KUHALAWA 15

Wila wa Musa

1 # 15:1 Lola LUGUBULO 15:3 .Abaho Musa na Waislaeli wamwimbila MNDEWA wila uno.

“Nomwimbila MNDEWA kwavija kapata yenzi ng'hulu ng'hani.

Falasi na waja wawakwelile kumgongo wasigwa m'bahali.

2 # 15:2 Lola ZABULI 118:14 na ISAYA 12:2.MNDEWA iyo yonitenda nie niwe na mhiko,

heyo iyo kilamso cha nie kwimba wila uno.

Heyo kanikombola kulawa mwa wadumuka zangu.

Heyo iyo Mulungu wangu, na nie nomtogola heyo,

Mulungu wa tataangu, na nie nomuyenzi heyo.

3MNDEWA iyo galu wa ng'hondo.

Yahweh dijo twaga jake.

4“Mikwama hamoja na asikali zake Falao, MNDEWA kayasila M'bahali Ndung'hu,

wakulu wa asikali wa Falao wadanganhikila mbahali.

5Vilindi va bahali viwagubika,

wadidimila hasi kamba dibwe.

6“MNDEWA, mkono wako wa ukulume una mhiko zili na yenzi,

MNDEWA, mkono wako wa ukulume uwahonda wadumuka.

7Muna iyenzi yako ng'hulu, kuwasa hasi wadumuka zako,

kulava lusango lwako na kuwalukuza kamba misanze inyalile.

8Sama ya mhumuzi za mhula yako, mazi gatenda kisugulu,

gema wima kamba kiwambaza,

vilindi va ibahali viwa vidala.

9Mdumuka kaitopa, kalonga, ‘Nowakoleleza na kuwagoga.

Nie nougola ugoli wao na kusola chochose kinilonda.

Nodisomola zele jangu, na mkono wangu wowabananga.’

10Ila gweye kuhumula na mhumuzi yako, na bahali iwagubika.

Wadidimila kamba lisasi mmawimbi makulu.

11“MNDEWA, yalihi mmwanza wa miungu yolinga na gweye?

Yalihi yali kamba gweye, gweye uli na ukulu muung'azi,

udumbiza muyenzi yako, mtenda mizonza?

12Kuugolosa mkono wako wa ukulume,

na isi iwameza wadumuka zetu.

13Kubitila noge dilekile kuhuha kowalongoza wanhu uuwakombole,

na kubitila mhiko zako kowalongoza kuukazi wako ung'alile.

14Ndewa zose zohulika na kugudema,

usungu owagoga wanhu wa Ufilisti.

15Wakulu wa Edomu wodumba,

vilangizi wa Moabu wogogigwa na bwembwe,

wanhu wa Kanaani mioyo yao yobogoyoka.

16Bwembwe na kingudemo vowagoga.

Kubitila mhiko za mkono wako,

woituza kamba dibwe,

mbaka wanhu zako, MNDEWA, vondawabite,

wanhu uuwakombole kulawa muunyakadala kuja Misili.

17Kowengiza na kuwahanda uchana ya kigongo chako,

hanhu hauhasagule gweye, MNDEWA, hawe kae yako,

hema da kuiting'hanila diuzengile gweye mwenyego.

18Gweye kowa MNDEWA wa gunge na gunge.”

Wila wa Miliamu

19Waislaeli wabita hagatigati ya ibahali kuno wobojaga isi inyalile, ila kipigiti falasi wa Falao, mikwama yake, na wagala mikwama zake viwawakoleleze, MNDEWA kagabweza kuchugu igamazi ga ibahali na kuwagubikiza.

20Abaho Miliamu muhokozi, lumbu jake Haloni, kasola ngoma mmakono gake, na watwanzi wose wasola ngoma zao na kumuwinzilila heyo kuno wotoa ngoma zao na kuvina. 21Miliamu kemba wila uno,

“Mwimbileni MNDEWA, kwavija kapata yenzi ng'hulu ng'hani.

Falasi na waja wawakwelile kumgongo wasigwa m'bahali.”

Mazi Gali Usungu

22Abaho Musa kawalongoza Waislaeli kulawa M'bahali Ndung'hu, na kuchola mbaka kuna Uluwala lwa Shuli. Wachola mwanza wa mazua madatu muluwala, bila kuvika mazi. 23Viwavikile hanhu hokemigwa Mala, walemelwa kugang'wa mazi ga haja, kwavija gakala gausungu. Kino kicho kilamso hanhu haja hakemigwa Mala. 24Avo wanhu wamtwanganikila Musa, walonga, “Tung'we choni?” 25Abaho Musa kamulilila MNDEWA, na MNDEWA kamulagusila lubiki. Musa kalwasila mgamazi, na igamazi gagaluka na ganoga kung'wa.

MNDEWA kawagwelela ndagizi na malagizo na hiko kawageza. 26Kalonga, “Kamba muhaditegeleza dizwi jangu nie, MNDEWA Mulungu wenu, na kugatenda gaja ganinogele na kugagoga malagizo gangu gose na kuzigoga ndagizi zangu zose, basi nie siwagalila vitamu viniwagalile Wamisili. Kwavija nie iyo MNDEWA niwahonya mweye.”

27Abaho Waislaeli wavika Elimu, ako kukalile nzokwe longo dimwe na mbili na mitende malongo saba. Weka ng'hambi yao haja behi na igamazi.

Currently Selected:

KUHALAWA 15: Kizalamo

Highlight

Copy