KUHALAWA 24

Mulopa wa Lagano

1MNDEWA kamulongela Musa, “Izo hano uchana kumwangu. Wize na Haloni, hamoja na wanage wabili Nadabu na Abihu, na wavyele malongo saba wa Islaeli. Munitambikile nie kipigiti muli kutali. 2Ila gweye, Musa, wiyeka iyo wondaunikwenhukile. Wasigale sambiwanikwenhukile. Na mmwanza wa wanhu wasigale, haduhu hata munhu imwe yatogozigwe kukwela uchana hamoja na gweye.”

3Musa viyacholile kuwalongela wanhu malagizo gose na ndagizi zose ziyagweleligwe na MNDEWA, wanhu wose wedika na dizwi dimwe, wolonga, “Kila kinhu kiyalongile MNDEWA tokitenda.” 4Avo Musa kazandika mbuli zose zayalongile MNDEWA. Imitondo ng'hani zua da ikabili kalamuka na kuzenga kilingo cha kulavila nhosa hasi ya idigongo na kusimika nguzo za mibwe longo dimwe na mbili zilingile na mheta ya mitala longo dimwe na mibili ya Islaeli. 5Abaho kawatuma wamhale kulawa mmwanza wa wanhu wa Islaeli, walave nhosa za kulukuza na nhosa za kuchinja ndama za ng'ombe ziwe nhosa za tindiwalo ha MNDEWA. 6Musa kadeha hindi da mulopa wa wang'onyo na kuwika mmikungu, na hindi da mulopa usigale kaumizila mkilingo cha kulavila nhosa. 7Abaho kasola kitabu cha lagano, na kuwasomela wanhu. Na hewo watogola, walonga, “Gose gayalongile MNDEWA togatenda, na kugagoga.”

8Avo Musa kasola mulopa kawamizila wanhu na kulonga, “Uno uwo mulopa wa lagano dija MNDEWA diyatendile na mweye kipigiti viyawagwelele Malagizo gano.”

9Abaho Musa, Haloni, Nadabu na Abihu, na waja iwavyele malongo saba wa Islaeli wakwela uchana kukigongo, 10na wamona Mulungu wa Islaeli. Hasi ya magulu gake kukala na kinhu kilingile kamba sakafu ya mabwe itendigwe na yakuti samawi, ikala buluu inang'hazika kamba ulanga. 11Mulungu hawatoile wano iwavyele wa wanhu wa Islaeli. Wamona Mulungu, na waja na kung'wa haulongozi wake.

Musa Hadigongo da Sinai

12MNDEWA kamulongela Musa, “Kwela uchana hakigongo kunili nie, unibete, na nie nokugwelela mbamha mbili za mabwe zili na malagizo na ndagizi zinyandike sama ya kuwafundiza wanhu.”

13Avo Musa kachola hamoja na mwandakana wake Yoshua, abaho kakwela uchana hakigongo cha Mulungu. 14Musa kakala yawalongele waja iwavyele, “Tubeteni hano mbaka vondatuwabwelele, Haloni na Huli wa hano hamoja na mweye, na munhu yoyose yali na mbuli yachole kumwao hewo.”

15Musa viyakwelile uchana kudigongo, wingu didigubikiza idigongo. 16Yenzi ya MNDEWA ikala uchana ya Idigongo da Sinai. Wingu digubikiza idigongo mkipigiti cha mazua sita, na mdizua da saba MNDEWA kamkema Musa kulawa muja mdiwingu. 17Yenzi ya MNDEWA yoneka ha Waislaeli kamba moto usakaza uchana ya idigongo. 18Musa viyakalile yokwela uchana ya idigongo, kengila mdiwingu, na kakala kuja uchana hakigongo mazua malongo mane imisi na ikilo.

Currently Selected:

KUHALAWA 24: Kizalamo

Highlight

Copy