Engaado 1
1
Obuhoonyi bwe Engaado
1 #
1 Abat 4:32. Chino nicho engaado cha Solomooni, omwaana wa Daudi, omutuki wa Yisiraeli:
2Chino nicho engaado echichia ohuhoonya abaandu bamanye amakesi neende ohukerakirwa,
ohumanya emboosi neende amahuluundu machwichwiifu.
3Cheekesa amakesi k'ohuhola ebiindu mu makesi,
mu buluungifu, mubwadyeeri, neende ataali ohwehubbira.
4Cheekesa amakesi abaandu batali abamanyirifu,
chiberesa abaraaga ohumanya neende ohuchwichwiisa.
5Omuundu mukesi n'achiwulira, yemeeda ohweeka,
haandi chikerakira omuundu owulila,
6amanye amahuluundu k'olukaado ko mukati,
neende emboosi chilomwalomwa abachweenufu.
Ohukerakira abaraaga
7 #
Yob 28:28; Sab 111:10; Eng 9:10. Mu hutya Omwaami, nimwo ohumanya muhuchaakira;
nae abasiru balekeeresa amakesi neende ohukerakirwa.
8Mwaana waange, wuliraanga amakerako ka lataao,
haandi otayinganaanga neende bi maakoo ahweekesa;
9olwohuba ebyo nibyo ebilyoyesa esaambo chao, koti ekofia hu mutwe,
neende olunyolo mu kosi.
10Mwaana waange, abahola-mbi nibahuseendaseendaanga,
otafukiiriraanga.
11Niwiichuhanaanga bahuboolera bati, “Yiicha naafwe, lehe hweekise huliindirire yi huneete,
lehe huliindirire abataaliho omusaango, hubaseete ataali esifune,
12lehe hubamire koti emakoombe nibasisiiri abalamu
haandi abalaamba, koti abo babeesa aasi mu liina:
13huchia ohwenyoolera ebiindu by'engaanga y'aakulu muno,
huchia ohwiichusa enyuumba cheefwe neende ebiindu bipeeye;
14yiicha obe alala naafwe, hukabanire alala ebiindu bihunyakire”.
15Mwaana waange, otateemangaho ohuholera alala nabo,
haandi otabesudyaangaho, 16olwohuba haba sibachia huhiinda nibataholere esyonoono,
haandi bachia ohwanguya ohwiidisa amabaanga.
17Olwohuba obaambulira oluhaanda bihaya
eyoni lyoteka nilibona.
18Nae abasaacha bano beboonderera amabaanga kaabwe keene,
bateka obulamu bwaabwe bweene.
19Bityo nilwo lu biba eyiri abo boosi abanyoola engaanga mu hunyaka;
abahayinyoole, yahabeete.
Amakesi kalaanga
20 #
Eng 8:1-3. Amakesi kahuumulira mu kono ly'aakulu hu ngira;
kasiingisira ekono lyaako mu siito.
21Kalomalomera mu kono ly'aakulu
hu biruwa bibeengiriramo mu siko nikaboola kati:
22“Eng'we abataali neende amakesi, mwahaake yeena ohudaha obutamanya?
Nae abalekeeresi bahaake yeena ohusaangaliraanga mu bulekeeresi bwaabwe
neende abasiru ohusyuulaanga ohumanya?
23Tekerese ninjolobya;
bone, njia ohubakerakira bulai;
njia ohukera mumanye emboosi chaange.
24Olwohuba mbalaangire mani mwaahaya ohutekeeresa,
ngoloole omuhono kwaange nae abulao odeebereyo,
25mwaahaya ohuwulira engeraka chaange choosi,
mwaahaya mboolobye nabudiidi.
26Mani syesi njia ohubacheha nimulikwa mu masira;
njia ohubadyaabuhira oluteengo nilwahabakweemo,
27oluteengo nilwahabakweemo koti omuyaka,
haandi amasira nikaheeche koti esifuusye,
engisa neende obuchuuni nibwahabakweeho.
28Mani ao, bachia ohunaanga, nae haba sindahabakobolemo;
bahangoonye bulai muno, nae haba sibahanjakaane.
29Olwohuba basyuula ohumanya
haandi sibaheengao ohutya Omwaami.
30Haba si badaha kata mbakerakire,
mani mwalekeeresa ohwolobya hwaange hwoosi.
31Sakira mwahanyoole omukabo kuhoyera ebiholwa byaabwe
mani mwebwaaba ohulya olukwe hweeng'we beene.
32Olwohuba esiita abaandu batali neende obumanyirifu, nihwo ohwechuuhira amakesi,
haandi obutadeebayo, nihwo ohusihirisa abasiru.
33Nae oyo otekeeresa ebyaange, anabecheenge mu muleembe,
haandi anabecheenge bulai, ataali ohutya esyonoono syoosi.”
©Bible Society of Kenya, 2019
©Bible Society of Uganda, 2019