lómo bé ó, bé tôʼ tímle bé mekaná mâ:

Yé ó bɨ̌h, bʉr o mílʉ́mlʉ́, otyɛ̂b bé ésôʼ ó Mbɛ̌r-Nzyɛ̌m le bɨ́ɔɔ́ bɨ́n ɨ́ Krîst ó dí ecɛma bɨ́n mekaná mâ.

Bɨ̌h cɛmá ó, bʉr ó Antiôs, le baá ó Sirî ti e baá ó Silisía bé á be abyɛ̂l oYúden bá.

Bɨ̌h bé lɨ́ esoho bɨ́n!

24Bɨ̌h cɛmá bɨ́n ó, ebe bɨ̂h jóʼó ó, bʉ́ʉ́ bʉ̂r, bé á si duho ɨ́ sɔ́má yɨ́h, tô kwá nyɨ́n. Mekǎn mɔ́ɔ́, mê nzě tɨ̂l bɨ́n mekʉ̌ sí. Abe ó, bɨ̌h bé á si lómo bé ó, bé sâʼ nó. 25Sá tɨ̂ʼ ó bɨ́h á syɛŋa léme ngwár, pɛ́hɔɔ bʉ́ʉ́ bʉ̂r, lómlɔɔ bɨ́n bǎ, bé e bɨ́ɔɔ́ ó kpɛ̌l bɨ́h: Banabâs, bé e Pɔ̂l yɨ́. 26Bé ó b'á bîr bicwiʼ byɔ́ɔ́ ɨ́ lɔ̌b díé mé Tî gá wɨ́ná, Yésʉs-Krîst. 27Nó bɨ̌h bɨ́ lómlo bɨ́n ntémé Yʉ́da, bé e Silâs. Bé bʉr o tɨ̂, bé ókʉ́ gwá lɛ́ɛ bɨ́n sá bɨ̂h cɛmá bɨ́n yɨ̂. 28Bɨ̌h bé á si gwɨ̂hla, ntɔ̂ʼ bee ó, Sísǐm mé Nzyɛ̌m, nyɨ́ bee émbɨa lɨ́ ebîr ó, bɨ̌n sá akɛlɔɔ̌ mbeʼ swîh, njɨ bisyɛ́ɛla bi dí ɨ́ buǒ nyɔm bí. Bɨ̌h ntémé bee ó nó. Bisyɛ́ɛla byaá ó bî. 29Bɨ̌n bé ɨ́ jala le eti:

tír á baŋɔɔ ɨ́ nzaá bikpɛʼkpɛ̂ʼ bí ónzyɛ̌m nyá;

ndéá métié;

tír á pa dwe tû nyá;

ndu e bimolá.

Bɨ́n ókánwo ményʉ́l mɨ́n ɨ́ mbi wɨ̂ʼ nó, lɛ́ɛ́, bɨ̌n bé ókʉ́ gʉ́a ésâ sá dí ɨ́ mbɨa yɨ́. Diʼee gá mbɨ̂mbɨá.

30Nó ó bé á nze bîr bʉr o mílʉ́mlʉ́ baá ó, bé tôʼ ɨ́ lʉ́mlʉ́ waá. Bé ntɔ̂ʼ tó pyâl Antiôs. Jébɔɔ bʉ̂r ó Mbɛ̌r-Nzyɛ̌m bɨ́bɛ̂h, syɛŋɔɔ bé gúmo gwár, nzě tímlɔɔ bé mekaná maá. 31Jɔʼ bé á sil eláa mé yɨ́, bʉr bɨ́bɛ̂h ntɔ̂ʼ buú soho métwɨ́ɨ́ maá, ebě, mé á si bu gbâ bé nkul ɨ́ miléme. 32Yʉ́da, bé e Silâs, bé á be ntémé ó, ogwíha o mílɔ̌b. Bé á si bu lɛ́ɛla e bɨ́ɔɔ́ bɨ́ná baá, lɨ́ etɨ́e bê, le egbâ bé nkul ɨ́ miléme. 33-34Bê nzě di bwá mélû gʉ̂. Píe tɨ̂, bɨ́ɔɔ́ bɨ́ná ntɔ̂ʼ bîr bé mbɨ̂mbɨá ó, bé búlaa, bé tôʼ nko bʉ̂r o b'á lómo bé bá, bé á be yɨ́.

35Nó ó, Pɔ̂l, bé e Banabâs, bé á si lîʼ Antiôs. Bé e bʉ́ʉ́ bʉ̂r ɨ́ buo buo, bê nzě gɔ́na le elɨlɛ̂ʼle bʉ̂r, le elɛ́ɛ bé lɔ́ɔ́ dí edumo e Tî Yésʉs wɨ́.

Pɔ̂l, bé e Banabâs, lɨ́ ebɔ́ʼa ménzɨ̌

36Píe melû maá, Pɔ̂l nzě lɛ́ɛ e Banabâs ó, bé tô naa bɨ́ɔɔ́ bɨ́ná ɨ́ binkana bíbyɛ̂h bé á lɛ́ɛ lɔ́ɔ́ dí edumo e Tî Yésʉs wɨ́ bí. 37Banabâs á bě e gwɨ́má ó, bé tôʼ ɨ́ tyen yaá e Yʉánɛs, waá dí e lʉ́ʉ́ díe ó, “Marc” nyá. 38Mbeá mé Pɔ̂l wɨ́ɛ, wé á be ó, bé ayɨ́ tô e né, ebě, nye á si líʼe bé ɨ́ sí Pamfilía, akǎ tô dóló, nkʉ̂ pʉgʉ́ bá súʼo bé ɨ́ syɛ́ɛ́. 39Nó ó, bé á si bu gœ́a, nzě bɔ́ʼa: bé l'akǎ syɛŋa nzɨ́ mpwár. Nó ó Banabâs á nze nʉa Marc, bé e nɔ́ɔ́ nzě tóŋɔɔ̌ tíhé Swiprʉ̂s yɨ́. 40Pɔ̂l nyɨɛ nzě pɛ̂h Silâs. Bé e nɔ́ɔ́ ntɔ̂ʼ tô. Nó ó, bɨ́ɔɔ́ bɨ́ná, bé á jɨʼla e Nzyɛ̌m ó, nye cwɨ́aa e bê, le ebaʼle bê. 41Nó ó bé á nze tô, tô le elaa ɨ́ sí Sirî le yaá Silisía, lɨ́ egbɨ̂gba bʉ̂r ó Mbɛ̌r-Nzyɛ̌m pîm ɨ́ búʼó, bigúmo bigúmo.

Currently Selected:

Milʉ́mlʉ́ 15: ozm

Highlight

Copy