Ohubala 18
18
Emirimo ky'Abalaamisi neende Abaleefi
1Omwaami yaboolera Arooni ati, “Ewe, abaana bao, neende Abaleefi bahoyere ohuchuunisibwa hulw'omusaango kwoosi okudiira hu huhalaabanira mu Yeema ly'Ohubaao hwaange; nae ni ewe weeng'ene haandi neende abaana bao boong'ene, abachia ohuchuunisibwaanga hu musaango kudiira hu buhalaabani mu bulaamisi. 2Muchie muleetemo abeeho beeng'we, enono ya Leefi, ohuholaanga naawe emirimo, haandi ohuhuhoonyaanga, nae ewe neende abaana bao nimuba mweeng'ene abahalaabanira mu Yeema bweene. 3Abo baba bahoyere ohwooseresaanga obufunaanibwa bwaabwe yooli, haandi neende ohuholaanga bi bahoyere ohuholaanga hu Yeema ebibahoyeere ohuholaanga koti abeene, nae haba sibahoyeere ohwegeeng'aangaho hu biindu byoolerefu byoosi, ebiri mu Abuundu Woolerefu, oba hu alutaari. Nae nibahaya ohuhola batyo, abeene abo, alala neende ewe mweene, muba muchia ohwiitwa. 4Bahoyere ohuholeraanga alala naawe, nibooseresa bi bahoyere ohuholaanga mu buhalaabani bwoosi obwomu Yeema, nae abulao oyo yeesi otahoyera ohoyere ohuhola emirimo naawe. 5Ewe neende abaana bao eng'we mweeng'ene niing'we abahoyere ohwooseresaanga bi muhoyere ohuhola mu Abuundu Woolerefu neende hu alutaari, hu tima lyaange lihae haandi ohutuunduhira hu baandu ba Yisiraeli. 6Ese omweene niise odoolere abeeho bao Abaleefi, ohutula mu Baisiraeli boosi koti esiyaanwa syao. Bewaayo yiindi, hu banyale ohuholaanga emirimo kyaabwe mu Yeema. 7Nae ewe neende abaana bao mweeng'ene niing'we abahoyere ohwooseresaanga emirimo ky'obulaamisi ekidiira hu alutaari, neende esyo esiba nisisiiri mu Abuundu Ahiramo Obwoolerefu. Ebiindu bino byoosi biri mu bufunaanibwa bweeng'we, olwohuba niing'we baambereese esiyaanwa sy'obulaamisi. Mani omuundu yeesi otahoyera niyeecha yaasuda aambi neende ebiindu bilafu, aba ahoyere ohwiitwa-bwiitwa.”
Omukabo kw'Abalaamisi
8Omwaami haandi yaboolera Arooni ati, “Yichulisa oti ese ndi ohuhuberesaanga neende obuhoonyi bwoosi obw'enjaulo obuleeterwe yiindi ebitasaambwa koti ebiyaanwa daawe. Ese ndi ohubihuberesa haandi neende abeechuhulu bao koti esituundu syabaleherwa endaalo choosi pe. 9Hu biyaanwa bihiramo obulafu, ebitasaambirwa hu alutaari, ebiloondaho bino byoosi byao: ebiyaanwa by'emere, ebiyaanwa by'esyonoono, neende ebiyaanwa by'ohutuunga amakobi. Buli siindu esiba nisindeteerwe koti esiyaanwa silafu siba siri esyao neende abaana bao. 10Muhoyere ohuliraanga ebiindu bino byoosi Abuundu Woolerefu, nihaandi ni abaandu b'esisaacha boong'ene nibo abahoyere ohubirichaanga: biyireenge byoosi sa koti ebyoolerefu.
11“Mu humeedaho, esy'obuhoonyi sy'enjaulo siindi syoosi, si Baisiraeli baleeta yiindi, sichia ohubechaanga esyao. Ndi ohubihubechaanga ewe, abaana bao, neende abahaana bao endaalo choosi echiicha. Buli mulala hu b'enyuumba yao oli omulafu koti emiduunga kiboola, ahoyere ohubirichaanga.
12“Ndi ohuhubechaanga ebiindu bihiramo obulai byoosi eby'ebitulamo byaamberi bi Baisiraeli baamberesaanga buli mwaaka: amafuta k'enaasi, efiini, neende emere. 13Byoosi byao nibyo. Buli mulala hu b'edaala lyao, omulafu anyala yaabirya.
14 #
Lef 27:28. “Buli siindu mu Yisiraeli esiba nisiyaanirwe yiindi ataaliho esifune siindi syoosi, syao nisyo.
15“Buli mwaana waamberi, oba esyaayo syaamberi, si Baisiraeli bandeetera syao nisyo. Nae ohoyere ohufukiirira obukusi bw'ohukula ohwefunyisira buli mwaana waamberi, haandi ohoya ohuba n'ofukiirira obukusi bw'ohukula buli sisolo syaamberi esiri esy'omusiro ohweema hu miduunga. 16Abaana bahoyere ohukulwa baakoboswa nibali omwoosi mulala okw'obuhuluundu hu bukusi buba nibufukiirisaanie obw'efeesa, ohweema hu bukusi bwafukiirirwa alafu. 17Nae ebyaamberi by'eng'oombe, amakoondi, neende embusi, haba sibihoyere ohukulwa byaakoboswa daawe; ebyo byoosi byaange hu bwaange sa, mani bihoyeerwe ohuyaanibwa sa. Nyulaanyusaanga amabaanga kabyo hu alutaari, haandi osambaanga amasinya kabyo koti esiyaanwa sy'esyohulya, esy'esaami yisangaasa. 18Enyama chibitulamo yoosi yiba yiri eyao niyo, koti sa ebigwoogwo neende ebinama byenaadaho by'omuhono muluungi, eby'esiyaanwa sy'enjawulo.
19“Ndi ohuhuberesaanga ewe, neende abaana bao, neende abahaana bao, ebiha byoosi ebiicha, eby'obuhoonyi by'enjaulo bi Baisiraeli bandeetera. Yino ndagaano yitahalakwanga daawe, yi holere naawe, neende abeechuhulu bao.”
20Omwaami yaboolera Arooni ati, “Ewe haba soochia hwakaanaanga ebiindu byoosi ebinyala ohusihiranwa, haandi abulao kata esituundu silala esy'eloba lya Yisiraeli Omwaami, niise ebyo byoosi byoodaha.”
Omukabo kw'Abaleefi
21 #
Lef 27:30-33; Amal 14:22-29. Omwaami n'aboola ati, “Ese mbereese Abaleefi buli silala sy'ehumi si baandu Baisiraeli baleeta yiindi. Sino sichia ohubechaanga esy'ohutuunga obuhalaabani bwaabwe mu huliinda Eyeema ly'Ohubaao hwaange. 22Abaisiraeli baandi abo bulaanu haba sibahoyeere ohusudaanga sa eyiri Eyeema, mani mu ngira yino, baabechaanga nibanyala ohweleetera abeene esibonereso sy'ohufwa. 23Ohutula enyaanga yino neende ohwemeeda mu moni, Abaleefi boong'ene nibo abachia ohufukiirirwaanga ohuliindaanga Eyeema elyo, mani babeechaanga nibali nibo abaliriho obufunaanibwa. Lino ni elako ly'olubeerera eliridiira neende hu beechuhulu bao. Abaleefi haba sibachia ohubeechaanga neende ebiindu by'olubeerera mu Yisiraeli muno, 24olwohuba ese mbabereese koti ebiindu byaabwe, esy'ehumi si Abaisiraeli baandeteraanga koti obuhoonyi bw'enjaulo. Mani sakira mbaboleere endi, haba sibachia huba neende esiindu syoosi esy'olubeerera daawe, mu Yisiraeli muno.”
Silala sy'ehumi sy'Abaleefi
25Omwaami yalagira Musa 26ohuboolera Abaleefi ati: “Nimunyoola esiyaanwa ohutula hu Baisiraeli si Omwaami ababeresa ohuba esyeeng'we, muhoyere ohuleetaanga esy'ehumi syasyo eyiri Omwaami koti obuhoonyi bw'enjaulo. 27Obuhoonyi bw'enjaulo buno buba buchia ohuyirwa koti esyaakanirira neende esiyaanwa si mulimi ahola esy'emere njaaha, neende efiini njaaha. 28Mani mu ngira yino, nimwo mu mwesi muchia ohunyala ohuyaaniramo obuhoonyi bw'enjaulo obw'Omwaami, ohutula mu by'ehumi byoosi bi onyoola ohutula hu Baisiraeli. Ohoyere ohutusaanga obuhoonyi buno bw'Omwaami, hu Arooni omulaamisi. 29Kabaanga nootusa hu biindu bihiramo obulai mu wesi bi onyoola. 30Mani nooba noomalire ohuyirayo ebituundu bilai bihiramo, oba onyala ohwebiihira ebiba nibidoong'ereo, koti sa lu mulimi abihaanga ebiba nibidoong'ereo naaba n'amalire ohuyirayo esiyaanwa syae. 31Ewe neende amadaala keeng'we, munyala mwaaliira ebiba nibidoong'ereho abuundu woosi, olwohuba bino biba biri emisaara kyeeng'we hulw'ohuhalaabana mu Yeema. 32Haba simuba nimuchia ohuba neende omusaango ni mubirya, mwaafwa mwaaba nimumalire ohuyira ebituundu bihiramo obulai eyiri Omwaami. Nae hahasa oti soochia hubaha omukwoobo ebiyaanwa bilafu by'Abaisiraeli neende ohulichaanga hu buli biyaanwa ebituundu bi hiramo obulai nibisisiiri ohuyaanwa daawe; noohola otyo, oba ochia ohwiitwa sa.”
©Bible Society of Kenya, 2019
©Bible Society of Uganda, 2019