KUHALAWA 10

Nzige

1Abaho MNDEWA kamulongela Musa, “Genda ha Falao, kwavija nie niutenda moyo wake hamoja na mioyo ya salange zake kuwa midala, giladi nilaguse mizonza yangu ino kumwao, 2na muwalongele wanenu na wazukulu zenu vija vuniwatendile Wamisili kuwa wabozi na vija vunitendile mizonza hagatigati yao giladi mweye m'vitange kamba nie iyo MNDEWA.”

3Avo Musa na Haloni wachola ha Falao na kumulongela, “MNDEWA Mulungu wa Waeblania kolonga vino, ‘Kolema kuihumulusa mwenyego haulongozi wangu mbaka zua jaki? Waleke wanhu zangu wachole giladi wakanitambikile nie. 4Kwavija kamba uhalema kuwaleka wanhu zangu wachole, mayo nowagala nzige muisi yako. 5Woigubika isi yose, avo haduhu munhu yondayadahe kona isi. Woja vinhu visigale vilekigwe na mvula ya mabwe, na woja mibiki yenu yose ili mmigunda. 6Womema mzing'anda zako, mzing'anda za salange zako, na mzing'anda za Wamisili wose, kinhu hakinakoneka na watata zako ama wahenga zako, songela viwaleligwe mbaka sambi.’ ” Abaho kahinduka na kulawa ha Falao.

7Salange wa Falao wamulongela, “Munhu ino kowa mtego kumwetu mbaka zua jaki? Waleke wanhu wano wachole, giladi wakamtambikile MNDEWA Mulungu wao. Mbaka sambi hunavitanga kamba isi ya Misili ibanangigwa?”

8Avo Musa na Haloni wabwezigwa ha Falao, na Falao kawalongela, “Gendeni mkamtambikile MNDEWA Mulungu wenu. Ila wanhu walihi hasa wondawachole?”

9Musa kamwidika, “Tochola na wamhale zetu na wavyele zetu, tochola na wanetu wa kimbigalo na wa kitwanzi, na tochola na ng'ombe zetu na ng'hondolo zetu, kwavija tolondigwa tutende lusona ha MNDEWA.”

10Falao kalonga, “Noiduila ha MNDEWA, siwaleka muwasole watwanzi zenu na wanenu! Kweli yolagusa kamba mna ngelegeza zihile mmioyo yenu. 11Havidahika! Wambigalo weiyeka wawo wondawachole kumtambikila MNDEWA, kwavija kino kicho chumkalile mpula.” Abaho Musa na Haloni wawingigwa kulawa haulongozi wa Falao.

12Abaho MNDEWA kamulongela Musa, “Golosela mkono wako muisi ya Misili giladi nzige weze muisi waje kila mche wotile muisi, miche yose ilekigwe na ija imvula ya mabwe.” 13Avo Musa kenula fimbo yake uchana muisi ya Misili, na MNDEWA kaugala ubeho muisi kulawa ulawilo wa zua imisi yose na kilo yose. Viivikile imitondo, uja uubeho kulawa ulawilo wa zua ukala ugalile nzige. 14Nzige wengila muisi ya Misili na kukala muisi yose. Dikala dale kulu ng'hani da nzige dikalile hadinakoneka na hadidaha koneka kabili. 15Waigubika isi yose, na isi yose igaluka kuwa nhitu. Waija miche yose ya muisi na mijo yose ya mmibiki isigale kipigiti cha mvula ya mabwe, haduhu hata tepo dimwe disigale, haduhu m'biki ama mche muisi yose ya Misili.

16Hima Falao kawakema Musa na Haloni na kulonga, “Niloza ha MNDEWA Mulungu wenu na kumwenu mweye. 17Avo vigeleni kumgongo vilozo vangu mwanza uno tu! Na mnitambikile ha MNDEWA Mulungu wenu yawasegeze nzige wano wondawatende kila kinhu kidanganhike.” 18Abaho Musa kasegela haulongozi wa Falao na kutambika ha MNDEWA. 19Na MNDEWA kauhindula ubeho wa ulawilo wa zua na kuugala ubeho wa uswelo wa zua uli na mhiko, na uwahembelusa iwanzige na kuwagala kuna Ibahali Ndung'hu. Haduhu hata nzige imwe yasigale muisi yose ya Misili. 20Ila MNDEWA kautenda moyo wa Falao kuwa mdala, avo hawalekile Waislaeli wachole.

Ziza

21Abaho MNDEWA kamulongela Musa, “Golosa mkono wako uchana kuulanga, giladi kuwe na ziza kulu muisi yose ya Misili, ziza ajo dondadiwatende wanhu wababasile.” 22Avo Musa kagolosa mkono wake uchana kuulanga na ziza tititi diigubika isi yose ya Misili mmazua madatu. 23Wanhu hawakiiyonile, na mmazua madatu hawadahile kusegela haja hawakalile, ila haja hawakalile Waislaeli kukala na mulangaza.

24Falao kamkema Musa na kulonga, “Gendeni mkamtambikile MNDEWA, mweye hamoja na watwanzi zenu na wanenu, ila ng'hondolo, menhe, na ng'ombe zenu wasigale bahano.”

25Ila Musa kalonga, “Utuleke tuchole na wang'onyo zetu sama ya kulava nhosa za kuchinja na nhosa za kulukuza ha MNDEWA Mulungu wetu. 26Wang'onyo zetu wose tochola nao, haduhu hata imwe yondayalekigwe kuchugu. Kwavija tolondigwa tusagule kulawa mwa wang'onyo wano, waja wondatuwalave nhosa ha MNDEWA Mulungu wetu. Hata avo hatuvitanga vija vondatumtambikile MNDEWA mbaka vondatuvike haja.”

27MNDEWA kautenda moyo wa Falao kuwa mdala, na hawalekile wachole. 28Falao kamulongela Musa, “Segela hameso gangu! Sambinikone kabili haulongozi wangu! Zua dondauchone kihanga changu, kodanganhika.”

29Musa kalonga, “Kamba vija vuulongile! Hunyona kabili nie nize hano haulongozi wako.”

Currently Selected:

KUHALAWA 10: Kizalamo

Highlight

Copy