Engaado 17
17
1Esidiidi sy'olya neende omuleembe, kata syahaba esyoomeranu
sihira ohulya esidyaalo mu daala lirimo obusoolo.
2Omuhalaabani ohola emirimo neende amakesi, achia ohutuka omwaana womungo ohola eby'esoni,
haandi achia ohunyoola omukabo koti omwibulana.
3Esaabbu neende efeesa biteemerwa mu muliro kw'etanuuru,
nae Omwaami niye oteema emyooyo ky'abaandu.
4Omuhola-mbi atekeeresa emboosi mbi;
haandi omubacha niye odaha ohuwulira eby'obubacha.
5Oyo oduulira omumanani alekeeresa Omuloongi wae;
haandi oyo osangaalira amasira k'owaasye, yesi amasira kahamwoleho.
6Abakofu beehoyera mu beechuhulu baabwe,
haandi oluyaali lw'abaana nibo abeebusi baabwe.
7Ohulomaloma emboosi chirimo amahuluundu, haba sichihoyera abasiru;
nae omuundu w'oluyaali haba s'ahoyera ohuba omubacha.
8Baluwo abaandu babaasa bati ohulya asowa huli koti ekina ly'amaya,
buli yachiira achia ohuhula-hulana.
9Oyo oleheramo ebibi by'abaandi, okoonya ohudahwa,
nae oyo owichulisa abaandu ebibi byaabwe, akabuhania aboobwiicha.
10Omuundu w'amakesi yoolobiswa ehabi lala lyoong'ene niyeeka,
ohuhira omusiru ahuywa endawusi emia ndala.
11Omuundu mubi buli siha akoonya ohujeema,
mani bahamutumire wamwaanda mwaalaba ohumudiira.
12Silai ohubukaanana neende eryaaka ehasi libatusireho omwaana,
nae otabukanane neende omusiru n'ahola eby'obusiru byae.
13N'oholera esyonoono omuundu ohuholeere esilai,
esyonoono haba sisyahatule mu ngo wao.
14Ohuchaaka obusoolo huli koti ohwikulira amaachi omuhula;
mani otayinganaanga obusoolo buhaye ohukwaao.
15Oyo olehuula omuhola-mbi, neende oyo oheengera omuluungifu omusaango ohumuhira,
boombi Omwaami abasyuula.
16Eseende chi musiru atuunga mu hweeka chikota bihaya,
olwohuba haba saanyala ohubimanya.
17Abeecha baheerana buli siha,
haandi abebulanwa b'ohuhoonyana mu budinyu.
18Sy'obusiru ohwemerera omuundu wuundi,
haandi ohweeyama oti niiwe ochia ohutuunga ekobi.
19Oyo odaha obusoolo omweene yekoonyera ebidinyu;
haandi oyo owehuduumbasa akoonya ohusihirira.
20Omuundu w'ebibaaso bidoondobanu haba sahulahulana,
haandi ow'enomanoma mbi yereetera amasira.
21Omwaana musiru adiisa laatang'ene engisa;
haandi laatang'ene mwaana musiru abula neende esangaalo.
22Omwooyo musangaafu kwosi malesi kawonia,
nae omwooyo kweeyendeherera kung'aya omuundu.
23Omuyaasi mulyaanga afukiirira ohulya asowa neende omwooyo kwoosi,
mani yadondobania obwadyeeri mu huheenga omusaango.
24Omuundu mumanyirifu achooma eyiri amakesi,
nae omusiru achaaka sino neende sira.
25Omwaana musiru adiisa laatang'ene engisa,
haandi aleetera ng'ina obuchuuni.
26Haba sisilai ohutuungya omuundu muluungifu,
haandi sibi ohusaandya omuundu oholere esiindu silai.
27Omuundu mukesi yetuka mu nomanoma,
haandi otabbwanguha neende emboosi niye omuwuliri.
28Omusiru awuleera bahamulaanga bati mukesi;
oyo owuleera yahaya ohulomaloma, yahabalwa koti omuwuliri.
©Bible Society of Kenya, 2019
©Bible Society of Uganda, 2019