Engaado 8
8
Muhufumia Makesi
1 #
Eng 1:20,21. Amakesi alaanga,
haandi ohumanya huhuumula.
2Hu bigulu biri aambi neende engira,
yeema mu masang'aangira k'engira.
3Kahuumulira mu biruwa biingira mu siko,
aambi neende emilyaango nikaboola kati.
4“Eyiri eng'we, eng'we abaandu, huumula,
haandi amaliro kaange kachiire buli musaacha yeesi.
5Eng'we abataamanyihaane, mweeke ohwehaliirisa;
Eng'we abasiru, mutekeerese.
6Tekeerese, olwohuba njia ohulomaloma emboosi ndai muno,
haandi bi mbaboolera byoosi byadyeeri nibyo.
7Olwohuba nomanoma ebyadyeeri byoong'ene;
ebibi by'omusiro mu munwa kwaange.
8Nomanoma ebiluungifu byoong'ene;
sibulao esiindu sihyamu oba esikaluuhanakaluuhana.
9Byoosi bikololofu eyiri oyo owulira
haandi byadyeeri eyiri oyo onyoola ohumanya.
10Daheenge engeraka yaange ohuhiraho efeesa,
haandi ohumanya ohuhiraho esaabbu ndai;
11olwohuba Makesi ahirira elalira amakina k'engaanga,
haandi sibulao esiindu si wekoomba sy'onyala ohukeraania hu makesi.
12Ese niise Makesi, menya mu hwehaliirisa,
haandi ndi neende ohumanya neende ohuheenga emisaango bulai.
13Ohutya Omwaami nihwo ohusyuula ebibi.
Haba siindaha ohwehuduumbasa neende ohwepaaha neende esaambo mbi
neende enomanoma y'obubacha.
14Ngeraka bulai haandi ndi amakesi kaadyeeri,
manyirisa haandi neende amaani.
15Hoonya abatuki ohutuka,
neende abatuka ohutaao amalako malai.
16Niise ohoonya buli mutuki hu syaalo ohutuka,
neende abahunuufu ohutuka esyaalo.
17Abaandaha syesi nibo ba ndaha,
haandi abo abaangoonya neende esinani nibo abaanyoola.
18Ndi neende obuyiinda alala neende oluyaali,
obuyiinda buyiindira neende ohuhula-hulana.
19Ebiindu bi mbaberesa bihirira elalira esaabbu, kata esaabbu ndai yeene,
haandi bihira efeesa yihiramo obulai.
20Ngeendera mu ngira y'obuluungifu,
mu mihoosi ky'obwadyeeri.
21Abaandaha mbaberesa obuyiinda,
mani ndeechusa engaanga mu madaala kaabwe.
22 #
Hubwi 3:14. Omwaami n'aloonga, yachaaka naange,
ndi omulimo kwae muhale haandi okutaangira.
23Ndaliwo ohutula mu myaaka kya hale,
ohutula mu njaako, esyaalo nisitaloongwa.
24Ndeecha enyaanja niyisisiiri ohubaao,
esulo nichisisiiri ohusooha amaachi.
25Engulu chali nichisisiiri ohwombahwa,
haandi ndataangirira ebigulu ohubaao.
26Nasaae n'asisiiri ohuloonga esyaalo neende endalo chaasyo,
oba olufu lwataangira hu syaalo.
27Nasaae niyali n'ataao ekulu, ndaliwo,
haandi ndaliwo niyali n'ataao okunyaanja,
28niyabaamba ebireesi aakulu,
niyataao esulo chiri aasi mu nyaanja,
29yalagira enyaanja, efwiinda chibe neende yi chaakama,
mani amaachi kahaye ohubita yi yalagira,
niyataao emisiingi ky'esyaalo,
30ndali aambi nae, koti omwaana wae muyere
mani buli ludaalo ndali esangaalo lyae,
nindehoyera mu moni wae buli siha,
31nisangaalira mu syaalo syae neende ebisirimo
haandi nindehoyera ohuba alala neende abaandu.
32“Mani bulaanu baana baange, muwulire bi mboola,
olwohuba muli neende ehabi abo abadiira bi mbakerakira.
33Muwulireenge bi babakerakira mani mube abakesi,
haandi mutabirekeresaanga.
34W'ehabi oyo owulira bi mboola,
oba buli siha hu biruwa byaange,
n'aliindira hu milyaango ky'enyuumba yaange.
35Olwohuba buli onyoola aba anyoolere obulamu
haandi Omwaami achia ohumudaha.
36Nae oyo otanyoola, omweene yeewumisa;
abo boosi abasyuula, baba badaha ohufwa.
©Bible Society of Kenya, 2019
©Bible Society of Uganda, 2019