Engaado 12
12
1Oyo odaha ohukerakirwa adaha ohumanya,
nae otadaha ohukerakirwa musiru niye.
2Omwaami asiima abaandu balai,
nae abalya olukwe mu baandi, abadiisa omusaango.
3Omuundu haba sahulahulana mu huhola ebibi,
nae omuundu muluungifu niye ohulahulana yoomira.
4Omuhasi mulai niye oluyaali lwa wamwe,
nae omuhasi odiisa wamwe esoni ali koti obulwaae buhomakira mu makuumba.
5Ebibaaso by'omuundu muluungifu byadyeeri nibyo;
nae engeraka ch'abaandu babi chobubacha.
6Emboosi ch'abaandu babi ch'obutemo,
nae abaluungifu balomaloma ebiwonia abaandu.
7Ababi basihirira mani yaabulao okobola mu makulu kaabwe,
nae abomu nyuumba y'abaluungifu badoong'ao.
8Omuundu mwehaliirisi asiimwa,
nae ow'ebibaaso bidoondobanu alekeereswa.
9Omuundu muloonga odidiihanira omweene ebyohulya byae,
ahira owehuduumbasa nae haba saali neende esyohulya.
10Omuundu muluungifu adeeba hu bisolo byae,
nae esisa sy'omuundu mubi nisyo obwaalaba.
11Oyo olima eloba lyae yahabe neende ekesa liingi,
nae oyo oloondakana neende ebibulamo obuhoonyi, abulamo amakesi.
12Omunaara kw'abaandu babi kufuniha mani kwaakwa aasi,
nae omusiingi kw'abaluungifu kweema nikwomiirire.
13Emboosi ch'omuundu mubi nicho omuteego kumudiira,
nae omuluungifu awona ebidinyu.
14Omuundu anyoola omusaara okuchanakana neende enomanoma yae ndai,
haandi ohudidiihana hwae hulai humukobolera.
15Ebiindu bi musiru ahola, omweene abona ati bilai,
nae omukesi awulira bi bamukerakira.
16Omusiru n'anyoolera, buli muundu amanya,
nae omukesi yeebulerera sa kata neende bahamunyeka.
17Oyo olomaloma obwadyeeri yeekesa obwadyeeri,
nae omubacha yeekesa obubacha.
18Oyo olomaloma n'atehaliriise, emboosi chae chiri koti olugaanga lufumita abaandi,
nae emboosi ch'omukesi chileeta obuwonia.
19Emboosi ch'obwadyeeri chiyiindira endaalo choosi,
nae echobubacha haba sichiyiindira.
20Abo abatekeha mu myooyo kyaabwe ohuhola ebibi, beebacha abeene,
nae abo abatekeha ohuhola ebilai balisangaala.
21Abaandu baluungifu haba sibahakweeho esibi,
nae abahola-mbi beechulanaho ebidinyu.
22Omwaami saadahiraho elalira abalomaloma eby'obubacha,
nae asangaalira abahola ebiindu mubwadyeeri.
23Omuundu muwulisi haba siyekesa buli siindu si amanyire,
nae abasiru beekesa obutamanya bwaabwe.
24Ohudidiihana neende esinani hukera waaba neende obunyala,
nae obukata bukera waaba omuwaambe.
25Ohweyendeherera huleeta engisa,
nae emboosi ndai yileeta esangaalo.
26Omuundu muluungifu yeebwaaba esyonoono,
nae omubi akwiisa abaasye mu sibi.
27Omuundu mukata haba sanyoola syayiima,
nae ohola neende esinani anyoola eby'obuyiinda biingi.
28Obuluungifu buleeta obulamu,
nae obulyaanga buleeta ohufwa.
©Bible Society of Kenya, 2019
©Bible Society of Uganda, 2019